ମାଲକାନଗିରି,୦୧/୦୬: ମାଲକାନଗିରି ଛତିଶଗଡ ସୀମାନ୍ତ ନାରାୟଣପୁର ଜିଲ୍ଲାର ଅବୁଝମାଡ ଜଙ୍ଗଲରେ ମାଓବାଦୀ ମାନେ ଯବାନଙ୍କୁ ଟାର୍ଗେଟ କରି ଖଞ୍ଜିଥିବା ୧୦ଟି ଆଇଇଡି ବୋମାକୁ ନିଷ୍କ୍ରିୟ କଲେ ସୁରକ୍ଷାକର୍ମୀ । ଏହା ପରେ ଅବୁଝମାଡ ଜଙ୍ଗଲରେ ମାଓ ଦମନ ଲାଗି ଲଗାତାର ଭାବେ ସୁରକ୍ଷା ବାହିନୀ ପକ୍ଷରୁ ଅପରେସନ ଜାରି ରହିଛି ।
ଯବାନଙ୍କୁ ଟାର୍ଗେଟ କରି ନକ୍ସଲମାନେ ଜଙ୍ଗଲ ଭିତରେ ଅନେକ ଲେଣ୍ଡମାଇନ ଲଗାଇଥିଲେ । ହେଲେ ଅପରେସନ ବେଳେ ଯବାନମାନେ ଲ୍ୟାଣ୍ଡମାଇନ ଡିଟେକ୍ଟର ଦ୍ୱାରା ସର୍ଚ୍ଚ କରି ୧୦ଟି ଆଇଇଡି ବୋମାକୁ ଠାବ କରିଥିଲେ । ପରେ ବୋମା ନିଷ୍କ୍ରିୟକାରୀ ଦଳ ଏହାକୁ ଉଦ୍ଧାର କରି ଅତି ସତର୍କତାର ସହ ନିଷ୍କ୍ରିୟ କରିଛନ୍ତି । ସେହିଭଳି ବିଜାପୁର ଜିଲ୍ଲାର କୁତୁଲ ଜଙ୍ଗଲରେ ମଧ୍ୟ ମାଓବାଦୀଙ୍କ ଆଇଇଡି ଠାବ ହୋଇଛି । ସେଠାରେ ମଧ୍ୟ ସୁରକ୍ଷାକର୍ମୀ ମାଓ ବିରୋଧୀ ଅପରେସନରେ ଯାଇଥିବା ବେଳେ ୨ଟି ଲ୍ୟାଣ୍ଡମାଇନ ଠାବ କରିଥିଲେ । ପରେ ଯବାନମାନେ ଏହାକୁ ଉଦ୍ଧାର କରି ଡିଫ୍ୟୁଜ କରିଛନ୍ତି । ଘଟଣା ପରେ ସୁରକ୍ଷକର୍ମୀ ପକ୍ଷରୁ ଅପରେସନକୁ ଆହୁରି ଜୋରଦାର କରାଯାଇଛି ।
