ଆଠମଲ୍ଲିକ,୨୯।୮(ଆପ୍ର) : ଗଞ୍ଜେଇ ଚୋରା ଚାଲାଣ ହେଉଥିବା ବେଳେ ଆଠମଲ୍ଲିକ ପୋଲିସ ଚଢାଉ କରି ୧୦ କେଜି ଗଞ୍ଜେଇ ଜବତ କରିଛି। ଏଥିସହ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ଜଣକ ହେଲେ ଆଠମଲ୍ଲିକ ଥାନା ଅନ୍ତର୍ଗତ ଜଣ୍ହିମୁଣ୍ଡା ଗ୍ରାମର ସୁରେଶ ରାଜହଂସ ।
ମାଧପୁର ଅଞ୍ଚଳରୁ ଆଠମଲ୍ଲିକ ଦେଇ ବାହାରକୁ ଗଞ୍ଜେଇ ଚୋରା ଚାଲାଣ ହେଉଥିବା ଆଠମଲ୍ଲିକ ପୋଲିସ ବିଶେଷ ସୂତ୍ରରୁ ଜାଣିବାକୁ ପାଇଥିଲା। ଆଠମଲ୍ଲିକ ଆଇଆଇସି ପ୍ରକାଶ ଚନ୍ଦ୍ର ମାଝୀଙ୍କ ନିର୍ଦ୍ଦେଶରେ ଆଠମଲ୍ଲିକ ଥାନା ପକ୍ଷରୁ ସତିଶ ଲେଙ୍କା ଓ ଅନ୍ୟ କର୍ମଚାରୀ ମାଣିକପଥର ଆମ୍ବ ବଗିଚା ପାଖରେ ଥିବା ଆରତୀ ବନଫୁଲ ଢାବା ନିକଟରେ ସୁରେଶ ରାଜହଂସକୁ ଅଟକାଇ ତଲାସି କରିଥିଲେ। ତଲାସି ସମୟରେ ସୁରେଶ ବ୍ୟାଗରେ ଗଞ୍ଜେଇ ଥିବା ପୋଲିସ ଦେଖିଥିଲା। ଖବର ପାଇ ଆଠମଲ୍ଲିକ ତହସିଲଦାର ପ୍ରସନ୍ନ ଟେଟେ ମାଜିଷ୍ଟ୍ରେଟ ରୂପେ ଘଟଣା ସ୍ଥଳରେ ପହଞ୍ଚି ତଲାସୀ କରିଥିଲେ।ମାଜିଷ୍ଟ୍ରେଟଙ୍କ ଉପସ୍ଥିତିରେ ଗଞ୍ଜେଇର ପରିମାଣ ଓଜନ କରାଯାଇ ଜବତ୍ କରାଯାଇଥିଲା। ଆଠମଲ୍ଲିକ ଥାନା ପକ୍ଷରୁ ମାମଲା ରୁଜୁ କରାଯାଇ ସୁରେଶ ରାଜହଂସଙ୍କୁ କୋର୍ଟ ଚାଲାଣ କରାଯାଇଛି।
