ନୂଆଦିଲ୍ଲୀ, ୨୧।୩: ଦକ୍ଷିଣ କୋରିଆର ମଧ୍ୟଭାଗରେ ଥିବା ଦେଜେଓନ୍ ସହରର ଏକ ଅଟୋ ପାର୍ଟସ୍ ଫ୍ୟାକ୍ଟ୍ରିରେ ଭୟଙ୍କର ଅଗ୍ନିକାଣ୍ଡ ଘଟିଛି । ଶୁକ୍ରବାର ଘଟିଥିବା ଭୟଙ୍କର ବିସ୍ଫୋରଣ ଓ ଅଗ୍ନିକାଣ୍ଡରେ ପାଖାପାଖି ୧୦ ଜଣଙ୍କର ମୃତ୍ୟୁ ଘଟିଛି । ଶନିବାର ଦିନ ଉଦ୍ଧାରକାରୀ ଦଳ ଜଳିଯାଇଥିବା ମାଂସପିଣ୍ଡୁଳା ଓ ଭଙ୍ଗା ମାଟିତଳୁ ମୃତଦେହଗୁଡ଼ିକୁ ଉଦ୍ଧାର କରିଛନ୍ତି । ଏହି ଦୁର୍ଘଟଣାରେ ଅନ୍ୟ ୫୯ ଜଣ ଆହତ ହୋଇଥିବା ବେଳେ ଏବେ ମଧ୍ୟ ୪ ଜଣ ଶ୍ରମିକ ନିଖୋଜ ଅଛନ୍ତି । ଫାୟାର ଚିଫ୍ ନାମ ଡ୍ୟୁକ-ୱୁଙ୍କ ସୂଚନା ଅନୁଯାୟୀ, ଅଗ୍ନିକାଣ୍ଡ ଏତେ ଭୟଙ୍କର ଥିଲା ଯେ ପ୍ରଥମେ ଅଗ୍ନିଶମବାହିନୀ ଭିତରକୁ ପ୍ରବେଶ କରିପାରିନଥିଲେ । ପରବର୍ତ୍ତୀ ସମୟରେ ଖୋଜାଖୋଜି ବେଳେ ଜଣେ ଶ୍ରମିକଙ୍କ ମୃତଦେହ ଦ୍ୱିତୀୟ ମହଲାରୁ ମିଳିଥିବା ବେଳେ ଅନ୍ୟ ୯ ଜଣଙ୍କ ଶବ ତୃତୀୟ ମହଲାରେ ଥିବା ଏକ ଜିମ୍ ଭିତରୁ ମିଳିଛି । ମୃତକଙ୍କ ମଧ୍ୟରୁ କେବଳ ଜଣଙ୍କୁ ଚିହ୍ନଟ କରାଯାଇଛି, ଅନ୍ୟମାନଙ୍କ ପାଇଁ ଡିଏନ୍ଏ ଟେଷ୍ଟିଂ କରାଯାଉଛି ।
ଏହା ବି ପଢ଼ନ୍ତୁ... AI ନିୟନ୍ତ୍ରଣ ପାଇଁ ଟ୍ରମ୍ପଙ୍କ ‘ମାଷ୍ଟରପ୍ଲାନ’ ! ହ୍ୱାଇଟ ହାଉସର ନୂଆ ଫ୍ରେମୱାର୍କ; ଅଭିଭାବକଙ୍କ ହାତରେ ରହିବ ପିଲାଙ୍କ ଡିଜିଟାଲ୍ ସୁରକ୍ଷା
୨୫ ଜଣଙ୍କ ଅବସ୍ଥା ସଙ୍କଟାପନ୍ନ:
ଦକ୍ଷିଣ କୋରିଆ ଗୃହ ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ଆହତ ୫୯ ଜଣଙ୍କ ମଧ୍ୟରୁ ୨୫ ଜଣଙ୍କ ଅବସ୍ଥା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ରହିଛି । ସେମାନଙ୍କ ମଧ୍ୟରୁ କେତେକ ପ୍ରାଣ ହରାଇବାର ଆଶଙ୍କା ମଧ୍ୟ ରହିଛି । ଅନେକ ଶ୍ରମିକ ନିଆଁ କବଳରୁ ବଞ୍ଚିବା ପାଇଁ ଝରକା ଦେଇ ତଳକୁ ଡେଇଁପଡ଼ିବାରୁ ସେମାନଙ୍କ ହାଡ଼ ଭାଙ୍ଗିଯାଇଥିବା ବେଳେ ଅନ୍ୟମାନେ ଧୂଆଁ ଯୋଗୁଁ ଅଣନିଶ୍ୱାସୀ ହୋଇପଡ଼ିଛନ୍ତି । ଉଦ୍ଧାର କାର୍ଯ୍ୟ ସମୟରେ ଅଗ୍ନିଶମ ବାହିନୀ ସେହି ସ୍ଥାନରୁ ପ୍ରାୟ ୧୦୦ କିଲୋଗ୍ରାମରୁ ଅଧିକ ଅତ୍ୟଧିକ ପ୍ରତିକ୍ରିୟାଶୀଳ ବିସ୍ଫୋରକ କେମିକାଲ୍ ଉଦ୍ଧାର କରିଛନ୍ତି । ଯଦି ଏହି କେମିକାଲ୍ ସଂସ୍ପର୍ଶରେ ନିଆଁ ଆସିଥାନ୍ତା, ତେବେ ପୁରା ଅଞ୍ଚଳ ଛାରଖାର ହୋଇଯାଇଥାନ୍ତା । ଅଗ୍ନିଶମ ବାହିନୀ ଅନମ୍ୟାନ୍ଡ ରୋବଟ୍ସ ସାହାଯ୍ୟରେ ନିଆଁକୁ ଆୟତ୍ତ କରିବା ସହ ବିସ୍ଫୋରକଗୁଡ଼ିକୁ ସୁରକ୍ଷିତ ଭାବେ ଅଲଗା କରିଛନ୍ତି ।
ରାଷ୍ଟ୍ରପତିଙ୍କ ନିର୍ଦ୍ଦେଶ ଓ ତଦନ୍ତ:
ଦକ୍ଷିଣ କୋରିଆ ରାଷ୍ଟ୍ରପତି ଲି ଜେ ମ୍ୟୁଙ୍ଗ ଏହି ଘଟଣାରେ ଗଭୀର ଶୋକ ପ୍ରକାଶ କରିବା ସହ ଉଦ୍ଧାର କାର୍ଯ୍ୟରେ ସମସ୍ତ ସମ୍ବଳ ବିନିଯୋଗ କରିବାକୁ ନିର୍ଦ୍ଦେଶ ଦେଇଛନ୍ତି । ପ୍ରାୟ ୫୦୦ରୁ ଅଧିକ ଅଗ୍ନିଶମ କର୍ମଚାରୀ ଏବଂ ୧୨୦ଟି ଅତ୍ୟାଧୁନିକ ଗାଡ଼ି ଏହି ଅପରେସନରେ ସାମିଲ ହୋଇଛନ୍ତି । ନିଖୋଜ ଥିବା ୪ ଜଣ ଶ୍ରମିକ ବର୍ତ୍ତମାନ ଭୁଶୁଡ଼ି ପଡ଼ିଥିବା ମଲବା ତଳେ ଚାପି ହୋଇ ରହିଥିବା ସନ୍ଦେହ କରାଯାଉଛି ।
