ଖୁଣ୍ଟା,୦୫/୦୮: ମୟୂରଭଞ୍ଜ ଜିଲ୍ଲା ଖୁଣ୍ଟା ଥାନା ଅଞ୍ଚଳରେ ଏକ ଅଭାବନୀୟ ଘଟଣା ଘଟିଥିବା ଦେଖିବାକୁ ମିଳିଛି। ଜୈନୈକା ୧୦ ବର୍ଷର ନାବାଳିକା ଘରେ ଶୋଇଥିବା ବେଳେ ତିନିଜଣ ଯୁବକ ଟେକିନେଇ ବଳପୂର୍ବକ ଗଣଦୁଷ୍କର୍ମ କରିଥିବା ନେଇ ନାବାଳିକାର ମା' ଖୁଣ୍ଟା ଥାନାରେ ଲିଖିତ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତିକରି ଖୁଣ୍ଟା ପୋଲିସ ଜଣେ ନାବାଳକ ସମେତ ୩ ଜଣକୁ ଏହି ଘଟଣାରେ ଅଟକ ରଖି ତଦନ୍ତ ଜାରି ରଖିଛି।
ସୁଚନା ଥାଉ କି, ଗତ ଜୁଲାଇ ୨୪ ତାରିଖ ଦିନ ଏହି ଘଟଣା ଘଟିଥିବା ବେଳେ ଝିଅର ପରିବାର ଲୋକ ତା ପରଦିନ ଗୁରୁତର ଅବସ୍ଥାରେ ଝିଅକୁ ପିଆରଏମ୍ ଡାକ୍ତରଖାନାରେ ଭର୍ତ୍ତି କରି ଚିକିତ୍ସା କରିଥିଲେ । ଚିକିତ୍ସାରେ ସୁଧାର ଆସିବା ପରେ ପିଡି଼ତା ଘରକୁ ଫେରିଥିଲେ। ପରେ ଏହି ଘଟଣା ବାବଦରେ ପିଡ଼ିତା ଘର ଲୋକଙ୍କୁ ସବୁକଥା ଖୋଲି କହିଥିଲେ। ଏନେଇ ଗାଁ ରେ ଏକ ବୈଠକ ହୋଇଥିଲା। ଏବଂ ଏହି ବୈଠକରେ ସମ୍ପୃକ୍ତ ଜଣେ ନାବାଳକ ସମେତ ୨ ଜଣ ଯୁବକକୁ ଡ଼ାକି ସଭା ମଝିରେ ପଚରାଉଚରା କରାଯାଇଥିଲା। ହେଲେ ଯୁବକ ମାନେ ଏହି କଥାକୁ ଖଣ୍ଡନ କରିବା ସହ ଏହି ଘଟଣା ସହ ସେମାନଙ୍କର କୌଣସି ସମ୍ପର୍କ ନଥିବା କହିଥିଲେ।
ଶେଷରେ ପରିବାର ଲୋକ ଗାଁ ବୈଠକରେ ନିରାଶ ହେବା ପରେ ବାଧ୍ୟ ହୋଇ ଖୁଣ୍ଟା ଥାନାରେ ଦ୍ୱାରସ୍ଥ ହେବା ସହ ଲିଖିତ ଅଭିଯୋଗ କରିଥିଲେ। ତେବେ ଏହି ଘଟଣାରେ ଖୁଣ୍ଟା ପୋଲିସ ତିନିଜଣ ଯୁବକଙ୍କ ନାଁରେ ତିନୋଟି ମାମଲା ରୁଜୁ କରି ଅଧିକ ତଦନ୍ତ ଜାରି ରଖିଛି। ରିପୋର୍ଟ ଲେଖା ହେବା ଯାଏଁ ସେମାନଙ୍କୁ କୋର୍ଟ ଚାଲାଣ କରାଯାଇନଥିବା ଜଣାପଡିଛି।
