ସିଂଘିଯୁବା, ୬।୫: ସୁବର୍ଣ୍ଣପୁର ଡୁଙ୍ଗୁରିପାଲି ବ୍ଲକ ରାମପୁରରେ ଅଦିନିଆ ବର୍ଷା କ୍ଷୟକ୍ଷତି ଦାବିରେ କୃଷକ ସଂଗଠନ ଆନ୍ଦୋଳନ କରିଥିବା ଜଣାପଡ଼ିଛି । ରାମପୁରଠାରେ ବିନିକା ଡୁଙ୍ଗୁରିପାଲି ରାସ୍ତା ଅବରୋଧ କରିଛନ୍ତି । ଗତ କିଛିଦିନ ତଳେ ଲଘୁଚାପ ପାଇଁ ଅଦିନିଆ ବର୍ଷାରେ ଚାଷୀର ସୁନାର ଫସଲ ଉଜୁଡ଼ି ଯାଇଛି । ଅମଳ ଥିବାକୁ ଅଳ୍ପ ଦିନ ବାକି ଥିବା ବେଳେ ଅଦିନିଆ ବର୍ଷା ଚାଷୀ ପାଇଁ କାଳ ସାଜିଛି । ବର୍ଷା ଫଳରେ ଚାଷୀ ଅମଳ ସରିଥିବା ଧାନ ଭିଜି ଯାଇଥିବା ବେଳେ କ୍ଷେତରେ ଥିବା ଧାନ ମଧ୍ୟ କ୍ଷତିଗ୍ରସ୍ତ ହୋଇଛି । କ୍ଷତିଗ୍ରସ୍ତ ଧାନକୁ କୌଣସି ମିଲ୍ ନେବାକୁ ନାରାଜ । କୌଣସି ବିମା କମ୍ପାନୀ ମଧ୍ୟ କ୍ଷେତ୍ର ପରିଦର୍ଶନ କରିବାକୁ ଆସୁନଥିବାରୁ ଶୁକ୍ରବାର ରାମପୁର କୃଷକ ସଂଗଠନ ପକ୍ଷରୁ ୧୨ ଘଣ୍ଟିଆ ବନ୍ଦ ପାଳନ କରାଯାଇଛି ।
