କାଇରୋ: ଲିବୀୟାର ପୂର୍ବ ଉପକୂଳ ନିକଟରେ ଶୁକ୍ରବାର ସକାଳ ସମୟରେ ଏକ ନୌକା ଓଲଟି ପଡ଼ିବା ଫଳରେ ଅତି କମରେ ୧୫ ଜଣ ଇଜିପ୍ଟୀୟଙ୍କ ମୃତ୍ୟୁ ହୋଇଛି। ଏହି ନୌକାଟି ଇଉରୋପ ଅଭିମୁଖେ ଯାଉଥିଲା ବୋଲି ଲିବୀୟା ଅଧିକାରୀମାନେ ସୂଚନା ଦେଇଛନ୍ତି। ଘଟଣାଟି ଟୋବ୍ରୁକ ସହର ନିକଟରେ ପ୍ରାୟ ଭୋର ୨ଟା ସମୟରେ ଘଟିଥିଲା ବୋଲି ଟୋବ୍ରୁକର ଜେନେରାଲ ଆଡମିନିଷ୍ଟ୍ରେସନ ଅଫ ଦି କୋଷ୍ଟ ଗାର୍ଡର ମୁଖପାତ୍ର ମାରୱାନ ଅଲ-ଶାଏରୀ କହିଛନ୍ତି।
ଅଲ-ଶାଏରୀଙ୍କ ଦେଇଥିବା ସୂଚନା ଅନୁସାରେ, ମୃତକମାନେ ସମସ୍ତେ ଇଜିପ୍ଟୀୟ ନାଗରିକ ଥିଲେ। ଉଦ୍ଧାର ଟିମ୍ ଦୁଇଜଣ ସୁଦାନୀ କ୍ରୁ ସଦସ୍ୟଙ୍କୁ ଉଦ୍ଧାର କରିଥିବା ବେଳେ ଜଣେ ଅନ୍ୟ କ୍ରୁ ସଦସ୍ୟ ନିଖୋଜ ରହିଛନ୍ତି। ସମୁଦ୍ରରେ ଯାତ୍ରା ପାଇଁ ପାଗ ଅନୁପଯୋଗୀ ଥିବା ସୂଚନା ଦେଇଛନ୍ତି ଅଲ-ଶାଏରୀ। କିନ୍ତୁ ନୌକା ଓଲଟିବାର ସ୍ପଷ୍ଟ କାରଣ ଏଯାଏଁ ଜଣାପଡ଼ି ପାରିନାହିଁ। କେତେ ଲୋକ ଏବେ ବି ନିଖୋଜ ରହିଛନ୍ତି ତାହା ମଧ୍ୟ ଅସ୍ପଷ୍ଟ ରହିଛି।
ସମୁଦ୍ରରେ ଯାଆସ କରୁଥିବା ନୌକା ଗୁଡିକ ଉପରେ ନଜର ରଖୁଥିବା ସ୍ଥାନୀୟ ସହାୟତା ଗୋଷ୍ଠୀ ଶୁକ୍ରବାର ଦିନ ଫେସବୁକରେ ପୋଷ୍ଟ କରି କହିଛନ୍ତି ଯେ ଏହି ଘଟଣାରେ ୧୦ ଜଣ ବଞ୍ଚିଥିବା ଜଣାପଡ଼ିଛି। ଲିବୀୟା ଆଫ୍ରିକା ଏବଂ ମଧ୍ୟପ୍ରାଚ୍ୟରୁ ଯୁଦ୍ଧ ଓ ଦାରିଦ୍ର୍ୟରୁ ପଳାୟନ କରୁଥିବା ଅବୌଧ ପ୍ରବାସୀଙ୍କ ପାଇଁ ଏକ ପ୍ରମୁଖ ଟ୍ରାନଜିଟ ପଏଣ୍ଟ ଭାବେ ପରିଚିତ। ତେଣୁ ଏହି ନୌକାରେ ଅନେକ ଦେଶର ଲୋକ ସବାର ଥିଲେ ବୋଲି ଅନୁମାନ କରାଯାଉଛି।
ଏହି ଦୁର୍ଘଟଣା ମେଡିଟେରାନୀୟ ସମୁଦ୍ର ଅତିକ୍ରମ କରି ଇଉରୋପରେ ଉନ୍ନତ ଜୀବନ ଖୋଜୁଥିବା ଅବୌଧ ପ୍ରବାସୀଙ୍କ ପାଇଁ ଏହାର ବିପଦସଙ୍କୁଳ ଯାତ୍ରାକୁ ସାମ୍ନାକୁ ଆଣିଛି। ତେବେ ଉଦ୍ଧାର କାର୍ଯ୍ୟ ଜାରି ରହିଥିବା ଜଣାପଡିଛି।
