ନୂଆଦିଲ୍ଲୀ, ୩୦।୬: ଆମେରିକାର ଆଇଡାହୋ ରାଜ୍ୟ କୋୟୁର ଡି ଆଲେନରେ ରବିବାର ଏକ ବୁଦାରେ ନିଆଁ ଲାଗିଥିଲା । ନିଆଁ ଲିଭାଇବାକୁ ସେଠାକୁ ଆସିଥିବା ଅଗ୍ନିଶମ କର୍ମଚାରୀଙ୍କ ଉପରେ ଆକ୍ରମଣ ହୋଇଥିବା ଜଣାପଡ଼ିଛି । ଦୁଇଜଣଙ୍କ ଉପରେ ଅତର୍କିତ ଗୁଳିମାଡ଼ କରିଥିଲେ କେହି ଦୁର୍ବୃତ୍ତ । ଏହି ଆକ୍ରମଣରେ ଅନ୍ୟ ଅଗ୍ନିଶମ କର୍ମଚାରୀମାନେ ମଧ୍ୟ ଆହତ ହୋଇଥିବା ସୂଚନା । ଘଟଣାସ୍ଥଳରେ ଅନେକ ସମୟ ଧରି ଗୁଳିଚାଳନା ଜାରି ରହିଥିଲା । କୋଟନଇ କାଉଣ୍ଟିର ସେରିଫ୍ ରବର୍ଟ କହିଛନ୍ତି ଯେ, ଘଟଣାସ୍ଥଳରେ ଏବେ ବି ଅତି କମ୍ରେ ଜଣେ ସୁଟର୍ ଥାଇପାରନ୍ତି ଯିଏ ହାଇ ପାୱାର ରାଇଫଲ୍ରେ ପୋଲିସ ଉପରକୁ ଗୁଳିଚାଳନା କରୁଥିଲେ । ସେ କହିଛନ୍ତି, 'ଆମେ ଜାଣିନାହୁଁ ସେଠାରେ କେତେ ଜଣ ସୁଟର୍ ଅଛନ୍ତି କିନ୍ତୁ, ଚାରି ଦିଗରୁ ଗୁଳଚାଳନା ହେଉଥିବା ଆମ ଅଧିକାରୀମାନେ ରିପୋର୍ଟ ଦେଇଛନ୍ତି ।'
ସିଏନ୍ଏନ୍ ଅନୁଯାୟୀ, ଜଣେ ଅଗ୍ନିଶମ କର୍ମଚାରୀ ଅନୁମାନ କରିଛନ୍ତି ଯେ ଏହି ସ୍ଥାନରେ ଜାଣିଶୁଣି ନିଆଁ ଲଗାଯାଇଥିଲା । ଫଳରେ ଅଗ୍ନିଶମ କର୍ମଚାରୀମାନେ ସେଠାରେ ନିଆଁ ଲିଭାଇବାକୁ ପହଞ୍ଚିବା ମାତ୍ର ସେମାନଙ୍କ ଉପରେ ଗୁଳିମାଡ଼ ହୋଇଥିଲା । ଅଧ ଏକର ଜମିରେ ବ୍ୟାପିଥିବା ଏହି ନିଆଁ ଏବେ ବି ଜଳୁଛି ଏବଂ ପୋଲିସ ସୁଟର୍ଙ୍କୁ ଆୟତ୍ତରେ ଆଣିବାକୁ ଚେଷ୍ଟା ଜାରି ରଖିଛନ୍ତି । ଏହି ଗୁଳିକାଣ୍ଡରେ କେତେ ଜଣ ଆହତ ହୋଇଛନ୍ତି ତାହା ବର୍ତ୍ତମାନ ପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ସେରିଫ୍ ନୋରିସ୍ ଅନୁଯାୟୀ, ଗୁଳି ଚଳାଉଥିବା ସୁଟର୍ମାନେ ଆତ୍ମସମର୍ପଣ କରିବାର କୌଣସି ସଙ୍କେତ ଦେଖାଉନାହାନ୍ତି । ତେଣୁ ଆଗକୁ ଏହି ଅପରେସନ୍ କିଛି ଦିନ ଧରି ଜାରି ରହିପାରେ ।
