ଆଠମଲ୍ଲିକ,୦୩/୦୧: ବିଳମ୍ବିତ ରାତିରେ ଭାଇ ଭଉଣୀଙ୍କୁ ଗୁଳିମାଡ଼। ଘରେ ଶୋଇଥିବା ସମୟରେ ଭାଇ ଭଉଣୀଙ୍କୁ ଗୁଳି କରିଛନ୍ତି ଦୁର୍ବୃତ୍ତ । ଅନୁଗୋଳ ଜିଲ୍ଲା କିଶୋରନଗର ଥାନା ଭାଙ୍ଗମୁଣ୍ଡା ଗାଁରେ ଏହି ଗୁଳିକାଣ୍ଡ ଘଟିଛି। ତେବେ ଗୁଳିକାଣ୍ଡର ଶିକାର ହୋଇଛନ୍ତି ଭାଙ୍ଗମୁଣ୍ଡା ଗ୍ରାମର ପ୍ରଫୁଲ୍ଲ ମିର୍ଦ୍ଧାଙ୍କ ୧୫ ବର୍ଷୀୟା ଝିଅ ଯାଜ୍ଞସେନୀ ଓ ୧୧ ବର୍ଷୀୟ ପୁଅ ପ୍ରକାଶ । ତେବେ ଉଭୟଙ୍କ ଅବସ୍ଥା ସଂକଟାପନ୍ନ ଥିବା ବେଳେ ମେଡିକାଲରେ ସେମାନଙ୍କ ଚିକିତ୍ସା ଜାରି ରହିଛି।
ସୂଚନା ମୁତାବକ, ଗତକାଲି ବିଳମ୍ବିତ ରାତିରେ ପରିବାର ଲୋକଙ୍କ ଉଭୟ ଭାଇ-ଭଉଣୀ ଖାଇପିଇ ଗୋଟିଏ ରୁମ୍ରେ ଶୋଇଥିଲେ । ଆଉ ସେହି ସମୟରେ ଗୁଳି ଶବ୍ଦ ଶୁଣି ଉଠି ପଡିଥିଲେ ପରିବାର ଲୋକ । ରକ୍ତ ଜୁଡୁବୁଡୁ ହୋଇ ତଳେ ପଡିଥିଲେ ଭାଇ ଭଉଣୀ । ଉଭୟଙ୍କୁ ଗୁରୁତର ଅବସ୍ଥାରେ ବୁର୍ଲା ମେଡିକାଲରେ ଭର୍ତ୍ତି କରାଯାଇଥିଲା । ତେବେ ଝିଅ ଯାଜ୍ଞସେନୀଙ୍କ ଅବସ୍ଥା ସଂକଟାପନ୍ନ ହେବାରୁ ତାଙ୍କୁ କଟକ ଏସ୍ସିବି ମେଡିକାଲକୁ ସ୍ଥାନାନ୍ତର କରାଯାଇଛି । ତେବେ କୁନି କୁନି ଭାଇ ଭଉଣୀଙ୍କ ଉପରେ କାହିଁକି ଗୁଳିମାଡ଼ ହୋଇଛି ଓ ଗୁଳିକାଣ୍ଡ କିଏ କରିଛି ଜଣାପଡିନି । ଗୁଳିମାଡ କରିଥିବା ଦୁର୍ବୃତ୍ତଙ୍କ କୌଣସି ପତ୍ତା ମିଳିନି । କିଶୋରନଗର ଥାନା ପୋଲିସ ଘଟଣାର ତଦନ୍ତ ଜାରି ରଖିଛି।
