ରାଉରକେଲା, ୩୦।୬: ସୁନ୍ଦରଗଡ଼ ଜିଲ୍ଲା ବଣାଇ ଥାନା ଅନ୍ତର୍ଗତ କଟୁରୀଧୁଆ ଓ ନରେନ୍ଦ୍ର ଅଞ୍ଚଳରେ ଦୁଖଃଦ ଘଟଣା । ସାପ କାମୁଡ଼ାରେ ଦୁଇ ଜଣଙ୍କ ମୃତ୍ୟୁ ଘଟିଥିବା ଜଣାପଡ଼ିଛି । ସୂଚନା ମୁତାବକ, କଟୁରୀଧୁଆ ଗ୍ରାମର ନାବାଳିକା ରଶ୍ମି ଓରାମ୍ ଘରେ ଶୋଇଥିଲେ । ଶୋଇଥିବା ସମୟରେ ତାଙ୍କୁ ସାପ କାମୁଡ଼ିଥିଲା । ଏହା ଜାଣିବା ପରେ ପରିବାର ଲୋକେ ତାଙ୍କୁ ତୁରନ୍ତ ଚିକିତ୍ସା ଲାଗି ବଣାଇ ଡାକ୍ତରଖାନା ନେଇଥିଲେ । କିନ୍ତୁ, ସେଠାରେ ଡକ୍ଟର ତାଙ୍କୁ ମୃତ ଘୋଷଣା କରିଥିଲେ ।
ସେହିପରି ନରେନ୍ଦ୍ର ଗ୍ରାମର ଅଜିତ୍ ଓରାମ ରବିବାର ରାତିରେ ଘରୁ ବାହାରକୁ ବାହାରିଥିବା ବେଳେ ତାଙ୍କୁ ସାପ କାମୁଡ଼ି ଦେଇଥିଲା । ଚିକିତ୍ସା ଲାଗି ତାଙ୍କୁ ବଣାଇ ଡାକ୍ତରଖାନାକୁ ଅଣାଯାଇଥିଲା । ହେଲେ ଡକ୍ଟର ତାଙ୍କୁ ମୃତ ଘୋଷଣା କରିଥିଲେ । ବର୍ତ୍ତମାନ ବର୍ଷା ଋତୁରେ ସାପ କାମୁଡ଼ାରେ ଅନେକଙ୍କ ମୃତ୍ୟୁ ହୋଇଥିବା ଖବର ଆସୁଛି । ତେଣୁ ଘରେ ହେଉ କିମ୍ୱା ବାହାରକୁ ଯିବାବେଳେ ସତର୍କ ଏବଂ ସାବଧାନ ରହିବାକୁ ଜିଲ୍ଲା ପ୍ରଶାସନ ପରାମର୍ଶ ଦେଇଛନ୍ତି ।
