ବ୍ରହ୍ମପୁର/ବେଗୁନିଆପଡ଼ା/ ଛତ୍ରପୁର,୦୨/୭: ଅଶାନ୍ତ ହେଉଛି ଗଞ୍ଜାମ ଜିଲ୍ଲା । କଥା କଥାରେ ଗଡ଼ୁଛି ମୁଣ୍ଡ । ମଙ୍ଗଳବାର ଗୋଟିଏ ଦିନରେ ପୃଥକ ସ୍ଥାନରେ ୩ ହତ୍ୟାକାଣ୍ଡ ଘଟିଛି । ଗତ ମାସରେ ଜିଲ୍ଲାରେ ୧୩ଟି ହତ୍ୟାକାଣ୍ଡ ଘଟିଥିଲା ।
ବ୍ରହ୍ମପୁରର ନୂଆବସ୍ଷ୍ଟାଣ୍ଡ ପୁଷ୍ପାଞ୍ଜଳି ଲଜ୍ରେ ଯୁବତୀଙ୍କୁ ଛୁରି ଭୁସି ହତ୍ୟା କରିଛି ପ୍ରେମିକ । ମୃତକ ହେଲେ ପ୍ରିୟା କୁମାରୀ ମହାରଣା (୨୪) । ହତ୍ୟା ପରେ ତାଙ୍କ ପୁରୁଷ ବନ୍ଧୁ ଅଭିଯୁକ୍ତ ଅଭୟ କୁମାର ମହାରଣା(୨୪) ଥାନାରେ ଆତ୍ମସମର୍ପଣ କରିଛନ୍ତି । ପ୍ରିୟାଙ୍କ ଘର ଲାଞ୍ଜିପଲ୍ଲୀ ଖଳା ସାହିରେ ଓ ଅଭୟଙ୍କ ଘର ଲାଞ୍ଜିପଲ୍ଲୀ ପାଢ଼ି କଲୋନିରେ । ପ୍ରିୟା ଜଣେ ଲାବ୍ ଟେକ୍ନିସିଆନ୍ ବୋଲି ଜଣାପଡ଼ିଛି । ମଙ୍ଗଳବାର ସେ ଛୁଟିରେ ଥିଲେ । ପୂର୍ବାହ୍ନରେ ଅଭୟ ଓ ପ୍ରିୟା ଲଜ୍କୁ ଯାଇ ୧୧୨ ନମ୍ବର ରୁମ୍ରେ ରହିଥିଲେ । ଉଭୟଙ୍କ ଭିତରେ କୌଣସି କାରଣରୁ ଝଗଡ଼ା ହୋଇଥିଲା । ଏଥିରେ ଉତ୍ତ୍ୟକ୍ତ ହୋଇ ଅଭୟ ପ୍ରିୟାଙ୍କୁ ଛୁରି ଭୁସି ଦେଇଥିଲେ । ପରେ ସେ ଗୋସାଇଁନୂଆଗାଁ ଥାନାକୁ ଯାଇ ଆତ୍ମସମର୍ପଣ କରି ସମସ୍ତ ଘଟଣା କହିଥିଲେ । ପୁଲିସ ଟିମ୍ ସନ୍ଧ୍ୟା ପ୍ରାୟ ୫ଟାରେ ଲଜ୍ରେ ପହଞ୍ଚି କର୍ମଚାରୀମାନଙ୍କୁ ପଚରାଉଚରା କରିଥିଲା । ସେତେବେଳେ ପର୍ଯ୍ୟନ୍ତ କର୍ମଚାରୀମାନେ କିଛି ଜାଣିନଥିଲେ । ପୁଲିସ କହିବା ପରେ ଲଜ୍ କର୍ମଚାରୀ ୧୧୨ ନମ୍ବର ରୁମ୍ ଖୋଲିବା ବେଳେ ରକ୍ତାକ୍ତ ଅବସ୍ଥାରେ ପଡ଼ିଥିଲେ ପ୍ରିୟା । ତାଙ୍କୁ ଗୁରୁତର ଅବସ୍ଥାରେ ବ୍ରହ୍ମପୁର ବଡ଼ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ଅନ୍ୟପଟେ ଗଞ୍ଜାମ ପୁଲିସ ଜିଲ୍ଲା ଅନ୍ତର୍ଗତ ଛତ୍ରପୁର ଥାନା ଗୋବା ଗାଁର ତୋଫାନ ସ୍ୱାଇଁ(୨୫) ଙ୍କୁ ଗୋଡ଼ାଇ ଗୋଡ଼ାଇ ହାଣିଛନ୍ତି ଦୁର୍ବୃତ୍ତ । ସଂଘବଦ୍ଧ ଆକ୍ରମଣରେ ତାଙ୍କର ମୃତ୍ୟୁ ହୋଇଛି । ଅନ୍ୟପଟେ ବେଗୁନିଆପଡ଼ା ଥାନା କେ.ବରିଡ଼ା ପଞ୍ଚାୟତ ବି.ନୂଆପଲ୍ଲୀ ଗାଁର ନିରାକାର ଦାସ (୩୫)ଙ୍କୁ ହତ୍ୟା କରାଯାଇଛି । ପୂର୍ବଶତ୍ରତାରୁ ତାଙ୍କ ଉପରେ ଆକ୍ରମଣ ହୋଇଥିବା ସୂଚନା ମିଳିଛି । ମାସ ଆରମ୍ଭରୁ ୩ ଜଣଙ୍କ ମୁଣ୍ଡ ଗଡ଼ିବା ଜିଲ୍ଲାରେ ବିପର୍ଯ୍ୟସ୍ତ ଆଇନଶୃଙ୍ଖଳାକୁ ସୂଚିତ କରୁଛି ।
