ପାଟଣାଗଡ଼,୧୧/୦୧: ବେଆଇନ ଭାବେ ଶ୍ରମିକ ଚାଲାଣ ହେଉଥିବା ବେଳେ ମାଡ଼ି ବସିଲା ପାଟଣାଗଡ ପୋଲିସ । ଉଲବା ଗାଁ ନିକଟରେ ଚଢାଉ କରି ୨୫ ଜଣ ଶ୍ରମିକଙ୍କୁ ଉଦ୍ଧାର କରାଯାଇଛି । ସେମାନଙ୍କ ମଧ୍ୟରୁ ୭ ଜଣ ଶିଶୁ ଥିବା ବେଳେ ୧୮ ଜଣ ମହିଳା ଓ ପୁରୁଷ ରହିଥିବା ବେଳେ ଜଣେ ଦଲାଲକୁ ଅଟକ ରଖା ଯାଇଛି । ଉଦ୍ଧାର ହୋଇଥିବା ଶ୍ରମିକ ମାନେ ହେଲେ ବେଲପଡା ବ୍ଲକ ତେତେଲ ମୁଣ୍ଡାର ଗାଁର ବୋଲି ଜଣାପଡିଛି । ବଲାଙ୍ଗୀର ଜିଲ୍ଲାରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ବଲାଙ୍ଗୀର ଜିଲ୍ଲାରୁ ପ୍ରତିବର୍ଷ ହଜାର ହଜାର ଶ୍ରମିକ ମାନେ ନିଜ ପେଟ ପାଟଣା ପାଇଁ ବାହାର ରାଜ୍ୟକୁ ଛଅ ମାସ ପାଇଁ ଦାଦନ ଖଟିବାକୁ ଯାଇଥାନ୍ତି । ତେବେ ଶୁକ୍ରବାର ରାତିରେ ବେଆଇନ ଭାବେ ଶ୍ରମିକ ମାନଙ୍କୁ ବେଙ୍ଗାଲୁରୁ ଚାଲାଣ କରାଯାଉଥିବା ନେଇ ପୋଲିସ ଖବର ପାଇଥିଲା । ଖବର ପାଇ ପାଟଣାଗଡ ପୋଲିସ ଉଲବା ଗାଁ ନିକଟରେ ଚଢାଉ କରିଥିଲା । ସେଠାରେ ଚଢାଉ କରି ୨୫ ଜଣ ଶ୍ରମିକଙ୍କୁ ଉଦ୍ଧାର କରିଛି ପୋଲିସ । ସେମାନଙ୍କ ମଧ୍ୟରୁ ୭ ଜଣ ଶିଶୁ ଥିବା ବେଳେ ୧୮ ଜଣ ମହିଳା ଓ ପୁରୁଷ ରହିଥିବା ଜଣାପଡ଼ିଛି । ସମସ୍ତ ଶ୍ରମିକଙ୍କୁ ପୋଲିସ ନିଜ ନିଜ ଗାଁକୁ ପଠାଇ ଦେଇଥିବା ବେଳେ ଦଲାଲ ବିରୁଦ୍ଧରେ ଥାନାରେ ଏକ ମାମଲା ରୁଜୁ କରି ଅଧିକ ତଦନ୍ତ ଜାରି ରଖିଛି ।
