ମାଲକାନଗିରି, ୨୦/୩(ଆପ୍ର ) : ମୃତଦେହଧରି ଆମ୍ବୁଲାନ୍ସରେ ଘରକୁ ଫେରୁଥିବା ସମୟରେ ଟ୍ରକ ସହିତ ଧକ୍କାଲାଗି ୪ଜଣ ଆହତ ହୋଇଛନ୍ତି। ଏପରି ଘଟଣା ମାଲକାନଗିରି ଜିଲ୍ଲା ଟାଉନଥାନା ଅଧିନସ୍ଥ ଜୟପୁର ମାଲକାନଗିରି ୩୨୬ ନମ୍ବର ଜାତୀୟ ରାଜପଥ ସିନ୍ଦ୍ରିମାଲ ଗ୍ରାମ ନିକଟରେ ଗୁରୁବାର ଘଟିଚି । ଏଥିରେ ୪ଜଣ ଆହତ ହୋଇଛନ୍ତି।
ଜୟପୁର ଠାରୁ ମାଲକାନଗିରି ଅଭିମୁଖେ ମୃତଦେହ ନେଇ ଏକ ଆମ୍ବୁଲାନ୍ସ ଆସୁଥିଲା। ଏହି ସମୟରେ ଜୟପୁର ଅଭିମୁଖେ ଯାଉଥିବା ଏକ ଟ୍ରକ ମଧ୍ୟରେ ଧକ୍କା ହୋଇଥିଲା। ଯେଉଁଥିରେ ଆମ୍ବୁଲାନ୍ସ ଭିତରେ ମୃତଦେହ ସହିତ ବସିଥିବା ଗୋଟିଏ ପରିବାରର ୩ ଜଣ ଏବଂ ଆମ୍ବୁଲାନ୍ସ ଡ଼୍ରାଇଭର ଆହତ ହୋଇଛନ୍ତି। ମାଲକାନଗିରି ପୋଲିସ ଖବର ପାଇ ଘଟଣା ସ୍ଥଳରେ ପହଁଞ୍ଚି ସମସ୍ତ ଆହତଙ୍କୁ ମାଲକାନଗିରି ଚିକିତ୍ସାଳୟକୁ ଭର୍ତ୍ତି କରିବା ସହିତ ଟ୍ରକକୁ ଅଟକ ରଖିଛି। ତେବେ ଘଟଣାସ୍ଥଳରୁ ଟ୍ରକ ଡ୍ରାଇଭର ଫେରାର ହୋଇଯାଇ ଥିବାର ଜଣାପଡ଼ିଛି।
ସୂଚନା ମୁତାବକ ମାଲକାନଗିରି ଜିଲ୍ଲା ସଦରମହକୁମା ନିକଟସ୍ଥ ଏମଭି ୪୩ ଗ୍ରାମର ଶାନ୍ତି ମଣ୍ଡଳ କୌଣସି କାରଣରୁ ସ୍ୱାସ୍ଥ୍ୟବସ୍ଥା ଗୁରୁତର ଥିବାରୁ ବ୍ରହ୍ମପୁର ବଡ଼ ମେଡ଼ିକାଲକୁ ପରିବାର ଲୋକେ ଚିକିତ୍ସା ପାଇଁ ନେଇଥିଲେ । ଶାନ୍ତି ମଣ୍ଡଳଙ୍କ ସହିତ ତାଙ୍କର ସ୍ତ୍ରୀ ଛବି ମଣ୍ଡଳ ଏବଂ ଦୁଇ ପୁଅ ବାପାଙ୍କ ର ଚିକିତ୍ସା ପାଇଁ ଯାଇଥିଲେ। ତେବେ ବ୍ରହ୍ମପୁର ମେଡିକାଲରେ ବାପାଙ୍କ ମୃତ୍ୟୁ ଘଟିଥିଲା। ମୃତଦେହ ନେଇ ଘରକୁ ଫେରିବା ସମୟରେ ମାଲକାନଗିରି ନିକଟସ୍ଥ ସିନ୍ଦ୍ରିମାଲ ଠାରେ ଦୁର୍ଘଟଣାରେ ଆହତ ହୋଇଛନ୍ତି।
