ଭୁବନେଶ୍ୱର,୨୬/୦୩ : ରାଜ୍ୟରେ ୪୦% ସ୍ତ୍ରୀ ରୋଗ ଓ ପ୍ରସୂତି ବିଭାଗ ଡାକ୍ତର ପଦବିରେ ବିଶେଷଜ୍ଞ ନାହାନ୍ତି । ୫୮୪ ମଞ୍ଜୁରିପ୍ରାପ୍ତ ପଦବି ମଧ୍ୟରେ ୩୫୧ ଜଣ ବିଶେଷଜ୍ଞ ରହିଥିଲା ବେଳେ ୨୩୩ ଖାଲି ପଡ଼ିଛି । ଫଳରେ ଉପଯୁକ୍ତ ଚିକିତ୍ସା ନପାଇ ମହିଳା ଛଟପଟ ହେଉଛନ୍ତି । ସ୍ତ୍ରୀ ରୋଗ ଓ ପ୍ରସୂତି ଜନିତ ସମସ୍ୟା ହେଲେ କେଉଁ ସ୍ତ୍ରୀ ରୋଗ ବିଶେଷଜ୍ଞଙ୍କ ପାଖକୁ ଯିବେ ବୋଲି ବାଉଳା ହେଉଛନ୍ତି । ଫଳରେ ବିଚିତ୍ର ପରିସ୍ଥିତି ସୃଷ୍ଟି ହୋଇଛି ।
ନୟାଗଡ଼ ଜିଲ୍ଲାରେ କିଶୋରୀ ଓ ମହିଳାଙ୍କ ରୋଗ ଯନ୍ତ୍ରଣାରେ କଲବଲ । ଜିଲ୍ଲାରେ ଜଣେ ହେଲେ ବିଶେଷଜ୍ଞଙ୍କୁ ନିଯୁକ୍ତି କରିପାରିନାହାନ୍ତି ରାଜ୍ୟ ସରକାର । ଜିଲ୍ଲାରେ ୧୬ ମଞ୍ଜୁରିପ୍ରାପ୍ତ ପଦବିରେ ଶୂନ୍ୟ ପଡ଼ିଛି ବିଶେଷଜ୍ଞଙ୍କ ସଂଖ୍ୟା । ରାୟଗଡ଼ାରେ ସେହି ସମାନ ସ୍ଥିତି । ସେଠାରେ ୧୮ ପଦବିରେ ୧୩ ଜଣ ବିଶେଷଜ୍ଞ ନାହାନ୍ତି । ମାଲକାନଗିରି ଜିଲ୍ଲାରେ ୧୫ରୁ ୧୦ ପଦବି ଖାଲି ପଡ଼ିଛି । କନ୍ଧମାଳରେ ୨୧ ପଦବିରେ ୧୪ ବିଶେଷଜ୍ଞ ପଦ ଶୂନ୍ୟ । କେନ୍ଦୁଝରରେ ୨୪ ସ୍ଥାନରେ ଅଛନ୍ତି ୧୫ ଡାକ୍ତର ଓ ଖାଲି ପଡ଼ିଛି ୧୧ ପଦବି । ନୂଆପଡ଼ାରେ ୧୨ରୁ ଖାଲିପଡ଼ିଛି ୭ ପଦବି । ବୌଦ୍ଧରେ ୧୦ରୁ ୭ ପଦବି ଫାଙ୍କା ରହିଛି । କୋରାପୁଟ୍ରେ ୨୧ରୁ ୯ ପଦବିରେ କେହିନାହାନ୍ତି ।
ମୟୂରଭଞ୍ଜ ଭଳି ବଡ଼ ଜିଲ୍ଲାରେ ୩୯ ବିଶେଷଜ୍ଞ ପଦବିରୁ ୧୧ରେ କେହିନାହାନ୍ତି। ଅନୁଗୁଳରେ ୧୮ ପଦବିରେ ୧୧ ଜଣ ଅଛନ୍ତି ଏବଂ ୭ ଖାଲିପଡ଼ିଛି । ସେହିପରି ବାଲେଶ୍ୱର ୩, ବରଗଡ଼ରେ ୧, ବଲାଙ୍ଗିରରେ ୧୨, କଟକରେ ୫, ଦେବଗଡ଼ରେ ୭, ଢ଼େଙ୍କାନାଳରେ ୬, ଗଞ୍ଜାମ ୧୪ ପଦବି ଖାଲି ପଡ଼ିଛି । ଯାଜପୁର ୧, ଝାରସୁଗୁଡ଼ାରେ କଳାହାଣ୍ଡି ୨୫ରୁ ୧୫, କେନ୍ଦ୍ରାପଡ଼ାରେ ୫, ଖୋର୍ଦ୍ଧାରେ ୫ ପଦବି ଫାଙ୍କା । ଏହାଛଡ଼ା ପୁରୀରେ ୯, ସମ୍ବଲପୁରରେ ୬, ସୁବର୍ଣ୍ଣପୁରରେ ୧, ସୁନ୍ଦରଗଡ଼ରେ ୧୦ ପଦବି ଖାଲିପଡ଼ିଛି ।
ଏହି ଖବରଟିକୁ ପଢନ୍ତୁ-ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକୁ ବେଖାତିର, ଗାଁ ବୁଲିବାକୁ ବାବୁ କୁନ୍ଥୁକୁନ୍ଥୁ
