ନୂଆଦିଲ୍ଲୀ,୧୪/୦୬: ଜଣେ ବ୍ୟକ୍ତି ଜୀବନ ଯାକ ପରିଶ୍ରମ କରି ବ୍ୟବସାୟ ସାମ୍ରାଜ୍ୟ ଛିଡ଼ା କରନ୍ତି ଆଉ ଯେତେବେଳେ ବୁଢ଼ା ହୋଇଯାଆନ୍ତି ବ୍ୟବସାୟର ମଙ୍ଗ ଧରିବାକୁ ମିଳନ୍ତିନି ଉପଯୁକ୍ତ ଉତ୍ତରାଧିକାରୀ । ଏଭଳି ସ୍ଥିତିରେ ତାଙ୍କ କାରବାର ବନ୍ଦ ହେବା ସ୍ଥିତିକୁ ଚାଲିଯାଏ । ଜର୍ମାନିରେ ଏଭଳି ଏକ ଅଜବ ସଂକଟ ଦେଖିବାକୁ ମିଳୁଛି । ଏ ଦେଶରେ ୪୨% ବ୍ୟବସାୟ ପରିବାରରେ ଯୋଗ୍ୟ ଉତ୍ତରାଧିକାରୀ ମିଳୁନାହାନ୍ତି ।
ଗଣମାଧ୍ୟମ ରିପୋର୍ଟ ଅନୁସାରେ, ଜର୍ମାନୀର ରୁଡୋଲ୍ଫ କିସ୍ଲିଙ୍ଗ୍ ଏବେ ଅବସର ନେବାକୁ ଚାହାନ୍ତି । ବହୁ ବର୍ଷର କଠିନ ପରିଶ୍ରମ ପରେ ସେ ହିଟିଂ, ଭେଣ୍ଟିଲେସନ ଏବଂ ଏୟାର୍ କଣ୍ଡିସନିଂର ବିଶାଳ କାରବାର ଛିଡ଼ା କରିଛନ୍ତି । ତେବେ ତାଙ୍କ ସାମ୍ନାରେ ଏବେ ବଡ଼ ଆହ୍ୱାନ ହେଉଛି ଉତ୍ତରାଧିକାରୀ । ଯୋଗ୍ୟ ଉତ୍ତରାଧିକାରୀ ପାଉନାହାନ୍ତି ସେ । ୬୨ ବର୍ଷୀୟ କିସ୍ଲିଙ୍ଗ୍ଙ୍କ ପୁଅ ତାଙ୍କ କାରବାରରେ ଆଦୌ ରୁଚି ରଖୁନାହାନ୍ତି। ସେ ଅନ୍ୟ ପେସାରେ ଅଛନ୍ତି । ଏହି ସମସ୍ୟା କେବଳ କିସ୍ଲିଙ୍ଗ୍ଙ୍କର ନାହିଁ, ଦେଶରେ ହଜାର ହଜାର ବ୍ୟବସାୟୀ ପରିବାରରେ ଉତ୍ତରାଧିକାରୀ ମିଳୁନାହାନ୍ତି । ଏଭଳି କ୍ଷେତ୍ରରେ ବ୍ୟବସାୟ ବନ୍ଦ ହେବା ଉପରେ ।
ଜର୍ମାନୀର ପ୍ରାୟ ୯୯% କମ୍ପାନି କ୍ଷୁଦ୍ର ଏବଂ ମଧ୍ୟମ(ଏସ୍ଏମ୍ଇ) । ଜର୍ମାନି ଅର୍ଥନୀତିର ଇଞ୍ଜିନ ହେଉଛନ୍ତି ଏହି ଏମ୍ଏସ୍ଇ । ଦେଶର ଜିଡିପିରେ ଏହି କ୍ଷେତ୍ରର ଯୋଗଦାନ ପ୍ରାୟ ଅଧା । ଏହାବ୍ୟତୀତ ୬୦% ଲୋକଙ୍କୁ ଏହା ରୋଜଗାର ଦେଇଥାଏ । ଏଗୁଡ଼ିକୁ ଘରୋଇ ନିବେଶର ଇଞ୍ଜିନ ବି କୁହାଯାଇଥାଏ । କିନ୍ତୁ ଉତ୍ତରାଧିକାରୀ ଅଭାବରୁ ଏହି କମ୍ପାନିଗୁଡ଼ିକର ଭବିଷ୍ୟତ ଅନିଶ୍ଚିତତା ମଧ୍ୟକୁ ଯାଉଛି ।
ଜର୍ମାନିର ଜନସଂଖ୍ୟା ରିପୋର୍ଟ କହୁଛି ଯେ, ଏଠାରେ ଅଧା ଏସ୍ଏମ୍ଇ ମାଲିକଙ୍କ ବୟସ ୫୫ ବର୍ଷରୁ ଅଧିକ । ଏବେ ସେମାନେ କାର୍ଯ୍ୟରୁ ଅବସର ନେବାକୁ ଚାହାନ୍ତି । କିନ୍ତୁ ଯୋଗ୍ୟ ଉତ୍ତରାଧିକାରୀ ଅଭାବରୁ ସେମାନେ କାର୍ଯ୍ୟମୁକ୍ତ ହୋଇପାରୁନାହାନ୍ତି । ୟୁରୋପର ସର୍ବବୃହତ୍ ଅର୍ଥବ୍ୟବସ୍ଥା ଆଗରେ ଏହା ଏକ ବଡ଼ ସଂକଟ ଭାବେ ଉଭା ହୋଇଛି । ବର୍ତ୍ତମାନ ଜର୍ମାନୀ ଦ୍ୱିତୀୟ ବିଶ୍ୱଯୁଦ୍ଧ ପରର ସବୁଠାରୁ ଲମ୍ବା ଆର୍ଥିକ ମାନ୍ଦାବସ୍ଥା ଦେଇ ଗତି କରୁଛି ।
