ମାଲକାନଗିରି/ଏମଭି ୭୯/କାଲିମେଳା, ୨୫/୪ : ମାଲକାନଗିରି ଜିଲ୍ଲା ମୋଟୁ ବନ ବିଭାଗକୁ ମିଳିଛି ଏକ ବଡ଼ ସଫଳତା। ଆଜି ସକାଳେ ମାଲକାନଗିରି ଜିଲ୍ଲାକୁ ପଡ଼ୋଶୀ ଆନ୍ଧ୍ରପ୍ରଦେଶରୁ ବେଆଇନ ଭାବେ ଚୋରା ଚାଲାଣ ହେଉଥିବାବେଳେ ୪୭୩ଟି ଜୀବନ୍ତ କଇଁଛକୁ ମୋଟୁ ବନ ବିଭାଗ ଜବତ କରିଛି । ତେବେ ଚୋରା ଚାଲାଣକାରୀମାନେ ଘଟଣାସ୍ଥଳରୁ ପଳାଇବାରେ ସଫଳ ହୋଇଥିଲେ।
ମୋଟୁ ବନାଞ୍ଚଳ ଅଧିକାରୀ ରଶ୍ମୀ ରଞ୍ଜନ ସ୍ୱାଇଁ , ମୋଟୁ ଫରେଷ୍ଟର ମୁରଲୀଧର ଅନୁଗୁଳିଆ ଓ ବନ ବିଭାଗର କର୍ମଚାରୀମାନେ ଚୋରା ଚାଲାଣକାରୀଙ୍କୁ ଧରିବା ପାଇଁ ସୀମାନ୍ତ ମୋଟୁ ଚେକ ପୋଷ୍ଟ ନିକଟରେ ରାତି ୩ଟାରୁ ଜଗି ରହିଥିଲେ। ଏକ ବୋଲେରୋ ଗାଡ଼ି ନମ୍ବର ଓଆର ୧୦ଇ ୫୮୭୭ ଆସୁଥିଲା। ବନ ବିଭାଗ କର୍ମଚାରୀମାନଙ୍କୁ ଦେଖି ଗାଡ଼ିର ଡ୍ରାଇଭର ଓ ଅନ୍ୟ ଜଣେ ଗାଡ଼ି ଛାଡ଼ି ଧାଇଁ ପଳାଇଥିଲେ । ଚୋରା ଚାଲାଣକାରୀମାନେ ଗାଡି ଛାଡି ଯିବା ପରେ ବନ ବିଭାଗର କର୍ମଚାରୀମାନେ ଯାଇ ଗାଡିଟିକୁ ଜବତ କରି ଯାଞ୍ଚ କରିବାରୁ ସେଥିରେ ୧୩ଟି ଅଖା ଭିତରେ ୪୭୩ଟି କଇଁଛ ବେଆଇନ ଭାବେ ପରିବହନ କରାଯାଉଥିବା ଦେଖିବାକୁ ପାଇଥିଲେ । ସମସ୍ତ କଇଁଛ ଏବଂ ବୋଲେରୋ ଗାଡ଼ି ଜବତ କରାଯାଇ ଏମଭି ୭୯ ବନ କାର୍ଯ୍ୟାଳୟରେ ରଖାଯାଇଛି । ଅଧିକ ତଦନ୍ତ ଚାଲିଛି ବୋଲି ମୋଟୁ ରେଞ୍ଜର ଶ୍ରୀ ସ୍ୱାଇଁ କହିଛନ୍ତି।
