ନୂଆଦିଲ୍ଲୀ,୦୯/୦୨: ଆମେ ପ୍ରାୟତଃ ଆମ ଚାରିପାଖରେ ଦେଖୁ ଯେ, ମହିଳାମାନେ ସେମାନଙ୍କ ବୟସ ଠାରୁ ଅଧିକ ବୁଢୀ ଦେଖାଯିବା ଆରମ୍ଭ କରିଥାନ୍ତି । କେବଳ ସେତିକି ନୁହେଁ, ଶରୀରରେ ଅନେକ ରୋଗ ଦେଖାଦେବା ସହ ତ୍ୱଚାରେ କୁଞ୍ଚନ ମଧ୍ୟ ଦେଖାଦେବା ଆରମ୍ଭ କରେ । ଯାହା ଫଳରେ ମହିଳାଙ୍କ ମାନସିକ ଚାପ ମଧ୍ୟ ବଢିଥାଏ । ଏସବୁରୁ ମୁକ୍ତି ପଇବା ପାଇଁ କମ୍ ବୟସରେ ଆସୁଥିବା ବାର୍ଦ୍ଧକ୍ୟକୁ ରୋକିବାକୁ ପଡ଼ିବ । ଯଦି ମହିଳାମାନେ ଏହାକୁ ଏଡ଼ାଇ ସୁସ୍ଥ ରହିବାକୁ ଚାହାଁନ୍ତି, ତେବେ ଆଜିଠାରୁ ଏହି ସବୁ ଅଭ୍ୟାସ ଗୁଡ଼ିକୁ ପରିତ୍ୟାଗ କରିବା ଉଚିତ୍ ।
ବ୍ୟାୟାମ ନକରିବା-
ମହିଳାମାନେ ଭାବିଥାନ୍ତି ଯେ, ଘଣ୍ଟା ଘଣ୍ଟା ଠିଆ ହୋଇ କାମ କରିବା ପରେ ବ୍ୟାୟାମ କରିବାର ବା ଆବଶ୍ୟକତା କ’ଣ ? ହେଲେ ପ୍ରତ୍ୟେକ ଶରୀର ପାଇଁ ବ୍ୟାୟାମ ନିତ୍ୟାନ୍ତ ଆବଶ୍ୟକ । ଯଦି ଆପଣ ଘଣ୍ଟା ଘଣ୍ଟା ଧରି ଠିଆ ହେଉଛନ୍ତି, ତେବେ ନିଜ ଗୋଡ଼କୁ ମଜବୁତ କରିବା ପାଇଁ ଆପଣଙ୍କୁ ବସି ବ୍ୟାୟାମ କରିବାର ଆବଶ୍ୟକତା ରହିଛି । ଯାହା ଦ୍ୱାରା ଆପଣଙ୍କ ବୟସ ବଢିବା ସହ ରୋଗମୁକ୍ତ ରହି ସୁସ୍ଥ ରହିପାରିବେ । ଏକ ସୁସ୍ଥ ହୃତପିଣ୍ଡ ପାଇଁ ମଧ୍ୟ ବ୍ୟାମର ବେଶ୍ ଆବଶ୍ୟକତା ରହିଛି ।
ସବୁବେଳେ ଚିନ୍ତିତ ରହିବା-
ଅଧିକାଂଶ ମହିଳା ନିଜର ଭବିଷ୍ୟତ ପାଇଁ, ଆଖପାଖର ଲୋକ ଅଥବା କୌଣସି ବିଷୟକୁ ନେଇ ଚିନ୍ତିତ ରହିଥାନ୍ତି । ଅତ୍ୟଧିକ ଚିନ୍ତା କରିବା ଦ୍ୱାରା ଶରୀରରେ କୋଲେଷ୍ଟ୍ରୋଲ୍ ବୃଦ୍ଧି ପାଇଥାଏ । ଯାହା ଅନେକ ରୋଗକୁ ନିମନ୍ତ୍ରଣ ଦେଇଥାଏ । ତେଣୁ ମହିଳାମାନେ ଅତ୍ୟଧିକ ଚିନ୍ତା କରିବାର ଅଭ୍ୟାସକୁ ତ୍ୟାଗ କରିବା ଉଚିତ୍ ।
ବହୁତ ରାଗିବା-
ଯଦି କ୍ରୋଧ ଏବଂ ଚିଡ଼ିଚିଡ଼ା ସବୁବେଳେ ଲାଗି ରହୁଛି, ତେବ ଆପଣ ନିଜର କ୍ରଧକୁ ନିୟନ୍ତ୍ରଣ କରିବା ଉଚିତ୍ । ଅତ୍ୟଧିକ ରାଗିବା ଆପଣଙ୍କ ଶାରୀରିକ ଏବଂ ମାନସିକ ସ୍ୱାସ୍ଥ୍ୟ ଉଭୟକୁ କ୍ଷତି ପହଞ୍ଚାଇଥାଏ । ଏହା ସହ ନକାରାତ୍ମକ ଚିନ୍ତା ମଧ୍ୟ ବେଶ୍ କ୍ଷତି କରିଥାଏ । ଏହା ମହିଳାଙ୍କ କେଶ ଏବଂ ଚର୍ମକୁ ବହୁ ମାତ୍ରାରେ ପ୍ରଭାବିତ କରିଥାଏ । ଯାହା ଫଳରେ ମହିଳାମାନେ ବୟସ ହେବା ପୂର୍ବରୁ ହିଁ ବୁଢୀ ହୋଇଯାଇଥାନ୍ତି ।
କମ୍ ପାଣି ପିଇବା-
ଘର ଏବଂ ପରିବାରର ଚିନ୍ତା ହେତୁ ଅନେକ ମହିଳା ନିଜର ଯତ୍ନ ନେଇ ନଥାନ୍ତି । ଏପିରିକି ପାଣି ମଧ୍ୟ କମ୍ ପିଇଥାନ୍ତି । ଅନେକ ସମୟରେ ଋତୁସ୍ରାବ ବନ୍ଦ ହେଉଥିବା ସମୟ ବା ମେନୋପଜ୍ ସମୟରେ କିମ୍ୱା ପ୍ରସବ ପରେ ମୂତ୍ରାଶୟ ଦୁର୍ବଳ ହେବା କାରଣରୁ ପରିଶ୍ରା ନିୟନ୍ତ୍ରଣ କରି ହୁଏ ନାହିଁ । ବେଳେବେଳେ ପରିଶ୍ରା ଲିକେଜ୍ ମଧ୍ୟ ହୋଇଯାଇଥାଏ । ଯାହା ଫଳରେ ମହିଳାମାନେ ପାଣି ପିଇବା କମାଇ ଦେଇଥାନ୍ତି । ଏପରି କରିବା ଦ୍ୱାରା ଚର୍ମ ଏବଂ କେଶର ସ୍ୱାସ୍ଥ୍ୟ ଉପରେ ଖରାପ ପ୍ରଭାବ ପଡ଼ିଥାଏ । କେବଳ ସେତିକି ନୁହେଁ, ଅନେକ ସ୍ୱାସ୍ଥ୍ୟ ସମସ୍ୟା ମଧ୍ୟ ଦେଖା ଦେଇଥାଏ । ସେଥିପାଇଁ ମହିଳା ମାନେ ପର୍ଯ୍ୟାପ୍ତ ପରିମାଣରେ ପାଣି ପିଇବା ଆବଶ୍ୟକ ।
ଶୋଇବାରେ ଅବହେଳା କରିବା-
ସବୁବେଳେ ଘର କାମରେ ବ୍ୟସ୍ତ ରହି ଶୋଇବାରେ ଅବହେଳା କରନ୍ତୁ ନାହିଁ । କମ୍ ପରିମାଣରେ ଶୋଇବା ଦ୍ୱାରା ହୃଦ୍ଘାତର ଆଶଙ୍କା ବଢିଥାଏ । ସଠିକ୍ ପରିମାଣରେ ଶୋଇବା ଦ୍ୱାରା ଶରୀର ସୁସ୍ଥ ରହିଭା ସହ ବାର୍ଦ୍ଧକ୍ୟର ଦ୍ରୁତ ଗତି ମଧ୍ୟ କମିଥାଏ । ତେଣୁ ଯଦି ଆପଣ ସମୟ ପୂର୍ବରୁ ବୁଢା ହେବାକୁ ଚାହୁଁ ନାହାନ୍ତି, ତେବେ ପର୍ଯ୍ୟାପ୍ତ ମାତ୍ରାରେ ଶୋଇବାର ଅଭ୍ୟାସ କରନ୍ତୁ ।
