ବ୍ରହ୍ମପୁର, ୩୧/୦୫: ବ୍ରହ୍ମପୁରରେ ପୁଣି ମିଳିଲା ମାଉଜର । ୭ଜଣ ଦୁର୍ଦ୍ଦାନ୍ତ ଅପରାଧିଙ୍କୁ ଗିରଫ କରିଛି ବୈଦ୍ୟନାଥପୁର ଓ ଗୋସାଣୀନୂଆଗାଁ ଥାନା ପୁଲିସ । ଏଥିସହ ସେମାନଙ୍କ ଠାରୁ ୭ଟି ମାଉଜର, ୬ଟି ମାଗାଜିନ୍, ୩୪ଟି ଗୁଳି, ୬ଟି ମୋବାଇଲ ଫୋନ୍ ଓ ୧.୧୫ଲକ୍ଷ ଟଙ୍କା ଜବତ କରାଯାଇଛି। ଗିରଫ ଅଭିଯୁକ୍ତଙ୍କ ବିରୋଧରେ ବହୁ ଅପରାଧିକ ମାମଲା ରହିଥିବା ବେଳେ ଆଗକୁ ବଡ଼ ଧରଣର ଅପରାଧ ଘଟାଇବାକୁ ଯୋଜନାରେ ଥିଲେ। ଏନେଇ ବ୍ରହ୍ମପୁର ଜିଲ୍ଲା ପୁଲିସ କାର୍ଯ୍ୟାଳୟରେ ଆୟୋଜିତ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ବ୍ରହ୍ମପୁର ଏସପି ଡ଼ା ସରବଣା ବିବେକ ଏମ।
ତେବେ ଗଞ୍ଜାମ ଜିଲ୍ଲାରେ କିଛି ଅପରାଧୀ ମାଉଜର ଯୋଗାଇଥିବା ସୂଚନା ପାଇବା ପରେ ଆଇଜି ନୀତି ଶେଖରଙ୍କ ନିର୍ଦ୍ଦେଶ ପ୍ରକାରେ ଗଞ୍ଜାମ ଓ ବ୍ରହ୍ମପୁର ପୁଲିସର ସ୍ପେଶାଲ ଡ୍ରାଇଭ୍ ଆରମ୍ଭ ହୋଇଥିଲା। ଗଞ୍ଜାମରେ ଦୁଇଟି ପର୍ଯ୍ୟାୟରେ ୨୫ଟି ଓ ବ୍ରହ୍ମପୁରରେ ଦୁଇଟି ପର୍ଯ୍ୟାୟରେ ୧୧ଟି ମାଉଜର ଜବତ ଜବତ ହୋଇଛି। ଗିରଫ ଅଭିଯୁକ୍ତଙ୍କ ମଧ୍ୟରେ ଜଣେ ଏଟିଏମ୍ କାର୍ଡ ଚୋର ଥିବା ବେଳେ ତାଙ୍କ ଠାରୁ ୨୨ଟି ଏଟିଏମ୍ କାର୍ଡ ଜବତ ହୋଇଥିବା ସୂଚନା ମିଳିଛି।
