ଆଠଗଡ଼ ,୧୭।୫ ଆଠଗଡ଼ ଦେଇ ପ୍ରତିଦିନ ବେଆଇନ ଭାବରେ ଚାଲାଣ ହେଉଛି ଲଘୁ ଖଣିଜ ସମ୍ପଦ। ବାଲି ମାଙ୍କଡା ପଥର ଚିପ୍ସ ସବୁକୁ ବେଆଇନ ଭାବରେ ବୋଝେଇ କରି ନିଆ ଯାଉଛି। ଲଘୁ ଖଣିଜ ସମ୍ପଦର ନିୟନ୍ତ୍ରଣ ଦାୟିତ୍ୱ ରାଜ୍ୟ ଖଣି ବିଭାଗ ହାତକୁ ଗଲା ପରେ ଏହି ବେଆଇନ ଚାଲାଣ କରା ଯାଉଥିବା ବେଳେ ଆଠଗଡ଼ ପ୍ରଶାସନ ପକ୍ଷରୁ ସେମିତି କିଛି ଆଖିଦୃଶିଆ ପଦକ୍ଷେପ ଗ୍ରହଣ କରା ଯାଉ ନ ଥିବା ଅଭିଯୋଗ ହୋଇ ଆସୁଥିଲା। ଆଠଗଡ଼ ଉପଜିଲ୍ଲାପାଳ ପ୍ରହଲ୍ଲାଦ ନାରାୟଣ ଶର୍ମା ଙ୍କ ତରଫରୁ କେତେବେଳେ କେମିତି ଏହି ବେଆଇନ ଗାଡ଼ି ଗୁଡ଼ିକ ଜବତ ହେଉଥିବା ବେଳେ ଶନିବାର ଆଠଗଡ଼ ପୋଲିସ ପକ୍ଷରୁ ଏହିଭଳି ଆଠଟି ବେଆଇନ ବୋଝେଇ ହାଇଓ୍ବା ଜବତ କରିଛି।
ଏହି ଗାଡ଼ିଗୁଡ଼ିକ ଢେଙ୍କାନାଳ ଅଞ୍ଚଳର ବିଭିନ୍ନ କ୍ରସରରୁ ଚିପ୍ସକୁ ବେଆଇନ ଭାବରେ ବୋଝେଇ କରି ଚାଲାଣ କରୁଥିଲେ। ଆଠଗଡ଼ ଉପଖଣ୍ଡ ଆରକ୍ଷୀ ଅଧିକ୍ଷକ ବିଶ୍ବଜିତ ମହାନ୍ତି ଥାନା ଅଧିକାରୀ ସୁମତି ମହାନ୍ତି ଙ୍କ ନେତୃତ୍ବରେ ଏହି ଚଢାଉ କରାଯାଇ ରାଜ୍ୟ ସରକାର ଙ୍କ ପରିବହନ ବିଭାଗ କଟକ ଙ୍କୁ ହସ୍ତାନ୍ତର କରା ଯାଇଥିଲା। ପରିବହନ ବିଭାଗ ପକ୍ଷରୁ ଉକ୍ତ ଗାଡି ଗୁଡ଼ିକ ଠାରୁ ୨ ଲକ୍ଷ ୭୪ ହଜାର ୯୦୦ ଟଙ୍କା ଜୋରିମାନା ଆଦାୟ କରାଯାଇଥିବା କଟକ ଜିଲ୍ଲା ପରିବହନ ନିରୀକ୍ଷକ ରଞ୍ଜନ କୁମାର ଦୋରା ସୂଚନା ଦେଇଛନ୍ତି।
