ନୂଆପଡ଼ା,୨୭/୧୦: ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ)ର ବ୍ୟବହାର ମଣିଷ ଜୀବନକୁ ବହୁମାତ୍ରାରେ ପ୍ରଭାବିତ କରୁଛି । ବୈଷୟିକ ଜ୍ଞାନ କୌଶଳଠୁ ଆରମ୍ଭ କରି ନିଯୁକ୍ତି, ରୋଜଗାର, କଳା କାରିଗରୀ ସବୁ କ୍ଷେତ୍ରରେ ଏଆଇ ବ୍ୟବହାର ସାଧାରଣ ମଣିଷ ପାଇଁ ନୂଆ ଆହ୍ୱାନ ସୃଷ୍ଟି କରିଛି । ଏଆଇ ପ୍ରଭାବରୁ ନୂଆପଡ଼ା ଉପନିର୍ବାଚନ ବି ବାଦ ପଡ଼ିନି । ଭୋଟ ପୂର୍ବରୁ ବିଭିନ୍ନ ରାଜନୈତିକ ଦଳର ଏଆଇ ଜେନେରେଟେଡ୍ ଫଟୋ ଓ ଭିଡ଼ିଓ ମୋବାଇଲରୁ ମୋବାଇଲକୁ ଘୂରି ବୁଲୁଛି । ପ୍ରାର୍ଥୀମାନେ କଳ ବଳ କୌଶଳ ଲଗାଇ ନୂଆ ନୂଆ ସମୀକରଣ ତିଆରି କରୁଥିବା ବେଳେ ଏଆଇ ଜେନେରେଟେଡ ଗୋଟିଏ ଫଟୋ କିମ୍ବା ଭିଡିଓ ସବୁ ଖେଳ ବିଗାଡ଼ି ଦେଉଛି ।
ଏଆଇର କିଛି ଭିଡ଼ିଓ ନୂଆପଡ଼ା ଜିଲ୍ଲାର ବିଭିନ୍ନ ସୋସିଆଲ ମିଡ଼ିଆ ଗ୍ରୁପରେ ଭାଇରାଲ ହେଉଛି । ଏକ ଭିଡିଓରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ପୂର୍ବତନ ମୁଖ୍ୟମନ୍ତ୍ରୀ ତଥା ବିଜେଡି ରାଜ୍ୟ ସଭାପତି ନବୀନ ପଟ୍ଟନାୟକ ଓ ପ୍ରଦେଶ କଂଗ୍ରେସ ସଭାପତି ଭକ୍ତଚରଣ ଦାସ ଦୌଡ଼ ପ୍ରତିଯୋଗିତାରେ ଭାଗ ନେଇଛନ୍ତି । ଏଥିରେ ସମସ୍ତେ ଚାମ୍ପିଅନ ହେବାକୁ ଉଦ୍ୟମ କରୁଛନ୍ତି । କିନ୍ତୁ ସମସ୍ତଙ୍କୁ ପଛରେ ପକାଇ ନବୀନ ପଟ୍ଟନାୟକ ବିଜୟୀ ହେଉଥିବା ଦେଖାଯାଉଛି ।
ସେହିପରି ଅନ୍ୟ ଏକ ଡିପ୍ ଫେକ୍ ଭିଡିଓରେ ଜଣେ ସାମ୍ବାଦିକ ହିନ୍ଦୀ ଭାଷାରେ ଜୟ ଢୋଲକିଆଙ୍କ ସାକ୍ଷାତ୍କାର ନେଉଛନ୍ତି । ବିଜେପି ସହିତ ଡିଲ ହୋଇଥିବା ପ୍ରଶ୍ନ ପଚାରିବାରୁ ଜୟ ଉତକ୍ଷିପ୍ତ ହୋଇ କିଛି କହୁଛନ୍ତି । କିନ୍ତୁ କଣ କହୁଛନ୍ତି ତାହା ଶୁଣାଯାଉନାହିଁ, କାରଣ ସେଥିରେ ଭଏସ ଓଭର ଗୀତ ଦିଆଯାଇଛି ।
ଅନୁରୂପ ଭାବେ ବସନ୍ତ ଅଭିନନ୍ଦନ ଓ ଜୟଙ୍କୁ ନେଇ ଏକାଧିକ ଏଆଇ ଫଟୋ ମଧ୍ୟ ଚର୍ଚ୍ଚାର ବିଷୟ ହୋଇଛି । ଏଆଇ ଜେନେରେଟେଡ ଫଟୋ ଓ ଭିଡିଓ ଦେଖିବା ପାଇଁ କୌତୂହଳପୂର୍ଣ୍ଣ ଲାଗୁଥିଲେ ହେଁ ବାସ୍ତବ କ୍ଷେତ୍ରରେ ତାହା ଉପହାସ କଲାଭଳି ହୋଇଥିବାରୁ ଦଳୀୟ କର୍ମୀମାନେ ତାହାକୁ ଗ୍ରହଣ କରିପାରୁ ନାହାନ୍ତି । ଏମିତି ବି ଜୟ ଢୋଲକିଆଙ୍କ ମିଶ୍ରଣ ପରେ ଜିଲ୍ଲା ବିଜେପିରେ ଅସନ୍ତୋଷ କୁହୁଳୁଥିଲା । ତାକୁ ପ୍ରଶମନ କରିବା ପାଇଁ ବିଜେପି ଯେତେ ଉଦ୍ୟମ କରୁଛି ଏଆଇ ସେହି ଘିଅରେ ଅଧିକ ନିଆଁ ଢାଳୁଛି ।
କିଛି ଫଟୋ ଏମିତି ଅଛି ଯେଉଠି ବିଜେପି ପ୍ରାର୍ଥୀ ଜୟ ଛିଡ଼ା ହୋଇ ହାତଯୋଡ଼ି ଜୁହାର କରୁଛନ୍ତି । ଜୟଙ୍କ ପାଶ୍ୱର୍ରେ ବିଜେପି ପୂର୍ବତନ ରାଜ୍ୟ ସଭାପତି ବସନ୍ତ ପଣ୍ଡା ଓ ଯୁବମୋର୍ଚ୍ଚା ଜିଲ୍ଲା ସଭାପତି ଅଭିନନ୍ଦନ ପଣ୍ଡା ବାପ- ପୁଅ କୋଳାକୋଳି ହୋଇ କାନ୍ଦୁଛନ୍ତି । ଏହାରି ଉପରି ଭାଗରେ ପଣ୍ଡା ବାପା- ପୁଅଙ୍କୁ ଭଗବାନ ଧୈର୍ଯ୍ୟ ଦିଅନ୍ତୁ ବୋଲି ଲେଖା ହୋଇଛି । ଅନ୍ୟ ଏକ ଫଟୋରେ ଜୟ ପଦ୍ମଫୁଲ ଚିହ୍ନ ପତାକା ଓ ବିଧାୟକ ପ୍ରାର୍ଥୀ ଟିକେଟ୍ ଧରି ହସୁଛନ୍ତି ଓ ପାଖରେ ବାପା-ପୁଅ ବେଞ୍ଚରେ ବସି କାନ୍ଦୁଛନ୍ତି । ହିନ୍ଦୀ ଚଳଚ୍ଚିତ୍ର ‘ରାଜାବାବୁ’ ଶୈଳୀରେ ଆଉ ଏକ ଫଟୋ ପ୍ରସ୍ତୁତ କରାଯାଇଛି । ଯେଉଁଥିରେ ଗୋବିନ୍ଦାଙ୍କ ଭଳି ଜୟ ଢ଼ୋଲକିଆ ଆଗେ ଆଗେ ଚାଲୁଥିବା ବେଳେ ଶକ୍ତି କପୁର ଭଳି ଅଭିନନ୍ଦନ ତାଙ୍କ ପଛରେ ଏକ ଛତା ଧରି ଚାଲୁଛନ୍ତି ।
ଉଲ୍ଲେଖଯୋଗ୍ୟ ଯେ, ଦୀର୍ଘ ତିନି ଦଶନ୍ଧି ଧରି ନୂଆପଡ଼ା ଜିଲ୍ଲାରେ ବିଜେପିକୁ ବସନ୍ତ ସଂଗଠିତ, ମଜବୁତ ଓ ସୁଦୃଢ କରି ଠିଆ କରାଇଛନ୍ତି । କିନ୍ତୁ ଏବେ ଏଆଇରେ ତାଙ୍କୁ ଉପହାସ କଲାଭଳି ଫଟୋ ପ୍ରଦର୍ଶିତ ହେଉଛି । ଏହା କଷ୍ଟ ଦେଉଥିବା ତାଙ୍କ ସମର୍ଥକମାନେ କହିଛନ୍ତି । କଂଗ୍ରେସ ମଧ୍ୟ ଏଥିରୁ ବାଦ ପଡ଼ିନାହିଁ । ଘାସିରାମ ମାଝିଙ୍କ ନାଁରେ ଏଆଇ ଜରିଆରେ ବିଭିନ୍ନ ପୋଷ୍ଟର ପ୍ରସ୍ତୁତ କରାଯାଇ ସୋସିଆଲ ମିଡିଆରେ ପ୍ରସାର କରାଯାଉଛି ।
ବିହାର ନିର୍ବାଚନରେ ଏଆଇ ଫଟୋ, ଭିଡିଓକୁ ନେଇ ଗଭୀର ଉଦ୍ବେଗ ବ୍ୟକ୍ତ କରିଛନ୍ତି ନିର୍ବାଚନ କମିଶନ । ଡିପ୍ ଫେକ୍ ଭିଡିଓ ନିର୍ବାଚନ ସ୍ୱଚ୍ଛତାକୁ ପ୍ରଭାବିତ କରିବ ବୋଲି ଆଶଙ୍କା ବ୍ୟକ୍ତ କରିବା ସହ କଠୋର ମାର୍ଗଦର୍ଶିକା ଜାରି କରିଛନ୍ତି । ଏଆଇ ପ୍ରଚାର କିପରି କରାଯିବ ସେ ନେଇ ସ୍ପଷ୍ଟ କରିଛନ୍ତି । ନୂଆପଡ଼ା ଉପନିର୍ବାଚନରେ ଏଆଇ ଜେନେରେଟେଡ ଫଟୋ ଓ ଭିଡିଓର ବ୍ୟାପକ ବ୍ୟବହାର ହେଉଥିବାବେଳେ ଏହା ଉପରେ ଅଙ୍କୁଶ ନାହିଁ । ଏହା ନିର୍ବାଚନକୁ ପ୍ରଭାବିତ କରିବା ଆଶଙ୍କା ଦେଖା ଦେଇଥିବା ରାଜନୈତିକ ବିଶେଷଜ୍ଞମାନେ କହିଛନ୍ତି ।
ଏ ସମ୍ପର୍କରେ ବରିଷ୍ଠ ଆଇନଜୀବୀ କୁମୁଦ ହୋତା କହିଛନ୍ତି³ ଏଆଇ ଜେନେରେଟେଡ ଫେକ୍ ଭିଡିଓ ଏବଂ ଫଟୋ ଉପନିର୍ବାଚନକୁ ବହୁ ମାତ୍ରାରେ କବଳିତ ଓ ପ୍ରଭାବିତ କରୁଛି। ଏହାର ନିରାକରଣ ପାଇଁ ଦଳୀୟ ପ୍ରାର୍ଥୀ, ନେତା ଓ କାର୍ଯ୍ୟକର୍ତ୍ତାମାନେ ଖୋଲାଖୋଲି ଭାବେ ବିଭିନ୍ନ ସଭାସମିତିରେ ଲୋକଙ୍କୁ ସେଗୁଡ଼ିକର ବିଶ୍ୱାସ ନ କରିବା ପାଇଁ ଆହ୍ୱାନ ଦେବାର ଆବଶ୍ୟକତା ରହିଛି । ଏଥି ସହିତ ନିର୍ବାଚନ ଅଧିକାରୀଙ୍କ ତତ୍ତ୍ୱାବଧାନରେ ପ୍ରଶାସନିକ ଅଧିକାରୀମାନେ ମଧ୍ୟ ଏନେଇ ସଚେତନ କରିବା ଉଚିତ । ସୋସିଆଲ ମିଡ଼ିଆର ତଥ୍ୟକୁ ସଂପୂର୍ଣ୍ଣ ବିଶ୍ୱାସ କରିବା କଥା ନୁହେଁ । ଲୋକଙ୍କୁ ସଚେତନ କରିବା ଆମ ସମସ୍ତଙ୍କ ଦାୟିତ୍ୱ ବୋଲି ଶ୍ରୀ ହୋତା କହିଛନ୍ତି ।
