ଭୁବନେଶ୍ୱର, ୧୦/୧୦: ଖୁବ୍ଶୀଘ୍ର ଭୁବନେଶ୍ୱର ବିମାନବନ୍ଦରରେ ବିମାନଗୁଡ଼ିକର ମରାମତି କରାଯିବ । ଅହରହ ଉଡୁଥିବା ବିମାନଗଡିକର ରକ୍ଷଣାବେକ୍ଷଣ ମଧ୍ୟ କରାଯିବ । ପୂର୍ବ ଭାରତରେ ପ୍ରଥମ ବିମାନବନ୍ଦର ଭାବେ ବିଶ୍ୱସ୍ତରୀୟ ବୈମାନିକ ଯାନ ମରାମତି, ରକ୍ଷଣାବେକ୍ଷଣ ଏବଂ ଓଭରହୁଲ୍ (ଏମ୍ଆର୍ଓ) କେନ୍ଦ୍ର ଖୋଲିବ । ଏନେଇ ରାଜ୍ୟ ପରିବହନ ବିଭାଗ ସହ ପୂର୍ବରୁ ଏୟାର ୱାର୍କସ୍ ଇଣ୍ଡିଆ ଇଞ୍ଜିନିୟରିଂ ପ୍ରାଇଭେଟ୍ ଲିମିଟେଡ୍ ଚୁକ୍ତି କରିଥିଲା । ବିମାନବନ୍ଦରରେ ଥିବା ହ୍ୟାଙ୍ଗରକୁ ଗୁରୁବାର ଏହି ସଂସ୍ଥାକୁ ହସ୍ତାନ୍ତର କରାଯାଇଛି । ପରିବହନ ବିଭାଗ ମୁଖ୍ୟ ଶାସନ ସଚିବ ଉଷା ପାଢ଼ୀ ଓ ଅନ୍ୟ ବରିଷ୍ଠ ଅଧିକାରୀମାନେ ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ ।
ସୂଚନାଯୋଗ୍ୟ, ଏହି ପ୍ରକଳ୍ପକୁ ପ୍ରୋତ୍ସାହିତ କରିବା ପାଇଁ ରାଜ୍ୟ ସରକାର ହାତ ବଢ଼ାଇଛନ୍ତି । ଉକ୍ତ ସଂସ୍ଥାକୁ ନିବେଶ କ୍ଷେତ୍ରରେ ୫୦ ପ୍ରତିଶତ ସବ୍ସିଡି ମିଳିଛି । ଆଗାମୀ ୨ ବର୍ଷ ଯାଏ ଭଡ଼ା ବାବାଦକୁ ସମସ୍ତ ଖର୍ଚ୍ଚ ମଧ୍ୟ ରାଜ୍ୟ ସରକାର ବୁଝିବେ । ଏମ୍ଆର୍ଓର ସମସ୍ତ କର୍ମଚାରୀଙ୍କୁ ଇପିଏଫ୍ ଓ ଇଏସ୍ଆଇ ଯୋଗାଇ ଦିଆଯିବ । ଆସନ୍ତା ୨୦୨୬ ଜାନୁଆରୀ ସୁଦ୍ଧା ବିମାନବନ୍ଦରରେ ଏମ୍ଆର୍ଓ କାର୍ଯ୍ୟକ୍ଷମ କରିବ ବୋଲି ଆଶା ରଖାଯାଇଛି ।
