ଭୁବନେଶ୍ୱର,୨୩/୦୯: କୋରଡକଣ୍ଟା ଦୁର୍ଗାପୂଜା ସମିତି ଚଳିତବର୍ଷ ୧୪ତମ ଶାରଦୀୟ ଦୁର୍ଗାପୂଜା ଉତ୍ସବ ଆୟୋଜନ କରୁଛି । ଏଠାକାର ବିଶେଷତ୍ତ୍ୱ ହେଉଛି ରାବଣ ପୋଡ଼ି । ଚଳିତଥର ଏଠାରେ ୮୫ ଫୁଟ ଉଚ୍ଚ ରାବଣ ପ୍ରତିକୃତି ନିର୍ମାଣ ହେଉଛି । ମାନ୍ୟଗଣ୍ୟ ଅତିଥି ଓ ଗ୍ରାମର ସବୁଠୁ ବୟସ୍କ ବ୍ୟକ୍ତିଙ୍କ ଦ୍ୱାରା ରାବଣକୁ ଅଗ୍ନି ସଂଯୋଗ କରାଯିବ ବୋଲି କମିଟିର ବୃନ୍ଦାବନ ମହାରଣା, ବିଚିତ୍ର ନାୟକ ଓ ଦୁର୍ଗା ପ୍ରସାଦ ଜେନା ସୂଚନା ଦେଇଛନ୍ତି ।
ଚଳିତ ବର୍ଷ ପୂଜା ପାଇଁ ପ୍ରାୟ ୨୫ ଲକ୍ଷ ଟଙ୍କା ବ୍ୟୟବରାଦ କରାଯାଇଛି । ଏଥର ରାଜସ୍ଥାନର ଅମରେଶ୍ୱର ମହାଦେବ ମନ୍ଦିର ଆକୃତିର ତୋରଣ ନିର୍ମାଣ କରାଯିବ । ଏହି ତୋରଣର ଉଚ୍ଚତା ପ୍ରାୟ ୬୫ ଫୁଟ ଓ ପ୍ରସ୍ଥ ୪୦ ଫୁଟ ରହିଛି । ଏଥିରେ ୧୨ ଫୁଟ ଉଚ୍ଚ ମା’ଙ୍କ ମୃଣୟ ମୂର୍ତ୍ତିକୁ ବିଭିନ୍ନ ପ୍ରକାର ସୁନା ଆଉ ରୂପା ଅଳଙ୍କାରରେ ସୁସଜ୍ଜିତ କରାଯିବ । ଗାଁ ନଦୀବନ୍ଧଠାରୁ କୋରଡକଣ୍ଟା ଛକ ପର୍ଯ୍ୟନ୍ତ ଆଲୋକମାଳାରେ ସାଜସଜ୍ଜା କରାଯିବ । ଛୋଟବଡ଼ ମିଶାଇ ସମୂଦାୟ ୪୨ଟି ଲାଇଟ୍ ଗେଟ୍ କରାଯିବ । ବିଭିନ୍ନ ସ୍ଥାନରେ ପ୍ରାୟ ୨୦ଟି ସିସିଟିଭି କ୍ୟାମେରା ସହ ୨୦୦ ସ୍ୱେଚ୍ଛାସେବୀ ସୁରକ୍ଷା ଦାୟିତ୍ୱ ତୁଲାଇବେ । ଷଷ୍ଠୀରେ ଭଜନ ସନ୍ଧ୍ୟା, ସପ୍ତମୀରେ ଡ୍ୟାନ୍ସ ଡ୍ୟାନ୍ସ, ଅଷ୍ଟମୀରେ ଶିଶୁ କଳାକାରଙ୍କ କାର୍ଯ୍ୟକ୍ରମ, ନବମୀରେ ମେଲୋଡି ଏବଂ ଦଶମୀରେ ପୁଣି ଡ୍ୟାନ୍ସ କାର୍ଯ୍ୟକ୍ରମ ରହିଛି ବୋଲି ମିଥୁନ ନାୟକ, କାଳନ୍ଦୀ ମହାରଣା, ଦିଲ୍ଲୀପ ଜେନା ଓ ଦିବ୍ୟରଞ୍ଜନ ଜେନା କହିଛନ୍ତି ।
