ନୂଆଦିଲ୍ଲୀ ୧୧/୧୦: ବିହାର ବିଧାନସଭା ନିର୍ବାଚନ ଲାଗି ମହାମେଣ୍ଟରେ ଆସନ ବୁଝାମଣା ପ୍ରକ୍ରିୟା ଜାରି ରହିଛି । ମହାମେଣ୍ଟର ପ୍ରମୁଖ ଦଳ କଂଗ୍ରେସ ଏହାର ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ଚୂଡାନ୍ତ କରିଥିବା ସୂଚନା ମିଳିଛି । ଏହି ତାଲିକାରେ ୩୬ ଜଣଙ୍କ ନାଁ ସ୍ଥାନ ପାଇଛି । କିନ୍ତୁ ଦଳ ପକ୍ଷରୁ ବିଧିବଦ୍ଧ ଭାବେ ଘୋଷଣା କରାଯାଇନାହିଁ ।
ସୂଚନା ଅନୁସାରେ କଂଗ୍ରେସର ସ୍କ୍ରିନିଂ କମିଟି ବୈଠକ ଆଜି ଅନ୍ଲାଇନରେ ଅନୁଷ୍ଠିତ ହୋଇଥିଲା । ନୂଆଦିଲ୍ଲୀରେ ବସିଥିବା ଏହି ବୈଠକରେ ପାଟନାରୁ ଦଳର ରାଜ୍ୟ ପ୍ରଭାରୀ କ୍ରିଷ୍ଣା ଆଲାୱରୁ, ରାଜ୍ୟ ସଭାପତି ରାଜେଶ ରାମ, ବିଧାୟକ ଦଳ ନେତା ସକିଲ ଅହମ୍ମଦ ଖାନ ଓ ଅନ୍ୟାନ୍ୟ ନେତାମାନେ ସାମିଲ ହୋଇଥିଲେ । ବୈଠକ ପୂର୍ବାହ୍ନ ୧୧ଟାରୁ ଆରମ୍ଭ ହୋଇ ରାତି ୮ଟା ପର୍ଯ୍ୟନ୍ତ ଚାଲିଥିଲା । ବିଭିନ୍ନ ନିର୍ବାଚନମଣ୍ଡଳୀରୁ ଆସିଥିବା ଆଶାୟୀ ପ୍ରାର୍ଥୀଙ୍କ ଆବେଦନ ଫର୍ମକୁ ଭଲ ଭାବେ ଯାଞ୍ଚ କରାଯାଇଥିଲା । ସେଥିରୁ କିଛି ପ୍ରାର୍ଥୀଙ୍କ ନାମରେ ମୋହର ଲାଗିଛି । କୁହାଯାଉଛି କି ପ୍ରଥମ ପର୍ଯ୍ୟାୟରେ ଦଳର ୩୬ ଜଣ ପ୍ରାର୍ଥୀଙ୍କ ନାମକୁ ଅନୁମୋଦନ କରାଯାଇଛି । ଖୁବଶୀଘ୍ର ସେମାନଙ୍କ ନାମ ଘୋଷଣା କରାଯିବା ସହ ଦଳୀୟ ଚିହ୍ନ ପ୍ରଦାନ କରାଯିବ ।
ବିଶେଷ ସୂତ୍ରରୁ ମିଳିଥିବା ସୂଚନା ଅନୁସାରେ ମହାମେଣ୍ଟରେ ଦିନେ ଦୁଇଦିନ ଭିତରେ ଆସନ ବୁଝାମଣା ଚୂଡାନ୍ତ ହେବ । ଆସନ ଚୂଡାନ୍ତ ହେବା ପରେ କଂଗ୍ରେସ ତାର ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ବିଧିବଦ୍ଧ ଭାବେ ଘୋଷଣା କରିବ । ଆସନ୍ତା ୧୫ ତାରିଖ ପରେ କଂଗ୍ରେସ ପକ୍ଷରୁ ଦ୍ୱିତୀୟ ପର୍ଯ୍ୟାୟ ପ୍ରାର୍ଥୀ ତାଲିକା ଜାରି କରାଯିବ ବୋଲି ସୂଚନା ମିଳିଛି । ବିହାର ବିଧାନସଭା ନିର୍ବାଚନ ଲାଗି ଦୁଇଟି ପର୍ଯ୍ୟାୟରେ ନଭେମ୍ବର ୬ ଓ ୧୧ରେ ଭୋଟ ଗ୍ରହଣ କରାଯିବ । ନଭେମ୍ବର ୧୪ରେ ଭୋଟ ଗଣତି ହେବା ସହ ଫଳାଫଳ ପ୍ରକାଶ ପାଇବ । ରାଜ୍ୟର ମୋଟ ୨୪୩ ବିଧାନସଭା ଆସନରୁ ପ୍ରଥମ ପର୍ଯ୍ୟାୟରେ ୧୨୧ ଓ ଦ୍ୱିତୀୟ ପର୍ଯ୍ୟାୟରେ ୧୨୨ ଆସନରେ ମତଦାନ ହେବ । ପ୍ରଥମ ପର୍ଯ୍ୟାୟ ନାମାଙ୍କନ ଦାଖଲର ଶେଷ ତାରିଖ ଅକ୍ଟୋବର ୧୭ ରହିଛି । ଅକ୍ଟୋବର ୧୮ରେ ନାମାଙ୍କନପତ୍ର ଯାଞ୍ଚ ଏବଂ ୨୦ ସୁଦ୍ଧା ପ୍ରାର୍ଥୀପତ୍ର ପ୍ରତ୍ୟାହାର କରାଯାଇପାରିବ । ସେହିଭଳି ଦ୍ୱିତୀୟ ପର୍ଯ୍ୟାୟ ଲାଗି ନାମାଙ୍କନ ଦାଖଲର ଶେଷ ତାରିଖ ଅକ୍ଟୋବର ୨୦ ରହିଥିଲା ବେଳେ ୨୧ରେ ଯାଞ୍ଚ କରାଯିବ । ନାମାଙ୍କପତ୍ର ପ୍ରତ୍ୟାହାରର ଶେଷ ତାରିଖ ଅକ୍ଟୋବର ୨୩ ରଖାଯାଇଛି । ବିହାର ବିଧାନସଭାର କାର୍ଯ୍ୟକାଳ ଆସନ୍ତା ନଭେମ୍ବର ୨୨ରେ ଶେଷ ହେବ ।
