ନୂଆଦିଲ୍ଲୀ: ବ୍ରାଜିଲରେ, ଡ୍ରଗ୍ସ ଚାଲାଣକାରୀ ଏବଂ ମାଫିଆମାନଙ୍କ ଉପରେ ପୋଲିସ କଡା କାର୍ଯ୍ୟାନୁଷ୍ଠାନ ଜାରି ରଖିଛି। ଏହି ସମୟରେ ମାତ୍ର ଗୋଟିଏ ଦିନ ମଧ୍ୟରେ ଉଭୟ ପକ୍ଷ ମଧ୍ୟରେ ହୋଇଥିବା ଗୁଳିଚାଳନାରେ ୬୪ ଜଣଙ୍କର ମୃତ୍ୟୁ ଘଟିଛି। ଏନେଇ ଜାତିସଂଘ ମାନବାଧିକାର କାର୍ଯ୍ୟାଳୟ (UNOHCHR) ଚିନ୍ତା ପ୍ରକାଶ କରିଛି। ଉଲ୍ଲେଖନୀୟ ଯେ ବ୍ରାଜିଲର ରିଓ ଡି ଜେନେରିଓର ଦୁଇଟି ଗରିବ ଅଞ୍ଚଳରେ ଚାଲୁଥିବା ବ୍ୟାପକ ଡ୍ରଗ୍ସ କାରବାର ଉପରେ ପୋଲିସ କାର୍ଯ୍ୟାନୁଷ୍ଠାନ ନେଇଥିଲା। ଏଥିରେ ୬୪ ଜଣଙ୍କର ମୃତ୍ୟୁ ହୋଇଥିବା ବେଳେ ୮୧ ଜଣଙ୍କୁ ଗିରଫ କରାଯାଇଥିଲା।
ରିପୋର୍ଟ ଅନୁଯାୟୀ, ଏହି ଅଞ୍ଚଳଗୁଡ଼ିକରେ ଡ୍ରଗ୍ସ ଚାଲାଣକାରୀ ଗ୍ୟାଙ୍ଗ ବିରୋଧରେ ଏକ ଅଭିଯାନରେ ପ୍ରାୟ ୨,୫୦୦ ସଶସ୍ତ୍ର ପୋଲିସ ଅଧିକାରୀ ସାମିଲ ଥିଲେ। ମୃତକଙ୍କ ମଧ୍ୟରେ ଚାରି ଜଣ ପୋଲିସ ଅଧିକାରୀ ମଧ୍ୟ ସାମିଲ ରହିଛନ୍ତି। ରିଓର ରାଜ୍ୟପାଳ କ୍ଲାଉଡିଓ କାଷ୍ଟ୍ରୋ, କମ୍ପ୍ଲେକ୍ସୋ ଦା ପେନ୍ହା ଏବଂ କମ୍ପ୍ଲେକ୍ସୋ ଡୋ ଆଲେମାଓ ନିକଟରେ କରାଯାଇଥିବା ଏହି ଅପରେସନକୁ ରାଜ୍ୟର ଇତିହାସର ସବୁଠାରୁ ବଡ଼ ଅପରେସନ ବୋଲି ବର୍ଣ୍ଣନା କରିଛନ୍ତି।
ଜାତିସଂଘ କହିଛି ଯେ ଗରିବ ସମ୍ପ୍ରଦାୟ ବିରୁଦ୍ଧରେ ପୋଲିସର ଏହି କଡା କାର୍ଯ୍ୟାନୁଷ୍ଠାନ ଏକ ଚିନ୍ତାଜନକ ଧାରା ବୃଦ୍ଧି କରୁଛି ଏବଂ ଆଇନ ପ୍ରବର୍ତ୍ତନ ଏଜେନ୍ସିଗୁଡ଼ିକ ଦ୍ୱାରା ବଳ ପ୍ରୟୋଗ ବିଷୟରେ ଗମ୍ଭୀର ପ୍ରଶ୍ନ ଉଠାଇଛି। ଜାତିସଂଘ ବ୍ରାଜିଲ ସରକାରଙ୍କୁ ଆନ୍ତର୍ଜାତୀୟ ମାନବାଧିକାର ଆଇନ ପାଳନ କରିବା ଏବଂ ଘଟଣାର ଶୀଘ୍ର ଏବଂ ନିରପେକ୍ଷ ତଦନ୍ତ ସୁନିଶ୍ଚିତ କରିବାକୁ ଆହ୍ୱାନ କରିଛି।
ଆପଣଙ୍କୁ ଜଣାଇରଖୁ ଯେ, ବ୍ରାଜିଲର ରିଓ ଡି ଜେନେରିଓ ଏକ ଲୋକପ୍ରିୟ ପର୍ଯ୍ୟଟନ ସ୍ଥଳ ଭାବରେ ଜଣାଶୁଣା। ତେବେ, ଏହି ଅଞ୍ଚଳରେ ଭାରି ମାତ୍ରାରେ ଡ୍ରଗ୍ସ ଚାଲାଣ ହେଉଥିବାରୁ ଏହି ଅଞ୍ଚଳରେ ପୋଲିସ ଚଢାଉ ଏକ ସାଧାରଣ ଘଟଣା। ଏହି ଅଞ୍ଚଳରେ ଅନେକ ଗରିବ ବସ୍ତି ରହିଛି, ଯାହା ଡ୍ରଗ୍ସ ଚାଲାଣ ଦ୍ୱାରା ପ୍ରୋତ୍ସାହିତ ଅପରାଧର ଏକ ନେଟୱାର୍କକୁ ଜନ୍ମ ଦେଇଛି।
