ଭୁବନେଶ୍ଵର, ୧୬/୧୦ : ନବୀନଙ୍କୁ ଜନ୍ମଦିନର ଶୁଭେଚ୍ଛା ଜଣାଇଲେ ମୁଖ୍ୟମନ୍ତ୍ରୀ। ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କୁ ଫୋନ୍ କରି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଜନ୍ମଦିନର ଶୁଭେଚ୍ଛା ଜଣାଇଛନ୍ତି। ଦୀର୍ଘ ନିରାମୟ ଜୀବନ ପାଇଁ ମହାପ୍ରଭୁଙ୍କ ଶ୍ରୀଜଗନ୍ନାଥଙ୍କ ନିକଟରେ ପ୍ରାର୍ଥନା କରିଛନ୍ତି। 

​​​​​​​​​​​​​​

ବିରୋଧୀ ଦଳ ନେତା ନବୀନ ପଟ୍ଟନାୟକ ୮୦ ବର୍ଷରେ ପଦାର୍ପଣ କରିଛନ୍ତି । ତାଙ୍କ ଜନ୍ମଦିନରେ ବିଭିନ୍ନ ମହଲରୁ ଶୁଭେଚ୍ଛା ଓ ଅଭିନନ୍ଦନର ସୁଅ ଛୁଟିଛି । ନିଜ ଶାସନ କାଳ ମଧ୍ୟରେ ସେ ବହୁ ରେକର୍ଡ ଭାଙ୍ଗିଛନ୍ତି, ଅନେକ ଯୋଡ଼ିଛନ୍ତି ।  କେବଳ ୫ ପାଳିର ମୁଖ୍ୟମନ୍ତ୍ରୀ ଭାବେ ନୁହଁ,  ନିଜର ସରଳତା ଓ ନିରଳସ ଜୀବନ ଯାପନ ପାଇଁ ଜାତୀୟ ରାଜନୀତିରେ ଭିନ୍ନ ପରିଚୟ ସୃଷ୍ଟି କରିପାରିଛନ୍ତି ନବୀନ ପଟ୍ଟନାୟକ । ଗରିବୀର ବିକଳ ଚିତ୍ର ବଦଳିଲା । ରୂପାନ୍ତରଣର ମଡେଲ ପାଲଟିଲା। ରାଜ୍ୟର ଅର୍ଥନୀତିକୁ ସଶକ୍ତ ଓ ସୁଦୃଢ଼ କରି ଟ୍ରାକକୁ ଆଣିବାର ଶ୍ରେୟ ପାଇଁ ଇତିହାସ ତାଙ୍କୁ ମନେ ରଖିବ । ତାଙ୍କ ଅମଳରେ ରାଜ୍ୟ ଦେଖିଛି ସରକାର ଓ ପ୍ରଶାସନରେ ବଡ଼ ସଂସ୍କାର ।  ୨୦୦୦ ମାର୍ଚ୍ଚ ୫ରୁ ୨୦୨୪ । ଓଡ଼ିଶାର  ମୁଖ୍ୟମନ୍ତ୍ରୀ ଭାବେ ୨୪ ବର୍ଷର ଏ ଲମ୍ବା  ଯାତ୍ରାରେ ସେ ପାଇଛନ୍ତି ଈର୍ଷଣୀୟ ସଫଳତା । ବିକାଶ ମାନଚିତ୍ରରେ ଓଡ଼ିଶା ଅନେକ ଉପରକୁ ଉଠିଛି। ଦେଶରେ ସର୍ବାଧିକ ଦାରିଦ୍ର୍ୟ ହ୍ରାସ କରିବାରେ ଓଡ଼ିଶା ହିଁ ରହିଛି ଶୀର୍ଷରେ । ରାଜନୀତିର ପ୍ରତିଦ୍ୱନ୍ଦ୍ୱୀ ଦଳ ହୁଅନ୍ତୁ କି ଅନ୍ୟ ରାଜ୍ୟର ରାଜନେତା, ସବୁ  ମହଲରେ ନବୀନଙ୍କର ରହିଛି ସ୍ୱତନ୍ତ୍ର ସମ୍ମାନ। ଜାତୀୟ ରାଜନୀତିରେ ନବୀନଙ୍କ ପତିଆରା ସବୁବେଳେ  ରହିଛି । ଏବେ ବି ନବୀନଙ୍କ ବ୍ୟକ୍ତିତ୍ୱକୁ ସବୁ ଦଳର  ରାଜନେତା ସମ୍ମାନ କରନ୍ତି ।