କଟକ,୦୭/୧୦: ଅଧା ଓଡ଼ିଶାକୁ ଖାଦ୍ୟ ସାମଗ୍ରୀ ଯୋଗାଉଥିବା ମାଲଗୋଦାମ୍ରେ ଚାରି ଦିନ ହେଲା ତାଲା । କୁମାର ପୂର୍ଣ୍ଣିମା ପାଇଁ ଯେଉଁଠି କପଡ଼ା ବଜାର ଉଛୁଳି ପଡ଼ିଥାନ୍ତା ସେଠି ନିରବତା ଛାଇ ଯାଇଛି । ପନିପରିବାର ବଡ଼ ବଜାର ଛତ୍ରବଜାର ଦିନତମାମ୍ ଖାଁ ଖାଁ ଥିଲା । ସ୍ୱାସ୍ଥ୍ୟ ରାଜଧାନୀ କୁହାଯାଉଥିବା କଟକର ଏସ୍ସିବି ମେଡିକାଲ୍ ସମେତ ସରକାରୀ ଓ ଅଧିକାଂଶ ଘରୋଇ ନର୍ସିଂହୋମ୍, ଯେଉଁଠି ରୋଗୀ ହାଉଯାଉ ହେଉଥାନ୍ତି, ସେସବୁ ସ୍ଥାନ ଖାଲି । ଆଜିକା ସମୟରେ ୟୁପିଆଇରେ ଅଧିକାଂଶ କାରବାର ଚାଲୁଥିବା ବେଳେ ଇଣ୍ଟରନେଟ୍ ସେବା ବନ୍ଦ ପାଇଁ ୟୁପିଆଇରେ କାରବାର ହୋଇ ନପାରିବାରୁ ବ୍ୟବସାୟିକ କାର୍ଯ୍ୟ ମଧ୍ୟ ହୋଇପାରିନାହିଁ । ଫଳରେ ସହରର ପୂରା ବ୍ୟବସାୟୀକ କାରବାର ଠପ୍ ହୋଇଯାଇଛି । ଏଥିଯୋଗୁଁ ପ୍ରାୟ ୫୦୦ କୋଟି ଟଙ୍କାର କ୍ଷତି ହୋଇଥିବା ଆକଳନ କରାଯାଇଛି ।
କର୍ଫ୍ୟୁ ଯୋଗୁଁ ବ୍ୟବସାୟୀକ ପେଣ୍ଠ ଭାବେ କଟକ ସମ୍ପୂର୍ଣ୍ଣ ଠପ୍ ହୋଇଯାଇଥିଲା । ବନ୍ଦ ପ୍ରଭାବରେ ସବୁଠାରୁ ଅଧିକ ପ୍ରଭାବିତ ହୋଇଛି ମାଲଗୋଦାମ । କାରଣ ମାଲଗୋଦାମ ଦଶହରା ଦିନଠାରୁ ବନ୍ଦ ରହିଥିଲା । ଦଶହରା ପରଦିନ ଭସାଣି ପାଇଁ ମଧ୍ୟ ମାଲଗୋଦାମ ବନ୍ଦ ରଖାଯାଇଥିଲା । ଶନିବାର ମାଲଗୋଦାମ ଖୋଲିଥିଲା । କିନ୍ତୁ ଏତେ କାରବାର ହୋଇପାରିନଥିଲା । ପୁନର୍ବାର ରବିବାର ମାଲଗୋଦାମ ବନ୍ଦ ରହିବା ପରେ ସୋମବାର ଖୋଲାଯିବାକୁ ନିଷ୍ପତ୍ତି ହୋଇଥିଲା । କିନ୍ତୁ ଭସାଣି ପରବର୍ତ୍ତୀ ଗଣ୍ଡଗୋଳ ପାଇଁ ଗତକାଲି କଟକ ବନ୍ଦ ଡାକରା ଦିଆଯିବା ପରେ ଏହି ସ୍ଥିତିର ମୁକାବିଲା ପାଇଁ ପ୍ରଶାସନକୁ କର୍ଫ୍ୟୁ ଘୋଷଣା କରିବାକୁ ପଡ଼ିଲା । ଫଳରେ ମାଲଗୋଦାମର ସବୁ କାରବାର ସମ୍ପୂର୍ଣ୍ଣ ଠପ୍ ହୋଇଯାଇଥିଲା ।
କଟକ ଚାମ୍ବର ଅଫ୍ କମର୍ସର ସାଧାରଣ ସମ୍ପାଦକ ପ୍ରଫୁଲ୍ଲ ଛାଟୋଇ କହିଛନ୍ତି ଯେ, ମାଲଗୋଦାମରେ ଦୈନିକ ପ୍ରାୟ ୫୦ରୁ ୬୦କୋଟି ଟଙ୍କାର କାରବାର ହୋଇଥାଏ । କିନ୍ତୁ ଗତ ତିନିଦିନ ଧରି ମାଲଗୋଦାମ ବନ୍ଦ ରହିବା ଫଳରେ ଏବେ ବଜାରରେ ନିତ୍ୟ ବ୍ୟବହାର୍ଯ୍ୟ ସାମଗ୍ରୀର ସଙ୍କଟ ଦେଖାଦେବାର ଆଶଙ୍କା ରହିଛି । କାରଣ ବଜାରରୁ ଖାଦ୍ୟ ସାମଗ୍ରୀ ସରି ଆସୁଛି । ଦଶହରା ପୂର୍ବରୁ ବ୍ୟବସାୟୀମାନେ ଡାଲି, ତେଲ ଆଦି ସାମଗ୍ରୀ ନେଇଥିଲେ । ଦଶହରା ପରେ ପୁଣି ବ୍ୟବସାୟ ଆରମ୍ଭ ହେବା କଥା । କିନ୍ତୁ ଦଶହରା ପରେ ମଧ୍ୟ ମାଲଗୋଦାମ ଖୋଲି ନପାରିବାରୁ ଏହା କେବଳ ବ୍ୟବସାୟିକ କ୍ଷତି ପହଞ୍ଚାଉନାହିଁ ଖାଉଟିମାନଙ୍କ ସମସ୍ୟା ବଢ଼ାଇ ଦେଇଛି । ଯଦି ଆଉ ଦିନେ ଦୁଇଦିନ ଏହି ସ୍ଥିତି ଲାଗିରହେ ମାଲଗୋଦାମରୁ ଡାଲି, ତେଲ ଆଦି ସାମଗ୍ରୀ ନେଉଥିବା ଅନ୍ୟାନ୍ୟ ଜିଲ୍ଲାରେ ମଧ୍ୟ ଅଭାବ ଦେଖାଦେବ ବୋଲି ସେ ଆଶଙ୍କା ବ୍ୟକ୍ତ କରିଛନ୍ତି ।
ଅନ୍ୟପକ୍ଷରେ ଇଣ୍ଟରନେଟ୍ ବନ୍ଦ ପାଇଁ ବ୍ୟାଙ୍କ୍ କାରବାର ହୋଇପାରୁନଥିବାରୁ ଅନ୍ୟ ରାଜ୍ୟରୁ ମଧ୍ୟ ଡାଲି, ତେଲ ଆଦି ସାମଗ୍ରୀ ଆସିବାରେ ସମସ୍ୟା ଦେଖାଦେଇଛି । ବିଭିନ୍ନ ରୋଗର ଚିକିତ୍ସା ପାଇଁ ଦୈନିକ ହଜାର ହଜାର ସଂଖ୍ୟାରେ ରୋଗୀ ସ୍ୱାସ୍ଥ୍ୟ ରାଜଧାନୀ କଟକକୁ ଆସିଥାନ୍ତି । ଏଠି ରାଜ୍ୟର ସର୍ବବୃହତ ଏସ୍ସିବି ମେଡିକାଲ୍, ଶିଶୁ ଭବନ, କ୍ୟାନ୍ସର୍ ହସ୍ପିଟାଲ ସହ ବହୁ ଘରୋଇ ମେଡିକାଲ୍, ନର୍ସିଂହୋମ୍ ଆଦି ରହିଛି । ସୋମବାର କଟକ ସମ୍ପୂର୍ଣ୍ଣ ବନ୍ଦ ଥିବାରୁ ରୋଗୀମାନେ ମଧ୍ୟ କଟକ ଆସିପାରିନଥିଲେ । ମେଡିକାଲ୍, ନର୍ସିଂହୋମ୍ ଗୁଡ଼ିକ ଖାଁ ଖାଁ ଥିଲା । ବହୁ ସ୍ଥାନରେ ବନ୍ଦ ଭୟରେ ମେଡିସିନ୍ ଷ୍ଟୋର୍ ମଧ୍ୟ ବନ୍ଦ ରହିଥିଲା । ଦୈନିକ ପ୍ରାୟ ୫୦ କୋଟି ଟଙ୍କାର କାରବାର୍ ସମ୍ପୂର୍ଣ୍ଣ ଠପ୍ ହୋଇଯାଇଛି । ଅନ୍ଲାଇନ୍ ଦ୍ୱାରା ପରିଚାଳିତ ହେଉଥିବା ୟୁପିଆଇ ନଚାଲିବାରୁ ଆର୍ଥିକ କାରବାର ବଡ଼ ସମସ୍ୟା ସୃଷ୍ଟି ହୋଇଛି । ଏବେ କ୍ୟାସ୍ ଅପେକ୍ଷା ୟୁପିଆଇ କାରବାର ଉପରେ ଅଧିକାଂଶ ଲୋକେ ନିର୍ଭରଶୀଳ । ନେଟ୍ ନଥିବାରୁ ଲୋକେ ୟୁପିଆଇରେ କାରବାର କରିପାରି ନଥିଲେ । ଅପରପକ୍ଷରେ ଏଟିଏମ୍ରୁ ମଧ୍ୟ ପଇସା ଉଠାଇବା ସମ୍ଭବ ହୋଇପାରିନଥିଲା । ଫଳରେ ଆର୍ଥିକ କାରବାର ବାଧାପ୍ରାପ୍ତ ହୋଇଛି । ଦଶହରା ଯାଇଥିଲେ ମଧ୍ୟ କପଡ଼ା ବଜାର ବ୍ୟବସାୟରେ ମାନ୍ଦାବସ୍ଥା ଆସିନଥିଲା । କାରଣ ସୋମବାର ଓ ମଙ୍ଗଳବାର ଦୁଇ ଦିନ ପାଇଁ କୁମାର ପୂର୍ଣ୍ଣିମା ପାଳନ ହେବାର ଥିବାରୁ ବ୍ୟବସାୟ ବଢିବା ଆଶା କରାଯାଉଥିଲା । କିଛି ସ୍ଥାନରେ ସୋମବାର କୁମାର ପୂର୍ଣ୍ଣିମା ପାଳନ ହୋଇଥିଲାବେଳେ ମଙ୍ଗଳବାର କିଛି ସ୍ଥାନରେ କୁମାର ପୂର୍ଣ୍ଣିମା ପାଳନ ହେବ ବୋଲି ଜଣାପଡ଼ିଛି । ଏଥିପାଇଁ କପଡ଼ା ବଜାରରେଗହଳି ହେବ ବୋଲି ଆଶା କରାଯାଉଥିଲା । କୁମାର ପୂର୍ଣ୍ଣିମା ପାଇଁ ଝିଅମାନଙ୍କ ଷ୍ଟେସନାରୀ ସାମଗ୍ରୀ ବଜାର ମଧ୍ୟ ଚାହିଦାରେ ରହିଥାନ୍ତା । କିନ୍ତୁ ବଜାର ବନ୍ଦ ହୋଇଯିବାରୁ ଏସବୁ ବ୍ୟବସାୟ ସମ୍ପୂର୍ଣ୍ଣ ଫିକା ପଡ଼ିଯାଇଛି ।
ଦଶହରା ଚାରିଦିନ ଆଗରୁ କଟକରେ ୱାନ୍-ୱେ ଟ୍ରାଫିକ୍ କଟକଣା ଲାଗୁ ହୋଇଥିଲା । ଏହି କଟକଣା ଯୋଗୁଁ କଟକ ସହରର ବ୍ୟବସାୟୀକ ପେଣ୍ଠସ୍ଥଳୀ ନୟାସଡ଼କ, ପିଠାପୁର, ଝୋଲାସାହି, ଚୌଧୁରୀ ବଜାରରେ ବ୍ୟବସାୟ ବାଧାପ୍ରାପ୍ତ ହୋଇଥିଲା । ଦଶହରା ପରେ କୁମାର ପୂର୍ଣ୍ଣିମା ପାଇଁ ପୁଣି ଥରେ ବେପାର ଜୋର୍ ଧରିବ ବୋଲି ଆଶା କରାଯାଉଥିଲା । କିନ୍ତୁ ଭସାଣି ପରର ଗଣ୍ଡଗୋଳ ଏବଂ ଏହା ପରେ କର୍ଫ୍ୟୁ ପାଇଁ ଏହିସବୁ ଅଞ୍ଚଳରେ ବେପାର ଠପ୍ ହୋଇଯାଇଛି । ଛତ୍ରବଜାର ମଧ୍ୟ ଆଜି ସମ୍ପୂର୍ଣ୍ଣ ବନ୍ଦ ରହିଥିବାବେଳେ କଟକ ବିଭିନ୍ନ ଜିଲ୍ଲା ତଥା ରାଜ୍ୟରୁ ଆସୁଥିବା ପରିବା ଗାଡ଼ି କଟକ ବାହାରେ ଛିଡ଼ା ହୋଇଛି । କର୍ଫ୍ୟୁ ଯୋଗୁଁ କଟକରେ ବ୍ୟବସାୟ ସମ୍ପୂର୍ଣ୍ଣ ଠପ୍ ହୋଇଯାଇଥିବାରୁ ପ୍ରାୟ ୫୦୦ କୋଟି ଟଙ୍କାର କାରବାର କ୍ଷତି ହୋଇଥିବା ଆକଳନ କରାଯାଉଛି ।
