ପୁରୀ,୦୪/୧୦: ଗାଁରେ ବାଜିଲା ଘଣ୍ଟ । କୋଠଘର କାନ୍ଥରେ ଲାଗିଲା ନୋଟିସ୍ । ଗ୍ରାମ ଭିତରେ ଯିଏ ନିଶା ଖାଇବ ବା ବିକ୍ରି କରିବ ୧୦ ହଜାର ଜରିମାନା ଦେବ । ଧରାପଡ଼ିଲେ ଗ୍ରାମବାସୀ ଉକ୍ତ ବ୍ୟକ୍ତିଙ୍କ ନାମରେ ବିଶୃଙ୍ଖଳା କରୁଥିବା ନେଇ ଥାନାରେ ଏତଲା ଦେବେ । ନିଶା ସେବନ ଓ ବିକ୍ରି କରୁଥିବା ବ୍ୟକ୍ତିଙ୍କ ସୂଚନା ଦେଲେ ଗ୍ରାମ କମିଟି ସୂଚନାଦାତାଙ୍କୁ ୫ ହଜାର ଟଙ୍କାର ପୁରସ୍କାର ଦେବ । ଗ୍ରାମବାସୀଙ୍କୁ ଏଭଳି ଚରମବାଣୀ ଶୁଣାଇଛି ଗ୍ରାମ କମିଟି । ଗାଁରେ ବିଡି, ସିଗାରେଟ୍, ଗୁଟ୍ଖା ବିକ୍ରି ଓ ବ୍ୟବହାର ମଧ୍ୟ ମନା ବୋଲି କଟକଣା ଜାରି ହୋଇଛି । ପୁରୀ ଜିଲ୍ଲା ଚନ୍ଦନପୁର ଥାନା ଅନ୍ତର୍ଗତ ଖଣ୍ଡିଘର ଗ୍ରାମ ମୁରବିମାନେ ନେଇଛନ୍ତି ଏଭଳି ନିଷ୍ପତ୍ତି ।
ନିଶା ସେବନ ଓ ବିକ୍ରି ବଢ଼ୁଥିବାରୁ ଗ୍ରାମରେ ବିଶୃଙ୍ଖଳା ବଢ଼ିବା, ଯୁବପିଢ଼ିମାନଙ୍କ ଭବିଷ୍ୟତ ଅନ୍ଧାର ଆଡ଼କୁ ଗତି କରୁଥିବା ଦେଖି ଗ୍ରାମ ମୁରବିମାନେ ଏହି ନିଷ୍ପତ୍ତି ନେଇଛନ୍ତି । ନିଶା ସେବନ ଦ୍ୱାରା ଅନେକଙ୍କ ମୃତ୍ୟୁ ହେବା ଓ ଅନେକଙ୍କ ପରିବାର ଉଜୁଡ଼ି ଯାଇଛି । କଟକଣା ପରେ ଗାଁରେ ଥିବା ରାସନ କିମ୍ବା ପାନ ଦୋକାନରେ ବିଡି, ସିଗାରେଟ୍, ଗୁଟ୍ଖା ମିଳୁନି । ସମ୍ପୂର୍ଣ୍ଣ ରୂପେ ଗାଁ ନିଶା ମୁକ୍ତ ହୋଇଛି । ନିଶାମୁକ୍ତିକୁ ଗ୍ରାମର ସମସ୍ତ ବ୍ୟକ୍ତି ଗ୍ରହଣ କରିଛନ୍ତି । ଯାହା ଅନ୍ୟ ମହଲରେ ପ୍ରଶଂସାର ବିଷୟ ହୋଇଛି ।
ବେଆଇନ ନିଶା ବିକ୍ରି ନେଇ ଗ୍ରାମର ଅନେକ ବ୍ୟକ୍ତିଙ୍କ ନାମରେ ମାମଲା ପୁଲିସରେ ହେବା ଓ ଗ୍ରାମର ନାମ ବଦନାମ ହେଉଥିବାରୁ ଏଥିରୁ ଖ୍ୟାନ୍ତି ପାଇବାକୁ ଗ୍ରାମ କମିଟି ବୈଠକ ହୋଇଥିଲା । ଗ୍ରାମର ୧୦୦ ପରିବାରଙ୍କ ଉପସ୍ଥିତିରେ ବୈଠକ ହୋଇଥିଲା । ଗ୍ରାମକୁ ନିଶାମୁକ୍ତ କରିବାକୁ ନିଷ୍ପତ୍ତି ହୋଇଥିଲା । ଯାହା ପରେ କଟକଣା ଜାରି ହୋଇଛି । ଗ୍ରାମରେ ଘଣ୍ଟା ବାଡେଇ କଟକଣା କରାଯିବା ପରେ ନିଶା ବ୍ୟବହାର କମିଥିବା ଗ୍ରାମବାସୀ କହିଛନ୍ତି । ଯୁବପିଢ଼ିଙ୍କ ଭବିଷ୍ୟତ ସୁରକ୍ଷା ନିମନ୍ତେ ଏପରି ପଦକ୍ଷେପ ନିଆଯାଇଥିବା ସ୍ଥାନୀୟ ବାସିନ୍ଦା ବାହୁଡ଼ା ପ୍ରଧାନ କହିଛନ୍ତି।
