ଭୁବନେଶ୍ବର, ୦୬/୧୦: ସ୍ବପ୍ନ ଭାଙ୍ଗିଗଲା, ଆଶା ରହିଗଲା । ବିସର୍ଜନ ନେଲା ବିଶ୍ବକପ ବିଜୟ ବିଶ୍ବାସ । ଆଷ୍ଟ୍ରେଲିଆ ଟୁର୍ ରୋହିତଙ୍କ ଶେଷ ସିରିଜ୍ । ସରିଗଲା ହିଟ୍ମ୍ୟାନ୍ଙ୍କ କ୍ୟାପଟେନ୍ସି ଯୁଗ । ‘ଗାର୍ଡେନ ମେଁ କୋଇ ନୈହିଁ ଘୁମେଗା । ଜ୍ୟାଦା ହିରୋ ମତ୍ ବନୋ, ହେଲମଟ୍ ଲଗା । ଓଏ ଯଶୁ ଗଲି କ୍ରିକେଟ୍ ଖେଲ୍ନେ ଆୟା ହେ କ୍ୟା । ଜବତକ୍ ବଲ୍ ନୈହିଁ ପଡ଼େଗା ତବତକ୍ ଉଠନା ନୈହିଁ । ଆଗେ ଡାଲେଗା ତୋ ଦେତାହୁଁ ନା’ । କ୍ରିକେଟ୍ ଚାଲିବ, କିନ୍ତୁ ଷ୍ଟମ୍ପ୍ ମାଇକ୍ରେ ଆଉ ଏ ସ୍ବର ଶୁଭିବନି । ପଡ଼ିଆରେ ଚାଲିବନି ରୋହିତ୍ ରାଜ୍ । କାରଣ ହିଟ୍ମ୍ୟାନଙ୍କୁ କ୍ୟାପଟେନ୍ସିରୁ ହଟାଇ ବିସିସିଆଇ ‘Thank you so much’ କହି ଦେଇଛି । ରୋହିତ ଶର୍ମା ଏବେ କେବଳ ଜଣେ ସାଧାରଣ ପ୍ଲେୟାର ଭାବେ ଭାରତୀୟ ଦଳରେ ଖେଳିବେ । ସେଥିରେ ପୁଣି ପର୍ଫମାନ୍ସ ଦେଖାଇବାକୁ ପଡ଼ିବ, ନହେଲେ ଅକ୍ଟୋବର ୧୯ରେ ହେବାକୁ ଥିବା ଅଷ୍ଟ୍ରେଲିଆ ସିରିଜ୍ ରୋହିତଙ୍କ ପାଇଁ ହେବ ଶେଷ ଦିନିକିଆ ଶୃଙ୍ଖଳା ।
୨୦୨୩ ଦିନିକିଆ ବିଶ୍ବକପ୍ ଫାଇନାଲରେ ପରାସ୍ତ ପରେ ଭାଙ୍ଗିପଡ଼ିଥିଲେ ରୋହିତ୍ ଶର୍ମା । କେବଳ ହିଟ୍ମ୍ୟାନ ନୁହେଁ, ଅନେକଙ୍କ ସ୍ବପ୍ନ ମଧ୍ୟ ଭାଙ୍ଗି ଚୂରମାର ହୋଇଯାଇଥିଲା । ବିଶ୍ବ ବିଜୟୀ ହେବା ବିଶ୍ବାସ ହରାଇଥିଲେ ସବୁ । ମାତ୍ର ୨୦୨୪ରେ ଟି-୨୦ ଓ୍ବାର୍ଲଡ କପ୍ ଏବଂ ଚମ୍ପିଆନ୍ସ ଟ୍ରଫି ଜିତାଇ ଫ୍ୟାନ୍ସଙ୍କ ଭାଙ୍ଗିଯାଇଥିବା ବିଶ୍ବାସକୁ ପୁଣି ଥରେ ଫେରାଇ ଆଣିଥିଲେ ରୋହିତ୍ । ହ୍ବାଇଟ୍ ବଲ୍ କ୍ରିକେଟରେ ଏବେବି ତାଙ୍କର ଦବଦବା ଚାଲୁଛି ବୋଲି ଦେଖାଇଥିଲେ । ଆଶା ରଖିଥିଲେ ନିଜ ନେତୃତ୍ବରେ ଟିମ୍ ଇଣ୍ଡିଆକୁ ୨୦୨୭ ଦିନିକିଆ ବିଶ୍ବକପ୍ ଜିତାଇବେ ବୋଲି । ହେଲେ ରୋହିତଙ୍କ ଲେଗେସି ବିସିସିଆଇର ବିଶ୍ବାସ ଜିତି ପାରିଲାନାହିଁ । କ୍ରିକେଟ୍ର ତିନୋଟି ଫର୍ମାଟରେ ୩ଜଣ ଅଧିନାୟକ ରଖିବା ସମ୍ଭବ ନୁହେଁ ଆଳ ଦେଖାଇ ରୋହିତଙ୍କୁ ଅଧିନାୟକତ୍ବରୁ ହଟାଇ ଦେଇଛି ଭାରତୀୟ କ୍ରିକେଟ୍ କଣ୍ଟ୍ରୋଲ୍ ବୋର୍ଡ । ସେଲେକ୍ସନ କମିଟି ସ୍ପଷ୍ଟ କରିଦେଇଛି ଯେ ହୁଏତ ହିଟମ୍ୟାନ୍ ଦକ୍ଷିଣ ଆଫ୍ରିକାରେ ହେବାକୁ ଥିବା ଓ୍ବାର୍ଲ୍ଡକପ୍ ଖେଳି ନପାରନ୍ତି । ଯଦି ବିଶ୍ବକପ୍ ଖେଳିବାକୁ ଚାହିଁବେ, ତେବେ ତାଙ୍କୁ ଘରୋଇ କ୍ରିକେଟ୍ ଅର୍ଥାତ୍ ବିଜୟ ହଜାରେ ଟ୍ରଫି ଖେଳିବାକୁ ପଡ଼ିବା । ବିସିସିଆଇର ଏହି ସର୍ତ୍ତ ରୋହିତଙ୍କୁ ରିଟାୟରମେଣ୍ଟ ନେବା ପାଇଁ ବାଧ୍ୟ କରିପାରେ ।
କ୍ରିକେଟ୍ ପଲିଟିକ୍ସ ଟ୍ରାପରେ ଫସିଗଲେ କି ହିଟ୍-ମ୍ୟାନ୍ ? ପ୍ରଶ୍ନ ଉଠାଇଲେଣି କ୍ରିକେଟ୍ ଫ୍ୟାନ୍ସ । ସେପଟେ ପୂର୍ବତନ କ୍ରିକେଟ୍ ମହମ୍ମଦ କୈଫ ସିଧା ସିଧା ବୋର୍ଡକୁ ଟାର୍ଗେଟ୍ କରିଛନ୍ତି । ରୋହିତ୍ ଶର୍ମା ଦେଶକୁ ୧୬ ବର୍ଷ ଦେଲେ, ହେଲେ ବିସିସିଆଇକୁ ତାଙ୍କୁ ବର୍ଷେ ଦେଇପାରିଲା ନାହିଁ । ତାଙ୍କ ନେତୃତ୍ବରେ ଟିମ୍ ଇଣ୍ଡିଆ ୧୬ ଆଇସିସି ମ୍ୟାଚ୍ରୁ ୧୫ଟିରେ ବିଜୟୀ ହୋଇଛି । ସେ କେବଳ ଗୋଟିଏ ମ୍ୟାଚ୍ ହାରିଥିଲେ, ଯାହା ୨୦୨୩ ଦିନିକିଆ ବିଶ୍ୱକପ୍ ଫାଇନାଲ୍ ଥିଲା । ୨୦୨୪ ଟି-ଟ୍ବେଣ୍ଟି ଓ୍ବାର୍ଲ୍ଡକପ୍ ଏବଂ ୨୦୨୫ ଚାମ୍ପିଅନ୍ସ ଟ୍ରଫି ଜିତାଇଥିଲେ ରୋହିତ୍ ଶର୍ମା । ତେଣୁ ତାଙ୍କୁ ଗୋଟିଏ ସୁଯୋଗ ଦେବାର ଥିବା ବୋଲି କୈଫ କହିଛନ୍ତି । ଅନ୍ୟପଟେ ବିସିସିଆଇ ହିଟ୍ମ୍ୟାନଙ୍କୁ ଅଧିନାୟକ ପଦରୁ ହଟାଇବା ପରେ ସୋସିଆଲ୍ ମିଡିଆରେ ବୟକଟ୍ ଅଜିତ୍ ଅଗକର ଟ୍ରେଣ୍ଡ ମଧ୍ୟ ଚାଲିଲାଣି ।
ରୋହିତ ଶର୍ମାଙ୍କୁ ୨୦୨୧ ଡିସେମ୍ବରରେ ଟିମ୍ ଇଣ୍ଡିଆର ଦିନିକିଆ ଫର୍ମାଟର ଅଧିନାୟକ ହୋଇଥିଲେ । ତାଙ୍କ ନେତୃତ୍ବରେ ଭାରତୀୟ ଦଳ ଓ୍ବାନଡେ’ରେ ମୋଟ୍ ୫୬ ମ୍ୟାଚ୍ରେ ୪୨ଟିରେ ବିଜୟୀ ହୋଇଛି । ୧୨ଟି ପରାଜୟ ମିଳିଥିବା ବେଳେ ଗୋଟିଏ ଟାଇ ଏବଂ ଗୋଟିଏ ମ୍ୟାଚ୍ ବିନା ଫଳାଫଳରେ ଶେଷ ହୋଇଛି । ଆଇସିସି ଇଭେଣ୍ଟରେ ଅଷ୍ଟ୍ରେଲିଆର ପୂର୍ବତନ ଅଧିନାୟକ ରିକି ପଣ୍ଟିଂ ଠାରୁ ତାଙ୍କ ବିଜୟ ପ୍ରତିଶତ ଅଧିକ ରହିଛି । ଓ୍ବନଡେ କ୍ରିକେଟରେ ୩ଟି ତିନୋଟି ଦ୍ବିଶତକ ମାରି ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି ରୋହିତ୍ । ଏହା ପରେ ବି ବିସିସିଆଇ ତାଙ୍କୁ ବିଶ୍ବକପ ପାଇଁ ଶେଷ ସୁଯୋଗ ନଦେବା କ୍ରିକେଟ୍ ଫ୍ୟାନ୍ସଙ୍କୁ ଗଭୀର ଆଘାତ ଦେଇଛି ।
