ନୂଆଦିଲ୍ଲୀ: କେନ୍ଦ୍ର କ୍ୟାବିନେଟ୍ ବୁଧବାର ନିଜର ବୈଠକରେ କେନ୍ଦ୍ରୀୟ ସରକାରୀ କର୍ମଚାରୀ ଓ ପେନ୍ସନଭୋଗୀଙ୍କ ପାଇଁ ୩% ମହଙ୍ଗା ଭତ୍ତା (ଡିଏ) ବୃଦ୍ଧିକୁ ମଞ୍ଜୁରୀ ଦେଇଛି। ଏହି ନୂଆ ଭତ୍ତା ଆସନ୍ତା ଜୁଲାଇ ମାସ ୧ ତାରିଖରୁ କାର୍ଯ୍ୟକାରି ହେବ। ଏହି ନିଷ୍ପତ୍ତି ପ୍ରାୟ ଏକ କୋଟି କର୍ମଚାରୀ ଓ ପେନ୍ସନଭୋଗୀଙ୍କୁ ମୂଲ୍ୟବୃଦ୍ଧିର ପ୍ରଭାବରୁ ଆରାମ ଦେବାକୁ ଲକ୍ଷ୍ୟ ରଖିଛି।
ଆପଣଙ୍କୁ ଜଣାଇରଖୁ ଯେ, ମହଙ୍ଗା ଭତ୍ତା ହେଉଛି ଏକ ଜୀବନଧାରଣ ଖର୍ଚ୍ଚ ସମନ୍ୱୟ ଭତ୍ତା, ଯାହା ସରକାର ନିଜ ଅଦିନସ୍ତ କର୍ମଚାରୀ ଓ ପେନ୍ସନଭୋଗୀଙ୍କୁ ମୂଲ୍ୟବୃଦ୍ଧିର ପ୍ରଭାବ ହ୍ରାସ କରିବା ପାଇଁ ପ୍ରଦାନ କରିଥାନ୍ତି। ଏହି ବୃଦ୍ଧି ଚାକିରି କରୁଥିବା କର୍ମଚାରୀ ଏବଂ ଅବସରପ୍ରାପ୍ତ କର୍ମଚାରୀ ଉଭୟଙ୍କୁ ଉପକୃତ କରିଥାଏ। ଏହି ବୃଦ୍ଧି ଶିଳ୍ପ ଶ୍ରମିକଙ୍କ ପାଇଁ ଉପଭୋକ୍ତା ମୂଲ୍ୟ ସୂଚକାଙ୍କ (ସିପିଆଇ) ତଥ୍ୟ ଆଧାରରେ ସୁପାରିଶ ଅନୁଯାୟୀ କରାଯାଇଛି, ଯାହା ବର୍ଷକୁ ଦୁଇଥର ଡିଏ ସଂଶୋଧନର ଆଧାର ହୋଇଥାଏ।
ଡିଏ ସାଧାରଣତଃ ଜାନୁଆରୀ ଓ ଜୁଲାଇରେ ସଂଶୋଧନ କରାଯାଇ କର୍ମଚାରୀଙ୍କୁ ମୂଲ୍ୟବୃଦ୍ଧି ସହ ସାମଞ୍ଜସ୍ୟ ରଖିବାରେ ସହାୟତା କରିଥାଏ। ଚଳିତ ବର୍ଷ ମାର୍ଚ୍ଚରେ ସରକାର ୨% ଡିଏ ବୃଦ୍ଧିକୁ ମଞ୍ଜୁରୀ ଦେଇଥିଲେ, ଯାହା ମୂଳ ଦରମା ଓ ପେନ୍ସନର ୫୩% ରୁ ୫୫% କୁ ବୃଦ୍ଧି କରିଥିଲା। ନୂଆ ବୃଦ୍ଧି ସହିତ ଏହାର ପରିମାଣ ଆହୁରି ବୃଦ୍ଧି ପାଇବ, ଯାହା କର୍ମଚାରୀଙ୍କ ହାତକୁ ଆସୁଥିବା ଦରମା ଓ ପେନ୍ସନକୁ ସିଧାସଳଖ ବୃଦ୍ଧି କରିବ।
ଉଦାହରଣ ସ୍ୱରୂପ, ଜଣେ କର୍ମଚାରୀଙ୍କର ଯଦି ମୂଳ ଦରମା ୫୦,୦୦୦ ଟଙ୍କା ହୁଏ ତେବେ ପୂର୍ବ ବୃଦ୍ଧି ପରେ ସେ ଡିଏ ଭାବେ ୨୬,୫୦୦ ଟଙ୍କା ପାଉଛନ୍ତି। ନୂଆ ବୃଦ୍ଧି ସହିତ ଏହି ପରିମାଣ ଆହୁରି ବୃଦ୍ଧି ପାଇବ, ଯାହା ଉଚ୍ଚ ଜୀବନଧାରଣ ଖର୍ଚ୍ଚ ମଧ୍ୟରେ କିଛି ଆରାମ ପ୍ରଦାନ କରିବ। ଏହି ନିଷ୍ପତ୍ତି ପାର୍ବଣ ଋତୁ ପୂର୍ବରୁ କେନ୍ଦ୍ରୀୟ କର୍ମଚାରୀ ଓ ପେନ୍ସନଭୋଗୀଙ୍କ ହାତକୁ ଅଧିକ ଟଙ୍କା ଆଣିବ। ଏହା ଉପଭୋକ୍ତା ଖର୍ଚ୍ଚରେ ମଧ୍ୟ ସକାରାତ୍ମକ ପ୍ରଭାବ ପକାଇବ ବୋଲି ଆଶା କରାଯାଉଛି।
