ଆଡିଲେଡ୍,୨୩/୧୦: ଅଷ୍ଟ୍ରେଲିଆ-ଭାରତ ୩ ମ୍ୟାଚ ବିଶିଷ୍ଟ ଦିନିକିଆ ସିରିଜର ଦ୍ୱିତୀୟ ମ୍ୟାଚ୍ ଆଡିଲେଡରେ ଖେଳାଯିବ । ପର୍ଥରେ ବର୍ଷା ବାଧାପ୍ରାପ୍ତ ପ୍ରଥମ ମ୍ୟାଚ୍ରେ ଭ୍ରମଣକାରୀ ଭାରତ ଶୋଚନୀୟ ଭାବେ ପରାଜିତ ହୋଇଥିଲା । ସ୍ଥାନୀୟ ପାଣିପାଗ କେନ୍ଦ୍ରର ସୂଚନା ଅନୁସାରେ ଆଜି ଦ୍ୱିତୀୟ ମ୍ୟାଚ୍ରେ ବର୍ଷାର ସମ୍ଭାବନା ନାହିଁ । ଘରୋଇ ଦଳ ଏହି ମ୍ୟାଚ୍ ଜିତି ସିରିଜ କବ୍ଜା କରିବାର ଅପେକ୍ଷାରେ ରହିଥିବାବେଳେ ଭାରତ ସିରିଜକୁ ପ୍ରତ୍ୟାବର୍ତ୍ତନ କରିବାକୁ ଲକ୍ଷ୍ୟ ରଖିଛି । ତେଣୁ ଦୁଇ ଦଳ ଆଡିଲେଡରେ ଶକ୍ତି ପରୀକ୍ଷା ଦେବେ । ମ୍ୟାଚ୍ ଭାରତୀୟ ସମୟ ସକାଳ ୯ଟାରୁ ଆରମ୍ଭ ହେବ ।
ପର୍ଥରେ ଜୋସ ହାଜେଲଉଡ୍ ଓ ମିଚେଲ ଷ୍ଟାର୍କ ଯେମିତି ପ୍ରାରମ୍ଭରୁ ଘାତକ ସାଜିଥିଲେ ତାହା ଅତି ଅଦ୍ଭୁତ ରହିଥିଲା । ରୋହିତ ଶର୍ମା, ବିରାଟ କୋହଲି, ଶ୍ରେୟାସ ଆୟର ଓ ଅଧିନାୟକ ଶୁଭମନ ଗିଲ ମାତ୍ର ୪୫ ରନ ମଧ୍ୟରେ ପାଭିଲିୟନ ଫେରି ଯାଇଥିଲେ । ଚାମ୍ପିଅନ୍ସ ଟ୍ରଫି ପରେ ଦିନିକିଆକୁ ପ୍ରତ୍ୟାବର୍ତ୍ତନ କରିଥିବା ଦୁଇ ଭେଟେରାନ ରୋହିତ ଓ କୋହଲି ପ୍ରଶଂସକଙ୍କୁ ନିରାଶ କରିଥିଲେ । କିନ୍ତୁ ଆଲିଲେଡ୍ରେ ପିଚ ବ୍ୟାଟିଂକୁ ସୁହାଇବ । ତେଣୁ ଏଠାରେ ‘ରୋକୋ’ ଯୋଡ଼ି କିଛି ଚମତ୍କାର କରି ଦେଖାଇବେ ବୋଲି ଆଶା କରାଯାଉଛି ।
କ୍ୟାରୀ, ଜାମ୍ପା ଫେରିବେ
ଅଷ୍ଟ୍ରେଲିଆ ପର୍ଥରେ ଉଭୟ ବୋଲିଂ ଓ ବ୍ୟାଟିଂରେ ଉନ୍ନତ ପ୍ରଦର୍ଶନ କରିଥିଲା । ଅଧିନାୟକ ମିଚେଲ ମାର୍ଶ ଅପରାଜିତ ୪୬ ରନ୍ କରି ଦଳକୁ ବିଜୟୀ କରାଇଥିଲେ । ଆଲେକ୍ସ କ୍ୟାରୀ ଓ ଆଦାମ ଜାମ୍ପା ଏକାଦଶକୁ ଫେରିବାକୁ ଯାଉଛନ୍ତି । ଉଭୟ ଫେରିବା ପରେ ଦଳ ଆହୁରି ଶକ୍ତିଶାଳୀ ହୋଇ ଉଠିବ ।
ଚୂଡ଼ାନ୍ତ ଏକାଦଶରେ ମିଚେଲ ମାର୍ଶ (ଅଧିନାୟକ), ଟ୍ରେଭିସ ହେଡ୍, ମାଥ୍ୟୁ ସଟ, ଆଲେକ୍ସ କ୍ୟାରୀ, ମାଥ୍ୟୁ ରେନଶୋ, କୁପର କନୋଲି, ମିଚେଲ ଓୱେନ, ମିଚେଲ ଷ୍ଟାର୍କ, ନାଥାନ ଏଲିସ, ଜୋସ ହାଜେଲଉଡ୍ ଓ ଆଦାମ ଜାମ୍ପା ସ୍ଥାନ ପାଇପାରନ୍ତି ।
ପ୍ରସିଦ୍ଧଙ୍କୁ ମିଳିପାରେ ସୁଯୋଗ
ଭାରତୀୟ ଦଳରେ ସେମିତି ପରିବର୍ତ୍ତନ ଆଶା ନାହିଁ । ବ୍ୟାଟିଂ ଅର୍ଡର ପୂର୍ବ ଭଳି ବଜାୟ ରହିବ । ରୋହିତଙ୍କ ଠାରୁ ରାହୁଲଙ୍କ ପର୍ଯ୍ୟନ୍ତ ସମସ୍ତେ ଜଣେ ଜଣେ ଦୁର୍ଦ୍ଧର୍ଷ ବ୍ୟାଟର । ତେଣୁ କାହାର ଖେଳକୁ ନେଇ ପ୍ରଶ୍ନ କରିବାର ନାହିଁ । ତଥାପି ଖେଳାଳିଙ୍କ ଫର୍ମ ହିଁ ପ୍ରମୁଖ ଭୂମିକା ଗ୍ରହଣ କରିବ ।
ଅକ୍ଷର ପଟେଲ ଓ ୱାସିଂଟନ ସୁନ୍ଦର ଉଭୟଙ୍କର ଅଲରାଉଣ୍ଡ ଦକ୍ଷତା ରହିଥିବାରୁ ସେମାନଙ୍କ ଦଳରେ ସ୍ଥାନ ଏକାପ୍ରକାର ସୁରକ୍ଷିତ ରହିଛି । ପର୍ଥରେ କେଏଲ୍ ରାହୁଲଙ୍କ ସହ ଅକ୍ଷରଙ୍କ (୩୧) ଭାଗିଦାରୀ ଦଳ ପାଇଁ ବେଶ ଗୁରୁତ୍ୱପୂର୍ଣ୍ଣ ରହିଥିଲା । ନୂଆ ବଲରେ ସୁଇଂ କରିବାର କଳା ପ୍ରସିଦ୍ଧଙ୍କୁ ଭଲ ଭାବରେ ଜଣା । ତେଣୁ ହର୍ଷିତ ରାଣାଙ୍କ ସ୍ଥାନରେ ତାଙ୍କୁ ଏକାଦଶରେ ସ୍ଥାନ ମିଳିପାରେ । ସବୁ ବିଭାଗରେ ସନ୍ତୁଳିତ ପ୍ରଦର୍ଶନ ଦେଇ ପାରିଲେ ଭାରତ ସିରିଜକୁ ପ୍ରତ୍ୟାବର୍ତ୍ତନ କରିପାରିବ ।
ଭାରତୀୟ ଚୂଡ଼ାନ୍ତ ଏକାଦଶରେ ଶୁଭମନ ଗିଲ (ଅଧିନାୟକ), ରୋହିତ ଶର୍ମା, ବିରାଟ କୋହଲି, ଶ୍ରେୟାସ ଆୟର, କେଏଲ୍ ରାହୁଲ, ଅକ୍ଷର ପଟେଲ, ୱାସିଂଟନ ସୁନ୍ଦର/କୁଲଦୀପ ଯାଦବ, ନୀତିଶ କୁମାର ରେଡ୍ଡୀ, ହର୍ଷିତ ରାଣା/ପ୍ରସିଦ୍ଧ କ୍ରିଷ୍ଣା, ଅର୍ଶଦୀପ ସିଂ, ମହମ୍ମଦ ସିରାଜ ରହିବେ ବୋଲି ଆଶା କରାଯାଉଛି ।
