ନୂଆଦିଲ୍ଲୀ,୧୦/୧୦: ଆଜି ଘରୋଇ ଭାରତ ଓ ୱେଷ୍ଟ ଇଣ୍ଡିଜ ମଧ୍ୟରେ ଦ୍ୱିତୀୟ ଟେଷ୍ଟ । ପ୍ରଥମ ଟେଷ୍ଟରେ ଇନିଂସ ବିଜୟ ହାସଲ କରିଥିବା ଘରୋଇ ଦଳ ଆଧିପତ୍ୟ ଜାରି ରଖି ସିରିଜ ମୂଳପୋଛ କରିବାକୁ ଉଦ୍ୟମ କରିବ । ୱେଷ୍ଟ ଇଣ୍ଡିଜ୍ ଦଳ ଏଥର ବାଜି ପଲଟାଇବା ପାଇଁ ତତ୍ପର ରହିଛି । ୨୮ ବର୍ଷ ପରେ ଭାରତରେ ଏକ ଟେଷ୍ଟ ଜିତିବା ପାଇଁ ଇଣ୍ଡିଜ ଦଳ ସବୁ ଶକ୍ତି ଖଟାଇବାକୁ ପ୍ରସ୍ତୁତ ହେଉଛି ।
ଅରୁଣ ଜେଟଲୀ ଷ୍ଟାଡ଼ିୟମ ବା କୋଟଲା ଗ୍ରାଉଣ୍ଡ୍ ସର୍ବଦା ଭାରତର ସଫଳ ଗ୍ରାଉଣ୍ଡ ସାବ୍ୟସ୍ତ ହୋଇଛି । ୧୯୮୭ ପରଠୁ ଭାରତ ଏହି ଗ୍ରାଉଣ୍ଡରେ କୌଣସି ଟେଷ୍ଟ ମ୍ୟାଚ୍ ହାରି ନାହିଁ । ଶେଷ ଥର ପାଇଁ ଭାରତୀୟ ଦଳ ଏହି ଗ୍ରାଉଣ୍ଡରେ ୱେଷ୍ଟ ଇଣ୍ଡିଜ ଠାରୁ ପରାଜିତ ହୋଇଥିଲା । ୱେଷ୍ଟ ଇଣ୍ଡିଜ ଦଳ ଶେଷ ଥର ପାଇଁ ୧୯୯୭ରେ ଭାରତରେ ଟେଷ୍ଟ ମ୍ୟାଚ୍ ଜିତିଥିଲା । ଇତି ମଧ୍ୟରେ ୨୮ ବର୍ଷ ବିତି ଯାଇଥିଲେ ହେଁ ୱେଷ୍ଟ ଇଣ୍ଡିଜ ବିଜୟ ସ୍ୱାଦ ଚାଖି ନାହିଁ ।
ଦ୍ୱିତୀୟ ଟେଷ୍ଟରେ ମଧ୍ୟ ଭ୍ରମଣକାରୀ ଦଳ ସେଭଳି ବିପର୍ଯ୍ୟୟ ଘଟାଇବା ଭଳି ମନେ ହେଉ ନାହିଁ । ଅହମ୍ମଦାବାଦରେ ଅନୁଷ୍ଠିତ ପ୍ରଥମ ଟେଷ୍ଟର ପିଚ୍ ୱେଷ୍ଟ ଇଣ୍ଡିଜ ପାଇଁ ଅନୁକୂଳ ରହିଥିଲା । ମାତ୍ର ଦଳ ନୈରାଶ୍ୟଜନକ ପ୍ରଦର୍ଶନ କରିଥିଲା । କୋଟଲା ଗ୍ରାଉଣ୍ଡର ପିଚ୍ ବ୍ୟାଟିଂ ପାଇଁ ଅନକୂଳ ରହିଥିଲେ ହେଁ ଘରୋଇ ଦଳକୁ ଅଧିକ ସହାୟତା କରିବ । ତେଣୁ ଗିଲ ବାହିନୀର ଆଧିପତ୍ୟ ଜାରି ରହିବ ।
ଭାରତ ଏକାଦଶରେ ପରିବର୍ତ୍ତନ କରିବା ସମ୍ଭାବନା ନାହିଁ । ତଥାପି ଦେବଦତ୍ତ ପାଡ଼ିକଲଙ୍କୁ ଏକ ସୁଯୋଗ ଦେଇପାରେ । ସେ ଏକାଦଶରେ ସ୍ଥାନ ପାଇଲେ ସାଇ ସୁଦର୍ଶନଙ୍କ ସ୍ଥାନରେ ବ୍ୟାଟିଂ କରିବେ । ୱେଷ୍ଟ ଇଣ୍ଡିଜ ମଧ୍ୟ ଏକାଦଶରେ ସେଭଳି ପରିବର୍ତ୍ତନ କରିବ ନାହିଁ । କେବଳ ଜୋହାନ ଲେନଙ୍କ ସ୍ଥାନରେ ବାମ ହାତି ପେସ୍ ବୋଲର ଜେଡିଆ ବ୍ଲେଡ୍ସଙ୍କୁ ସୁଯୋଗ ମିଳିବା ଆଶା କରାଯାଉଛି ।
ଦଳର ଦୁଇ ଯୁବ ବ୍ୟାଟର ଯଶସ୍ୱୀ ଜୈସ୍ୱାଲ ଓ ସାଇ ସୁଦର୍ଶନଙ୍କ ବ୍ୟାଟ୍ରୁ ରନ୍ ବାହାରି ନାହିଁ । ଗିଲ୍ ମଧ୍ୟ ବଡ଼ ଇନିଂସ ଖେଳି ନାହାନ୍ତି । ଏମାନଙ୍କ ବ୍ୟାଟ୍ରୁ ବଡ଼ ଇନିଂସ ଦେଖିବାକୁ ଦର୍ଶକ ଅପେକ୍ଷା କରିବେ । ମାତ୍ର ସମଗ୍ର କ୍ରିକେଟ୍ ପ୍ରେମୀଙ୍କ ନଜର ରବିନ୍ଦ୍ର ଜାଡ଼େଜାଙ୍କ ଉପରେ ରହିବ । ସେ ଆଉ ୧୦ ରନ କଲେ ଟେଷ୍ଟ କ୍ରିକେଟ୍ରେ ୪୦୦୦ ରନ ପୂରଣ କରିବେ । ଟେଷ୍ଟ କ୍ରିକେଟ୍ରେ କେବଳ କପିଳ ଦେବ, ଇଆନ ବୋଥାମ ଓ ଡାନିଏଲ ଭିଟ୍ଟୋରୀ ୪୦୦୦ରୁ ଅଧିକ ରନ ଓ ୩୦୦ରୁ ଅଧିକ ୱିକେଟ୍ ଅକ୍ତିଆର କରିଛନ୍ତି । ଜାଡ଼େଜା ଏହି ତାଲିକାରେ ସ୍ଥାନ ପାଇବାକୁ ଯାଉଛନ୍ତି ।
ଦ୍ୱିତୀୟ ଟେଷ୍ଟ ପାଇଁ ପ୍ରସ୍ତୁତ ପିଚ୍ ବ୍ୟାଟିଂ ଅନୁକୂଳ ରହିବ । ପ୍ରଥମ ୨ଦିନ ବ୍ୟାଟରମାନେ ଭରପୁର ଫାଇଦା ଉଠାଇ ପାରିବେ । ତୃତୀୟ ଦିବସର ଦ୍ୱିତୀୟ ଭାଗରୁ ପିଚ୍ ସ୍ପିନରମାନଙ୍କୁ ସହାୟତା କରିବା ଆରମ୍ଭ କରିବ । ତେଣୁ ଟସ ବିଜୟୀ ଦଳ ବ୍ୟାଟିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
ସମ୍ଭାବ୍ୟ ଦଳ
ଭାରତ: ଯଶସ୍ୱୀ ଜୈସ୍ୱାଲ୍, କେଏଲ ରାହୁଲ, ସାଇ ସୁଦର୍ଶନ/ଦେବଦତ୍ତ ପାଡ଼ିକଲ, ଶୁଭମନ ଗିଲ୍ (ଅଧିନାୟକ), ଧ୍ରୁବ ଜୁରେଲ, ରବିନ୍ଦ୍ର ଜାଡ଼େଜା, ନୀତିଶ କୁମାର ରେଡ୍ଡୀ, ୱାସିଂଟନ ସୁନ୍ଦର, କୁଲଦୀପ ଯାଦବ, ଯଶପ୍ରୀତ ବୁମରା, ମହମ୍ମଦ ସିରାଜ ।
ୱେଷ୍ଟ ଇଣ୍ଡିଜ: ତେଜନାରାୟଣ ଚନ୍ଦରପଲ, ଜନ କ୍ୟାମ୍ପବେଲ, ଆଲିକ ଆଥାଞ୍ଜି, ବ୍ରାଣ୍ଡନ କିଙ୍ଗ, ସାଇ ହୋପ୍, ରଷ୍ଟନ ଚେଜ (ଅଧିନାୟକ), ଜଷ୍ଟିନ ଗ୍ରୀଭ୍ସ, ଜୋମେଲ ୱାରିକାନ, ଖାରି ପିୟର, ଜୋହାନ ଲେନ/ଜେଡିଆ ବ୍ଲେଡ୍ସ, ଜେଡେନ ସିଲ୍ସ ।
