ନୂଆଦିଲ୍ଲୀ,୦୬/୧୧: ରତନ ଟାଟାଙ୍କ ଅତି ଘନିଷ୍ଠ ରହି ଆସିଥିବା ମେହଲୀ ମିସ୍ତ୍ରୀ ଟାଟା ଟ୍ରଷ୍ଟ୍ସର ୩ଟି ଟ୍ରଷ୍ଟରୁ ଇସ୍ତଫା ଦେଇଛନ୍ତି । ଏଥିରେ ସାର୍ ରତନ ଟାଟା ଟ୍ରଷ୍ଟ, ସାର୍ ଦୋରାବ୍ଜୀ ଟାଟା ଟ୍ରଷ୍ଟ ଏବଂ ବାଇ ହୀରାବାଇ ଜେ. ଏନ୍. ଟାଟା ନାବସାରୀ ଚାରିଟେବୁଲ ଇନ୍ଷ୍ଟିଚ୍ୟୁସନ୍ସ ଟ୍ରଷ୍ଟ ସାମିଲ ଅଛି । ନଭେମ୍ବର ୪ରେ ଏକ ପତ୍ରରେ ମିସ୍ତ୍ରୀ ଏ ସୂଚନା ଦେଇଛନ୍ତି ।
ବିଗତ ଦିନରେ ଟାଟା ଟ୍ରଷ୍ଟ୍ସର ପ୍ରମୁଖ ଦାତବ୍ୟ ସଂସ୍ଥାଗୁଡ଼ିକରେ ମିସ୍ତ୍ରୀଙ୍କ ପୁନଃନିଯୁକ୍ତିକୁ ନେଇ ମତଦାନ ହୋଇଥିଲା । ଏଥିରେ ୩ ଜଣ ଟ୍ରଷ୍ଟି ନୋଏଲ୍ ଟାଟା, ବେଣୁ ଶ୍ରୀନିବାସନ ଏବଂ ବିଜୟ ସିଂହ ତାଙ୍କ ପୁନଃନିଯୁକ୍ତି ବିରୋଧରେ ମତଦାନ କରିଥିଲେ । ମିସ୍ତ୍ରୀଙ୍କ କାର୍ଯ୍ୟକାଳ ଅକ୍ଟୋବର ୨୮ରେ ଶେଷ ହୋଇଛି । ମିସ୍ତ୍ରୀ ନିଜ ପତ୍ରରେ କହିଛନ୍ତି ଯେ, ରତନ ଟାଟାଙ୍କ ଦୂରଦୃଷ୍ଟି ପ୍ରତି ମୋର ସମର୍ପଣପୂର୍ବକ ଦାୟିତ୍ୱ ହେଉଛି ଟାଟା ଟ୍ରଷ୍ଟ୍ସକୁ କୌଣସି ବିବାଦକୁ ମୁଁ ନ ଆଣେ । ବିବାଦରୁ ବଞ୍ଚିବା ପାଇଁ ଇସ୍ତଫା ଦେଇଛି ।
ମିସ୍ତ୍ରୀ ଏବେ ବି ଟାଟା ଏଜୁକେଶନ୍ ଆଣ୍ଡ୍ ଡେଭଲପ୍ମେଣ୍ଟ ଟ୍ରଷ୍ଟ(ଟିଇଡିଟି) ଏବଂ ବ୍ରୀଚ୍ କ୍ୟାଣ୍ଡି ହସ୍ପିଟାଲ ସହ ଯୋଡ଼ି ହୋଇ ରହିବେ, ଯେଉଁଠି ଟାଟା ଗ୍ରୁପ୍ ଇତି ମଧ୍ୟରେ ସିଏସ୍ଆର୍ ପାଣ୍ଠିରୁ ୫୦୦ କୋଟି ଟଙ୍କା ଦାନ କରିଛି । ରତନ ଟାଟାଙ୍କ ପରଲୋକ ପରେ ନୋଏଲ୍ ଟାଟା ଟ୍ରଷ୍ଟ୍ସର ଅଧ୍ୟକ୍ଷ ଦାୟିତ୍ୱ ସମ୍ଭାଳୁଛନ୍ତି ଏବଂ ସେବେଠାରୁ ଟ୍ରଷ୍ଟ୍ର ଦୃଢ଼ୀକରଣ ହେଉଛି ।
