ନୂଆଦିଲ୍ଲୀ,୨୯/୦୯: ମଣିଷଙ୍କ ତୁଳନାରେ କୃତ୍ରିମ ବୁଦ୍ଧିମତା (ଏଆଇ) ବେଶ ବିଚକ୍ଷଣତା ଦେଖାଉଛି । ନିକଟ ଭବିଷ୍ୟତରେ ଆର୍ଟିଫିସିଆଲ ଇଣ୍ଟେଲିଜେନ୍ସ ପ୍ରାୟ ୪୦% ନିଯୁକ୍ତି ଖାଇଯିବ ବୋଲି ଓପନ ଏଆଇର ସିଇଓ ସାମ୍ ଅଲ୍ଟମ୍ୟାନ ଚେତାବନୀ ଦେଇଛନ୍ତି । ଏଆଇର କ୍ଷମତା ଦ୍ରୁତ ଭାବେ ବଢ଼ୁଛି । ଲେଖିବା, ସମରି ପ୍ରସ୍ତୁତି, ବୃହତ ପରିମାଣର ଡାଟାକୁ ତର୍ଜମା କରିବା, ସାଧାରଣ ସ୍ତରୀୟ ନିଷ୍ପତ୍ତି ଭଳି କ୍ଷେତ୍ରରେ ଏବେ ଏଆଇ ବେଶ ଭଲ କାମ କରୁଛି । ଏଆଇ ଆଗାମୀ ଦିନରେ ଏ କ୍ଷେତ୍ରରେ ନିଯୁକ୍ତି ଗୁଡ଼ିକ ପ୍ରଭାବିତ କରିବ ।
ବାରମ୍ବାର ସମାନ ଢ଼ଙ୍ଗରେ କରାଯାଉଥିବା କାମ, ଢ଼ାଞ୍ଚାଗତ, ଆନୁମାନିକ କାର୍ଯ୍ୟ ଭଳି ଦିଗ ଉପରେ ଏଆଇ ବେଶି ପ୍ରଭାବ ପକାଇବ । ଏଆଇ ସିଷ୍ଟମ ପ୍ୟାଟର୍ଣ୍ଣକୁ ଠିକ୍ କରିବା, ଶ୍ରେଣୀଭୁକ୍ତ କରିବା ଏବଂ ମଣିଷଙ୍କ ତୁଳନାରେ ଠିକ୍ ଠାକ୍ ନିଷ୍ପତ୍ତି ବି ନେଲାଣି । କମ୍ପାନି ଗୁଡ଼ିକ ଏଆଇ ଗ୍ରହଣ କରିବା ସହ ବେଶି ଶ୍ରମିକ ରଖିବାକୁ ଏତେଟା ପସନ୍ଦ କରୁନାହାନ୍ତି । ଖର୍ଚ୍ଚ କାଟ କରିବା ଲାଗି ଏଭଳି କରୁଛନ୍ତି କମ୍ପାନି । ଫଳରେ ଆର୍ଥିକ ଦୃଷ୍ଟିକୋଣରୁ ଏବେ ଏଆଇ ଆକର୍ଷଣ ପାଲଟିଛି ।
ଏବେ ସେବା, କଣ୍ଟେଣ୍ଟ ଜେନେରେସନ, ଆଇନଗତ ଡ୍ରାଫ୍ଟି, କୋଡିଂ ସହାୟତା ଭଳି କ୍ଷେତ୍ର ଗୁଡ଼ିକରେ ଏଆଇ ବହୁଳ ଭାବେ ଗ୍ରହଣଯୋଗ୍ୟ ହେଉଛି । ଶ୍ରମ କୈନ୍ଦ୍ରିକ ଶିଳ୍ପରେ ଏହାର ବ୍ୟବହାର ଆଗାମୀ ଦିନରେ ତୀବ୍ର ହେବାକୁ ଯାଉଛି । ଏଭଳି ସ୍ଥିତିରେ ଅଲ୍ଟମ୍ୟାନ କହିଛନ୍ତି, ଏଆଇ ଶକ୍ତିଶାଳୀ ହେଉଥିବାରୁ ପ୍ରତି କ୍ଷେତ୍ରରେ ଏହା ନିଯୁକ୍ତିକୁ କ୍ଷତି ପହଞ୍ଚାଇବ । ଯଦି ନିଯୁକ୍ତି ପ୍ରଭାବିତ ବର୍ଗରେ ଆସୁଛି ତେବେ ସେହି କ୍ଷେତ୍ର ଗୁଡ଼ିକର ଚିନ୍ତା ବେଶି ବଢ଼ିବ ।
ଏବେ ଏଆଇ ଏଣ୍ଟ୍ରି ସ୍ତରୀୟ ବା ଜୁନିୟର ଲେବଲ ନିଯୁକ୍ତି ଗୁଡ଼ିକୁ କ୍ଷତି ପହଞ୍ଚାଇଲାଣି । ଆଗାମୀ ଦିନରେ ବେଶି ନିଯୁକ୍ତି ପ୍ରଭାବିତ ହେବାର ଆଶଙ୍କା ରହିଛି । ଜାତିସଂଘ ଏବଂ ଆଇଏମ୍ଏଫ୍ ଭଳି ଏଜେନ୍ସି ଗୁଡ଼ିକ ମଧ୍ୟ ନିଯୁକ୍ତି ପ୍ରଭାବିତ ହେବା ନେଇ ପୂର୍ବରୁ ଆଶଙ୍କା କରିଥିଲେ । ଏଆଇ ଯୋଗୁ ନୂଆ ସୁଯୋଗ ସୃଷ୍ଟି ହେବ । ମାତ୍ର କର୍ମଚାରୀଙ୍କ ମଧ୍ୟରେ ସେଭଳି ସ୍କିଲ ନ ଥିଲେ ସେମାନେ ପୁଣି ଥରେ ନିଯୁକ୍ତି ପାଇବା କଷ୍ଟକର ହୋଇପଡ଼ିବ । ଏବେ କମ୍ପାନି ଗୁଡ଼ିକ କଡ଼ା ପ୍ରତିଯୋଗିତାର ସମ୍ମୁଖୀନ ହେଉଛନ୍ତି । ଅଧିକାଂଶ କମ୍ପାନି ଖର୍ଚ୍ଚ କାଟ କରିବା ଉପରେ ଫୋକସ କରୁଛନ୍ତି । ଏହା ସହ ଦକ୍ଷତା ବୃଦ୍ଧି ଏବଂ ନବସୃଜନ ଉପରେ କମ୍ପାନିଙ୍କ ଫୋକସ ରହିଛି ।
ଏଭଳି ଚାପ ମଧ୍ୟରେ କମ୍ପାନି ଲୋକଙ୍କ ପରିବର୍ତ୍ତେ ଏଆଇ ଗ୍ରହଣୀୟତାକୁ ବିଚାର କରୁଛନ୍ତି । ଏଭଳି ସ୍ଥିତିରେ କର୍ମଚାରୀମାନେ ସମୟ ଉପଯୋଗୀ ହେବାକୁ ଅଲ୍ଟମ୍ୟାନ ଆହ୍ୱାନ ଦେଇଛନ୍ତି । ସୃଜନଶୀଳତା ଏବଂ ସାରା ଜୀବନ ଶିଖିବା ମନୋବୃତ୍ତି ରହିବାର ମଧ୍ୟ ଆବଶ୍ୟକତା ରହିଛି । ଟେକ୍ନୋଲୋଜି ସତ୍ତେ୍ୱ ମଧ୍ୟ ମଣିଷ ମୁଖ୍ୟ କେନ୍ଦ୍ର ବିନ୍ଦୁ ହୋଇ ରହିବ । ଏଭଳି ସ୍ଥିତିରେ ଭୟ ଏବଂ କ୍ଷମତା ମଧ୍ୟରେ ସମନ୍ୱୟ ରଖିବା ଏବଂ ଏଆଇ ଭିତ୍ତିକ ବିଶ୍ୱ ଲାଗି ନିଜକୁ ପ୍ରସ୍ତୁତ କରିବାକୁ ଅଲ୍ଟମ୍ୟାନ ପରବର୍ତ୍ତୀ ପିଢ଼ିଙ୍କୁ ପରାମର୍ଶ ଦେଇଛନ୍ତି ।
