ମୁମ୍ବାଇ,୨୮/୦୯:ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ) କ୍ଲେମ୍ ସେଟେଲ୍ମେଣ୍ଟ ନିୟମକୁ ସଂଶୋଧନ କରିଛି । ନୂଆ ନିୟମ ଅନୁସାରେ, ବ୍ୟାଙ୍କଗୁଡ଼ିକ ନିଜ ମୃତକ ଗ୍ରାହକଙ୍କ ବ୍ୟାଙ୍କ ଖାତା କିମ୍ବା ଲକର୍ କ୍ଲେମ୍କୁ ଦସ୍ତାବିଜ ଦାଖଲର ୧୫ ଦିନ ମଧ୍ୟରେ ସେଟେଲ୍ କରିବେ । ଏଥିରେ ବିଳମ୍ବ ହେଲେ ନୋମିନିଙ୍କୁ କ୍ଷତିପୂରଣ ଦେବେ ।
କେନ୍ଦ୍ରୀୟ ବ୍ୟାଙ୍କର ନୂଆ ମାର୍ଗଦର୍ଶିକା ଦ୍ୱାରା ବ୍ୟାଙ୍କଗୁଡ଼ିକର ଭିନ୍ନ ଭିନ୍ନ ସେଟେଲ୍ମେଣ୍ଟ ନିୟମ ଏକ ହୋଇଯିବ । ଫଳରେ ଗ୍ରାହକଙ୍କ କ୍ଲେମ୍ଗୁଡ଼ିକୁ ସେଟେଲ୍ କରିବା ସହଜ ହୋଇପାରିବ । ଆର୍ବିଆଇ ଗ୍ରାହକ ସେବାକୁ ସୁଧାରିବା ପାଇଁ ଦସ୍ତାବିଜ୍ କାରବାରକୁ ବି ବ୍ୟବସ୍ଥିତ କରିବାକୁ ନିଷ୍ପତ୍ତି ନେଇଛି । ଦେଶର ସମସ୍ତ ବ୍ୟାଙ୍କଗୁଡ଼ିକ ନୂଆ ନିୟମକୁ ୨୦୨୬ ମାର୍ଚ୍ଚ ୩୧ ପୂର୍ବରୁ ଲାଗୁ କରିବେ ।
ଆର୍ବିଆଇ ପକ୍ଷରୁ ସେପ୍ଟେମ୍ବର ୨୬ରେ ଏହି ନୂଆ ନିୟମକୁ ଜାରି କରାଯାଇଛି, ଯାହା ଅଧୀନରେ ମୃତକ ଗ୍ରାହକଙ୍କ ବ୍ୟାଙ୍କ ଖାତା କିମ୍ବା ଲକର୍ କ୍ଲେମ୍କୁ ୧୫ ଦିନରେ ସେଟେଲ୍ କରିବାକୁ ପଡ଼ିବ । ନୂଆ ନିୟମର ଲକ୍ଷ୍ୟ ହେଉଛି, ଭିନ୍ନ ଭିନ୍ନ ସେଟେଲ୍ମେଣ୍ଟ ପ୍ରକ୍ରିୟାକୁ ଏକା ପ୍ରକାର କରିବା ଏବଂ ଗ୍ରାହକ ସେବାକୁ ଉନ୍ନତ ବନାଇବା । ଏହାସହିତ ଜରୁରୀ ଦସ୍ତାବିଜଗୁଡ଼ିକୁ ଷ୍ଟାଣ୍ଡାର୍ଡ କରି ପ୍ରକ୍ରିୟାକୁ ସହଜ କରିବା ।
ଆର୍ବିଆଇର ଏହି ନିର୍ଦ୍ଦେଶ ଦେଶର ସମସ୍ତ ବାଣିଜ୍ୟିକ ବ୍ୟାଙ୍କ ଏବଂ ସମବାୟ ବ୍ୟାଙ୍କଗୁଡ଼ିକ ପାଇଁ ଲାଗୁ ହେବ । ନୂଆ ନିୟମ ମୃତକଙ୍କ ବ୍ୟାଙ୍କ ଖାତା, ସେଫ୍ ଡିପୋଜିଟ୍ ଲକର ଏବଂ ସେଫ୍ କଷ୍ଟଡିରେ ରଖାଯାଇଥିବା ସାମଗ୍ରୀର କ୍ଲେମ୍ ଉପରେ ଲାଗୁ ହେବ ।
ଏ ନିର୍ଦ୍ଦେଶ ଉକ୍ତ ସରକାରୀ ସଞ୍ଚୟ ଯୋଜନାଗୁଡ଼ିକ ଉପରେ ଲାଗୁ ହେବ ନାହିଁ, ଯାହା ବ୍ୟାଙ୍କଗୁଡ଼ିକ ପକ୍ଷରୁ ପରିଚାଳିତ ହୋଇଥାଏ । ଯେପରି ବରିଷ୍ଠ ନାଗରିକ ସଞ୍ଚୟ ସ୍କିମ୍(ଏସ୍ସିଏସ୍ଏସ୍), ପବ୍ଲିକ୍ ପ୍ରୋଭିଡେଣ୍ଟ ଫଣ୍ଡ୍(ପିପିଏଫ୍) ଇତ୍ୟାଦି । ଏଭଳି କ୍ଷେତ୍ରରେ ସ୍କିମ୍ର ନିୟମ କିମ୍ବା ସର୍ତ୍ତାବଳୀ ହିସାବରେ କ୍ଲେମ୍ ସେଟେଲ୍ମେଣ୍ଟ୍ ହେବ ।
ଯଦି ୧୫ ଦିନରେ କ୍ଲେମ୍ ସେଟେଲ୍ ନ ହୁଏ ତେବେ ବ୍ୟାଙ୍କକୁ ବିଳମ୍ବର କାରଣ ଦର୍ଶାଇବାକୁ ପଡ଼ିବ । ଏହାସହିତ ବିଳମ୍ବ ଅବଧି ପାଇଁ ବକେୟା ରାଶି ଉପରେ ବ୍ୟାଙ୍କ ହାର୍ମ୪% ବାର୍ଷିକ ସୁଧ ଦେବାକୁ ପଡ଼ିବ । ଲକର୍ କିମ୍ବା ସେଫ୍ କଷ୍ଟଡିର କ୍ଲେମ୍ ସେଟେଲ୍ମେଣ୍ଟରେ ଯଦି ବିଳମ୍ବ ହୁଏ ତେବେ ବ୍ୟାଙ୍କକୁ ପ୍ରତି ଦିନର ବିଳମ୍ବ ପାଇଁ ୫,୦୦୦ ଟଙ୍କା କ୍ଷତିପୂରଣ ଦେବାକୁ ପଡ଼ିବ ।
