ଭଦ୍ରକ,୦୩/୦୯ : ୧୬ ନମ୍ବର ଜାତୀୟ ରାଜପଥ ନଳାଙ୍ଗ ନିକଟ ଅଞ୍ଚଳରୁ ଏକ ମାଂସ ବୋଝେଇ ଟ୍ରକ୍ ଜବତ । ଏଥିରେ ଗୋ-ମାଂସ ଥିବା ନେଇ ବଜରଙ୍ଗ ଦଳ ଏବଂ ଗୋ-ରକ୍ଷକ ସଦସ୍ୟମାନେ ଅଭିଯୋଗ କରିଛନ୍ତି । ତେବେ ବେଆଇନ ମାଂସ ଚାଲାଣରେ ସମ୍ପୃକ୍ତ ଥିବା ୪ ଜଣଙ୍କୁ ଅଟକ ରଖିଛି ପୁଲିସ ।
ସୂଚନା ମୁତାବକ, ଟ୍ରକ୍ ବାଲେଶ୍ୱର ଅଞ୍ଚଳରୁ ଭୁବନେଶ୍ୱର ଆଡକୁ ଯାଉଥିଲା । ଟ୍ରକ୍ର ଡାଲାକୁ ଘୋଡ଼ାଇ ଭିତରେ ମାଂସ ଭର୍ତ୍ତି ହୋଇଥିଲା । ସାମ୍ନା ପାର୍ଶ୍ବରେ ଅତି ଚତୁରତାର ସହ କ୍ଷୀର ବାସ୍କେଟ ଭର୍ତ୍ତି କରାଯାଇଥିଲା । ସନ୍ଦେହ ହେବାରୁ ବଜରଙ୍ଗ ଦଳର ସଦସ୍ୟ ଟ୍ରକ୍କୁ ଭଦ୍ରକରୁ ପିଛା କରିଥିଲେ । ନଳାଙ୍ଗ ଅତିକ୍ରମ କରିବା ପରେ ବାରିକପୁର ଛକ ପୂର୍ବରୁ ଗାଡିକୁ ଅଟକାଇଥିଲେ । ଯାଞ୍ଚ ବେଳେ ଟ୍ରକ୍ରେ ତଟକା ମାଂସ ଥିବା ଜଣାପଡିଥିଲା । ଯାହାକୁ ଦେଖି ଚାପା ଉତ୍ତେଜନା ସୃଷ୍ଟି ହୋଇଛି । ଏସମ୍ପର୍କରେ ଖବର ପାଇ ଭଦ୍ରକ ଗ୍ରାମାଞ୍ଚଳ ଥାନାର ୪ଟି ପିସିଆର ଭ୍ୟାନ୍ ଘଟଣା ସ୍ଥଳରେ ପହଞ୍ଚିଥିଲା । ଅଟକ ୪ ଯୁବକଙ୍କୁ ପୁଲିସ ନିଜ ହେପାଜତକୁ ଆଣି ଥାନାରେ ରଖିଛି । ମାଂସ ବୋଝେଇ ଟ୍ରକ୍କୁ ଥାନାକୁ ଆଣି ପରୀକ୍ଷା ନିରୀକ୍ଷା ପରେ ତାହା କି ମାଂସ ସ୍ପଷ୍ଟ ହେବ ବୋଲି ପୁଲିସ କହିଛି ।
