ଭୁବନେଶ୍ୱର ୧୪/୧୧: ରାଜଧାନୀ ଉପକଣ୍ଠରେ ସହର ଗଢ଼ା ହେବ । ନୂଆ ରୂପ ପାଇବ ସହର । ଏନେଇ ପ୍ରକ୍ରିୟା ଆରମ୍ଭ ହୋଇଛି । ଏକ ଉଚ୍ଚସ୍ତରୀୟ ଟିମ୍ ଘଟଣାସ୍ଥଳ ପରିଦର୍ଶନ କରିବା ସହ ସିଟିଜ୍ ପ୍ରକଳ୍ପର ସମୀକ୍ଷା କରିଛନ୍ତି । ଏହି ପ୍ରତିନିଧି ଦଳରେ କେନ୍ଦ୍ର ନଗର ଉନ୍ନୟନ ମନ୍ତ୍ରଣାଳୟର ବରିଷ୍ଠ ଅଧିକାରୀ, ବିଶ୍ୱ ବ୍ୟାଙ୍କ ଏବଂ ଏସିଆନ୍ ବ୍ୟାଙ୍କର ଏକ ସ୍ୱତନ୍ତ୍ର ଟିମ୍ ବିଭିନ୍ନ ଅଞ୍ଚଳ ବୁଲି ଦେଖିଛନ୍ତି । ଭୁବନେଶ୍ୱର ଉନ୍ନୟନ କତ୍ତୃପକ୍ଷ (ବିଡିଏ) ଆଉ ପାଦେ ଆଗକୁ ବଢିବ । ବିକାଶମୂଳକ କାର୍ଯ୍ୟ ଆଗେଇବ ।
ଏନେଇ ଉପାଧ୍ୟକ୍ଷ ଏନ୍ ଥିରୁମାଲା ନାୟକଙ୍କ ନେତୃତ୍ୱରେ ଏକ ଟିମ୍ ପାଇରାପୁର ଠାରେ ଚାଲିଥିବା ସ୍କିମ୍ ପରିଦର୍ଶନ କରିଥିଲା । ଏହା ସହ ପ୍ରସ୍ତାବିତ ସିଟିଜ ପ୍ରକଳ୍ପ ବୁଲି ଦେଖିଥିଲେ । ସ୍ୱତନ୍ତ୍ର ଟିମ୍ ସହ ଉନ୍ନତିଭବନରେ ଏକ ଗୁରୁତ୍ୱପୂର୍ଣ୍ଣ ବୈଠକ ବସିଥିଲା । ଏଥିରେ ରାଜ୍ୟ ସରକାରଙ୍କ ବରିଷ୍ଠ ଅଧିକାରୀ ମାନେ ଉପସ୍ଥିତ ଥିଲେ । ବୈଠକରେ ବିଭିନ୍ନ ଗୁରୁତ୍ୱପୂର୍ଣ୍ଣ ଆଲୋଚନା ହୋଇଥିଲା । ବିଶେଷ କରି ସହରାଞ୍ଚଳ ଉନ୍ନତୀକରଣକୁ ଗୁରୁତ୍ୱ ଦିଆଯାଇଥିଲା । ବିଶ୍ୱବ୍ୟାଙ୍କ୍ ସହାୟତାରେ କାର୍ଯ୍ୟ ଆଗେଇବ ।
ରାଜଧାନୀ ଉପକଣ୍ଠକୁ ଲାଗି ୩ ରାଜସ୍ୱ ଗ୍ରାମରେ ହାଇଟେକ ସିଟି ବା ନୂଆ ସହର ଗଠନ ହେବ । ମଳିପଡ଼ା, ଦାସପୁର ଓ ଗୋଠପାଟଣାରେ ପ୍ରାୟ ୮୨୧.୯୬୧ ଏକର ଜମି ଚିହ୍ନଟ କରାଯାଇଛି । ଖୁବ୍ଶୀଘ୍ର ଜମି ଅଧିଗ୍ରହଣ କରାଯିବ । ତା ପୂର୍ବରୁ ପାଚେରି ନିର୍ମାଣ କାର୍ଯ୍ୟ ଆରମ୍ଭ ହୋଇଛି । ମୋଟ ୭.୫ କିମି ପାଚେରି ନିର୍ମାଣ ହେବ । ସେଥିରୁ ପ୍ରାୟ ୧.୬ କିମି ପାଚେରି ନିର୍ମାଣ କାର୍ଯ୍ୟ କରିଛି ବିଡିଏ ।
