ବାଲିଗୁଡ଼ା,୧୯/୧୦: ବାପା ପୁଅଙ୍କୁ ଘରେ ଶୋଇଥିବା ସମୟରେ ଏସିଡ ମାଡ଼ । ବିଳମ୍ବିତ ରାତିରେ ଘରେ ଶୋଇଥିବା ସମୟରେ ଘରେ ପଶି ଏସିଡ ଫିଙ୍ଗି ପଳାଇଲେ ଦୁର୍ବୃତ୍ତ । ଏସିଡ ମାଡ଼ରେ ବୁଢ଼ା କୁଣ୍ଡେଲ ଗାଁର ମୋହନ ପନ୍ଦର ଏବଂ ତାଙ୍କ ୧୨ ବର୍ଷର ପୁଅ ଅନୁଜ ଗୁରୁତର ହୋଇଛନ୍ତି । କନ୍ଧମାଳ ଜିଲ୍ଲା ତୁମୁଡିବନ୍ଧ ଥାନା ମୁଣ୍ଡିଗଡ଼ ପଞ୍ଚାୟତର ବୁଢା କୁଣ୍ଢେଲ ଗାଁରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ବୁଢ଼ା କୁଣ୍ଡେଲ ଗାଁର ମୋହନ ପନ୍ଦର ନିଜ ୧୨ ବର୍ଷର ପୁଅ ଅନୁଜଙ୍କ ସହ ଘରେ ଶୋଇଥିଲେ । ରାତି ପ୍ରାୟ ୨ଟା ସମୟରେ ଶୋଇଥିବା ଅବସ୍ଥାରେ କେହି ଦୁବୁର୍ତ୍ତ ଆସି ଏସିଡ ଫିଙ୍ଗି ଦୌଡ଼ି ପଳେଇଥିଲେ । ଫଳରେ ଏସିଡ ମାଡରେ ଗୁରୁତର ହୋଇ ଯନ୍ତ୍ରଣାରେ ଚିତ୍କାର କରିଥିଲେ ବାପା ପୁଅ । ଚିତ୍କାର ଶୁଣି ପରିବାର ଲୋକେ ତୁରନ୍ତ ଏକ ଆମ୍ବୁଲାନ୍ସକୁ ଫୋନ୍ କରି ଡାକିଥିଲେ । ଖବର ପାଇ ଘଟଣାସ୍ଥଳରେ ଆମ୍ୱୁଲାନ୍ସ ପହଞ୍ଚିଥିଲା । ଉଭୟଙ୍କୁ ଗୁରୁତର ଅବସ୍ଥାରେ ସେହି ଆମ୍ବୁଲାନ୍ସ ଯୋଗେ ଚିକିତ୍ସା ପାଇଁ ତୁମୁଡିବନ୍ଧ ମେଡିକାଲକୁ ନେଇଯାଇଥିଲେ ପରିବାରଲୋକେ । ପରେ ଏନେଇ ତୁମୁଡିବନ୍ଧ ଥାନାରେ ଏକ ଲିଖିତ ଅଭିଯୋଗ କରିଛନ୍ତି ଏସିଡ ମାଡ଼ର ଶୀକାର ହୋଇଥିବା ମୋହନ ପନ୍ଦର । ଏହି ଏସିଡ୍ ମାଡରେ ମୋହନ ଓ ତାଙ୍କ ପୁଅର ଛାତି ଓ ମୁହଁ ପୋଡି ଯାଇଛି । ତେବେ ଉକ୍ତ ଅଭିଯୋଗ ଆଧାରରେ ତୁମୁଡିବନ୍ଧ ପୋଲିସ ଘଟଣାର ତଦନ୍ତ ଚଳାଇଛି ।
