ମୁମ୍ବାଇ: ମହାରାଷ୍ଟ୍ରରେ ନୂଆ ସରକାର ଗଠନ ହେବା ପୂର୍ବରୁ ଅଜିତ ପାଓ୍ବାରଙ୍କ ଏନସିପି ଚିନ୍ତା ବଢ଼ାଇଛି। ଏକନାଥ ସିନ୍ଦେଙ୍କ ନେତୃତ୍ବାଧୀନ ଶିବସେନା ଭଳି ସରକାରରେ ସମାନ ସ୍ଥାନ ଦାବି କରିଛି ଏନସିପି । ଦଳୀୟ ନେତା ଛଗନ ଭୂଜବଳ କହିଛନ୍ତି ଯେ, ବିଧାନସଭା ନିର୍ବାଚନରେ ଏନସିପିର ଭଲ ଷ୍ଟ୍ରାଇକ୍ ରେଟ୍ ରହିଛି । ତେଣୁ ନୂଆ ସରକାରରେ ଶିବସେନା ଭଳି ଏନସିପିର ସମାନ ଭାଗିଦାରୀ ରହିବା ଦରକାର । ସରକାର ଗଠନ ନେଇ କସରତ ଚାଲିଥିବା ବେଳେ ଏନସିପିର ଏହି ଦାବି ସାମ୍ନାକୁ ଆସିଛି ।
ଛଗନ ଭୂଜବଳ ସ୍ପଷ୍ଟ ଭାବରେ କହିଛନ୍ତି, ବିଧାନସଭା ନିର୍ବାଚନରେ ଅଜିତ ପାଓ୍ବାରଙ୍କ ନେତୃତ୍ବରେ ଖୁବ ଭଲ ପ୍ରଦର୍ଶନ କରିଛି ଏନସିପି । ଆଗାମୀ ସରକାରରେ ଶିବସେନା ଭଳି ଏନସିପିକୁ ସମାନ ଭାବରେ ପ୍ରତିନିଧିତ୍ବ କରିବାକୁ ସୁଯୋଗ ମିଳିବା ଦରକାର । ଛଗନ ଭୂଜବଳ କହିଛନ୍ତି ଯେ, ‘ଯଦି ଆମେ ମେଣ୍ଟର ଷ୍ଟ୍ରାଇକ୍ ରେଟ୍କୁ ଦେଖିବା ତେବେ ବିଜେପି ପରେ ଏନସିପି ରହିଛି । ସିନ୍ଦେଙ୍କ ଶିବସେନା ତୃତୀୟ ସ୍ଥାନରେ ରହିଛି । ତେଣୁ ଆମର ଦା, ସରକାରରେ ଶିବସେନା ଭଳି ଆମକୁ ପ୍ରାଧାନ୍ୟ ଦିଆଯାଉ ।’ ଏହା ପୂର୍ବରୁ ଅଜିତ ପାଓ୍ବାରଙ୍କ ଲାଗି ମୁଖ୍ୟମନ୍ତ୍ରୀ ପଦ ଦାବି କରିଥିଲେ ଛଗନ ଭୂଜବଳ ।
ସୂଚନାଯୋଗ୍ୟ, ୨୮୮ ଆସନ ବିଶିଷ୍ଟ ମହାରାଷ୍ଟ୍ର ବିଧାନସଭା ନିର୍ବାଚନରେ ବିଜେପି ୧୩୨ ଆସନରେ ବିଜୟୀ ହୋଇଛି । ଦଳ ୧୪୮ ଆସନରେ ପ୍ରାର୍ଥୀ ଦେଇଥିଲା । ଫଳରେ ବିଜେପି ଷ୍ଟ୍ରାଇକ୍ ରେଟ୍ ୮୮.୫ ପ୍ରତିଶତ ରହିଛି । ସେହିଭଳି ଏନସିପି ୫୯ ଆସନରେ ପ୍ରାର୍ଥୀ ଦେଇଥିବା ବେଳେ ୪୧ ସିଟ୍ରେ ବିଜୟ ହାସଲ କରିଛି । ଏନସିପିର ଷ୍ଟ୍ରାଇକ୍ ରେଟ୍ ୬୯.୫ ପ୍ରତିଶତ ରହିଛି । ସେପଟେ ସିନ୍ଦେଙ୍କ ଶିବସେନା ୮୧ ଆସନରେ ଲଢ଼ି ୫୬ଟି ସିଟ୍ରେ ଜିତିଛି । ତେଣୁ ଶିବସେନାର ଷ୍ଟ୍ରାଇକ୍ ରେଟ୍ ଉଭୟ ବିଜେପି ଏବଂ ଏନସିପି ତଳକୁ ୭୦.୪ ପ୍ରତିଶତ ରହିଛି ।
