ମୁମ୍ବାଇ ୦୭/୦୩: ବକ୍ସ ଅଫିସ୍ରେ ଫିଲ୍ମ ‘ଜିଗ୍ରା’ର ବିଫଳତାକୁ ନେଇ ମୁହଁ ଖୋଲିଛନ୍ତି ଅଭିନେତ୍ରୀ ଆଲିଆ ଭଟ୍ଟ । ୨୦୨୪ରେ ମୁକ୍ତିଲାଭ କରିଥିବା ବସନ ବାଲାଙ୍କ ନିର୍ଦ୍ଦେଶିତ ଜିଗ୍ରାରେ ଆଲିଆଙ୍କ ଅଭିନୟକୁ ବେଶ୍ ପ୍ରଶଂସା କରାଯାଇଥିଲେ ହେଁ ତାହା ଭଲ ବ୍ୟବସାୟ କରିପାରି ନ ଥିଲା । ଫିଲ୍ମ ରିଲିଜ ହେବାର ଦୀର୍ଘ ସମୟ ପରେ ଏ ନେଇ ଏକ ସାକ୍ଷାତକାରରେ ଆଲିଆ କହିଛନ୍ତି, ଏହି ବିଫଳତା ତାଙ୍କୁ ନୂଆ ଉତ୍ସାହ ଦେଇଛି । ତାଙ୍କ ବୃତ୍ତିଗତ ସ୍ୱପ୍ନ ପାଇଁ ନୂଆ ବାଟ ଖୋଲିଛି ।
ସେ କହିଛନ୍ତି, ‘ମୁଁ ଜଣେ ବେଶ୍ ଉତ୍ସାହୀ ଅଭିନେତ୍ରୀ, ପ୍ରଯୋଜକ । ମୋ କାମ ପ୍ରତି ମୁଁ ବେଶ୍ ଆଗ୍ରହୀ । କାମ ସହ ମୋର ଅନେକ ସ୍ୱପ୍ନ ଜଡ଼ିତ, ଯାହା କି କେବେ ଶେଷ ହୋଇଯିବ ବୋଲି ମୁଁ ଭାବେ ନାହିଁ । ଗତ ବର୍ଷ ମୋର ଏକ ଫିଲ୍ମ ରିଲିଜ ହୋଇଥିଲା । ବକ୍ସ ଅଫିସ୍ରେ ଏହା ଭଲ ବ୍ୟବସାୟ କରିପାରିଲା ନାହିଁ । ଏଥିଯୋଗୁ ମୋତେ କିଛି ସ୍ୱପ୍ନ ଦେଖିବାକୁ ସୁଯୋଗ ମିଳିଛି । ଏହାଦ୍ୱାରା ମୁଁ ବେଶ୍ ଉତ୍ସାହିତ ଅନୁଭବ କରୁଛି । ଏହା ମୋର ପ୍ରଫେସନାଲ ଡ୍ରିମ୍ ।’
ପ୍ରକାଶଥାଉ କି, ଆକ୍ସନ-ଥ୍ରିଲର ଫିଲ୍ମ ଜିଗ୍ରା ଭାଇ-ଭଉଣୀଙ୍କ କାହାଣୀ ଉପରେ ଆଧାରିତ । ଆଲିଆଙ୍କୁ ସଞ୍ଜୟଲୀଲା ଭଂସାଲୀଙ୍କ ‘ଲଭ୍ ଆଣ୍ଡ୍ ୱାର’ରେ ଦେଖିବାକୁ ମିଳିବ । ଏଥିରେ ସେ ରଣବୀର କପୁର ଏବଂ ଭିକି କୌଶଲଙ୍କ ସହ ନଜର ଆସିବେ । ସେହିପରି ଫିଲ୍ମ ‘ଆଲ୍ଫା’ରେ ଆଲିଆଙ୍କ ସହ ଶରବରୀ ବାଘ ଏବଂ ବବି ଦେଓଲ ଗୁରୁତ୍ୱପୂର୍ଣ୍ଣ ଭୂମିକାରେ ଅଛନ୍ତି ।
