ଭୁବନେଶ୍ଵର, ୨୫/୦୨ : ଏକାଦଶାହ ଭୋଜିକୁ ନଯିବାରୁ ଆକ୍ରମଣ କରି ଲହୁ ଲୁହାଣ କଲେ ୩ ଯୁବକ। ଥାନାରେ ଅଭିଯୋଗ କରିବାରୁ ପକ୍ଷପାତିତା କଲା ପୋଲିସ। ଉଭୟ ପକ୍ଷଙ୍କ ବିରୋଧରେ ମାମଲା ରୁଜୁ କରି ଆକ୍ରମଣକାରୀଙ୍କୁ ଘଣ୍ଟ ଘୋଡାଇଲା ପୋଲିସ। ଯାଜପୁର ଜିଲ୍ଲା ଜେନାପୁର ପୋଲିସ ବିରୋଧରେ ଆସିଛି ଏଭଳି ଅଭିଯୋଗ। ନିରପେକ୍ଷ ତଦନ୍ତ ଦାବିରେ ଥାନା ଘେରାଉ କଲେ ମହିଳା।
ଅଭିଯୋଗ ମୁତାବକ, ଜେନାପୁର ଥାନା ଅଧୀନ ମର୍ଜିତାପୁର ଗ୍ରାମର ଚନ୍ଦ୍ରମଣି ସାହୁ ଜଣଙ୍କ ଏକାଦଶାହ ଭୋଜିକୁ ନଯିବାରୁ ସେହି ଗ୍ରାମର ୩ଜଣ ଯୁବକ ତାଙ୍କୁ ସଂଘବଦ୍ଧ ଆକ୍ରମଣ କରି ଲହୁଲୁହାଣ କରିଥିଲେ। ତାଙ୍କୁ ଗୁରୁତର ଅବସ୍ଥାରେ ମେଡ଼ିକାଲରେ ଭର୍ତ୍ତି କରାଯାଇଥିଲା। ଚିକିତ୍ସା ପରେ ସେ ଜେନାପୁର ଥାନାରେ ଲିଖିତ ଅଭିଯୋଗ କରିଥିଲେ। ପୋଲିସ ଏହି ଘଟଣାରେ ନିରପେକ୍ଷ ତଦନ୍ତ ନକରି ଉଭୟ ପକ୍ଷଙ୍କ ନାମରେ ମାମଲା ରୁଜୁ କରିଥିଲା। ତେଣୁ ପୋଲିସ ଆକ୍ରମଣକାରୀଙ୍କୁ ଘଣ୍ଟ ଘୋଡାଉଥିବା ଅଭିଯୋଗ ହେଉଛି। ଏନେଇ ଆଜି ଗ୍ରାମର ବହୁ ମହିଳା ଥାନାକୁ ଯାଇ ଏହାର ପ୍ରତିବାଦ କରିଛନ୍ତି। ଘଟଣାକୁ ନେଇ ବିଜେପି ନେତ୍ରୀ ପହି ଯାଜପୁର ରୋଡ୍ ଏସଡିପିଓଙ୍କ ସହ ଆଲୋଚନା କରିବା ସହ ଘଟଣାର ନିରପେକ୍ଷ ତଦନ୍ତ ଦାବି କରିଛନ୍ତି।
