ନୂଆଦିଲ୍ଲୀ,୧୯/୦୭:ଆମେରିକା ରାଷ୍ଟ୍ରପତି ଗତ କିଛି ଦିନ ଧରି ତାଙ୍କର ‘ବିଗ୍ ବିଉଟିଫୁଲ୍ ବିଲ୍’କୁ ନେଇ ଚର୍ଚ୍ଚାରେ ଥିଲେ। ଯାହାକୁ ନେଇ ଟ୍ରମ୍ପ ଏବଂ ଟେସଲା ମାଲିକ ଏଲନ୍ ମସ୍କଙ୍କ ମଧ୍ୟରେ ମତଭେଦ ସୃଷ୍ଟି ହୋଇଥିଲା। ଆଉ ଏହାରି ମଧ୍ୟରେ ଟ୍ରମ୍ପ ଆଉ ଏକ ନୂତନ ଆଇନରେ ସ୍ୱାକ୍ଷର କରିଛନ୍ତି। ଯାହା ହେଉଛି ଜିନିୟସ୍ ଆକ୍ଟ। ଏହା ବିଷୟରେ ହ୍ୱାଇଟ୍ ହାଉସ୍ କହିଛି ଯେ ‘ଏହା ଆମେରିକାକୁ ବିଶ୍ୱ ଡିଜିଟାଲ୍ ମୁଦ୍ରା ବିପ୍ଳବରେ ନେତୃତ୍ୱ ଦେବ।’ ତେବେ ଏହା ଏକ ପ୍ରକାର କ୍ରିପ୍ଟୋକରେନ୍ସି। ଏହାର ଘୋଷଣା ସହିତ, ବିଟକଏନ୍ ଗତ ଦିନରେ ବୃଦ୍ଧି ପାଇଥିଲା। ଜାଣନ୍ତୁ ଜିନିୟସ୍ ଆକ୍ଟ କ’ଣ ଏବଂ ଏହା କିପରି କାମ କରିବ?
ଆମେରିକାରେ ଜିନିୟସ୍ ଆକ୍ଟ ଅନୁଯାୟୀ, ନୂତନ ନିୟମ କାର୍ଯ୍ୟକାରୀ କରିବା ନେଇ ବହୁତ ଦିନ ଧରି ଆଲୋଚନା ହେଉଥିଲା। ଡୋନାଲ୍ଡ ଟ୍ରମ୍ପ ଏଥିରେ ସ୍ୱାକ୍ଷର କରି ଏହି ଆଇନ କାର୍ଯ୍ୟକାରୀ କରିଛନ୍ତି। ଜିନିୟସ୍ ଆକ୍ଟକୁ ବିଶ୍ୱ ଡିଜିଟାଲ୍ ମୁଦ୍ରାରେ ଏକ ବିପ୍ଳବ ଭାବରେ ଦେଖାଯାଉଛି। ଏହା ମାଧ୍ୟମରେ ଷ୍ଟେବଲକଏନ୍ ନିୟନ୍ତ୍ରଣ କରାଯାଇପାରିବ। ହ୍ୱାଇଟ୍ ହାଉସ୍ କହିଛି ଯେ,ଏହା ଆମେରିକା ପାଇଁ ବହୁତ ଲାଭଦାୟକ ପ୍ରମାଣିତ ହେବ। ଜିନିୟସ୍ ଆକ୍ଟ ସମ୍ପୂର୍ଣ୍ଣ ଭାବରେ ଡିଜିଟାଲ୍ ମୁଦ୍ରା ପାଇଁ ଡିଜାଇନ୍ କରାଯାଇଛି।
ରିପୋର୍ଟ ଅନୁଯାୟୀ, ଷ୍ଟେବଲକଏନ୍ ଏକ ପ୍ରକାରର କ୍ରିପ୍ଟୋଗ୍ରାଫିକ୍ ଟୋକନ୍। ଏହାକୁ ଡିଜିଟାଲ୍ ସମ୍ପତ୍ତି ମଧ୍ୟ କୁହାଯାଇପାରେ। ଏହାର ମୂଲ୍ୟଗୁଡ଼ିକୁ ସ୍ଥିର ରଖିବା ପାଇଁ ଡିଜାଇନ୍ କରାଯାଇଛି। ଯେପରିକି ବିଟକଏନ୍ କିମ୍ବା ଇଥେରିୟମ୍ କ୍ରିପ୍ଟୋକରେନ୍ସିର ମୂଲ୍ୟ ପରିବର୍ତ୍ତନ ହୁଏ, କିନ୍ତୁ ଷ୍ଟେବଲକଏନ୍ର ମୂଲ୍ୟରେ ବେଶ ପରିବର୍ତ୍ତନ ହୁଏ ନାହିଁ। ଏହା ସହିତ,ଏକ ଷ୍ଟେବଲକଏନ ମୂଲ୍ୟ ଗୋଟିଏ ଡଲାର ସହିତ ସମାନ। ଷ୍ଟେବଲକଏନ ଉଦ୍ଦେଶ୍ୟ ହେଉଛି ମୂଲ୍ୟ ସଂରକ୍ଷଣର ଏକ ନିୟନ୍ତ୍ରିତ ଏବଂ ନିର୍ଭରଯୋଗ୍ୟ ମାଧ୍ୟମ ଭାବରେ କାର୍ଯ୍ୟ କରିବା।
