ନୂଆଦିଲ୍ଲୀ,୨୧।୩: ତିରୁପତି ମନ୍ଦିରରେ କେବଳ ହିନ୍ଦୁମାନେ ହିଁ କାମ କରିବା ଦରକାର। ଏଭଳି ଏକ ନିର୍ଦେଶ ଦେଇଛନ୍ତି ଆନ୍ଧ୍ର ପ୍ରଦେଶର ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ। ଶୁକ୍ରବାର ମନ୍ଦିରରେ ପୂଜା-ଅର୍ଚ୍ଚନା କରିବା ପରେ ନାଇଡୁ ଏହି କଥା କହିଛନ୍ତି। ସେ କହିଛନ୍ତି ଭିନ୍ନ ଧର୍ମର ଲୋକ ବର୍ତ୍ତମାନ ସମୟରେ କାମ କରୁଛନ୍ତି, ତେଣୁ ତାଙ୍କର ଭାବନାକୁ ଅଣଦେଖା କରିହେବନି। ତାଙ୍କୁ ଅନ୍ୟସ୍ଥାନକୁ ସିଫ୍ଟ କରି ଦିଆଯିବ। ’
ମୁଖ୍ୟମନ୍ତ୍ରୀ ନାଇଡୁ ଏହା ସହ ନିଜର ସବୁ ଯୋଜନା ମଧ୍ୟ ଲୋକଙ୍କ ସହ ସେୟାର କରିଛନ୍ତି। ଏହା ଅନୁସାରେ, ସାରାଦେଶର ସବୁ ରାଜ୍ୟର ରାଜଧାନୀରେ ଭେଙ୍କଟେଶ୍ବର ସ୍ବାମୀ ମନ୍ଦିର ତିଆରି କରିବାର ଯୋଜନା ରହିଛି। ସେ କହିଛନ୍ତି, ସାରା ଦୁନିଆରେ ଭଗବାନ ଭେଙ୍କଟେଶ୍ବରଙ୍କ ସମ୍ପତ୍ତି ସୁରକ୍ଷା ପାଇଁ ପବିତ୍ର ସୁତ୍ରା ବନ୍ଧା ଯାଇଛି। ବହୁ ଭକ୍ତ ବିଦେଶରେ ମଧ୍ୟ ଏଭଳି ମନ୍ଦିର ସ୍ଥାପିତ କରିବାର ଇଚ୍ଛା ରଖିଛନ୍ତି।
ମନ୍ଦିରର ଚାରିପଟେ ଅର୍ଥାତ ତିରୁମାଲାର ପାହାଡରେ କୌଣସି ପ୍ରକାର କମର୍ସିଆଲ ଆକ୍ଟିଭିଟିରର ପ୍ରୋଜେକ୍ଟକୁ ରଦ୍ଦ କରିଛନ୍ତି ନାଇଡୁ। ସେ କହିଛନ୍ତି, ଗତ ସରକାର ମନ୍ଦିର ନିକଟରେ ୩୫.୩୨ ଏକର ଭୂମି ଉପରେ ମୁମତାଜ ହୋଟେଲର ସ୍ଥାପନା ପାଇଁ ମଞ୍ଜୁରୀ ଦେଇଥିଲେ। ଆମ ସରକାର ଏହାକୁ ରଦ୍ଦ କରିଦେଇଛନ୍ତି। ତିରୁମାଲର ୭ଟି ପାହାଡ ନିକଟରେ କୌଣସି ପ୍ରକାର ବ୍ୟବସାୟିକ ଗତିବିଧି ହେବାକୁ ଦିଆଯିବନି। ଖାଦ୍ୟପେୟ ସେବା ପାଇଁ ଯାହାଙ୍କ ବ୍ୟବସାୟକୁ ମଞ୍ଜୁରୀ ମିଳିଛି, ସେମାନେ କେବଳ ଶାକାହାରୀ ବ୍ୟଞ୍ଜନ ପରସିବେ।
