ନୂଆଦିଲ୍ଲୀ: ନିଜର ଜୀବନଶୈଳୀ ପାଇଁ ଆମେ କେବେ କମ ସମୟ ଶୋଇଥାଉ ତ ଆଉ କେବେ ଅଧିକ ପରିଶ୍ରମ କଲେ ଥକାପଣରୁ ଅଧିକ ସମୟ ଶୋଇପଡୁ । ଯଦି ଏଭଳି ଅଧିକାଂଶ ସମୟରେ ଘଟେ ତାହେଲେ ଏହା ବହୁତ ଖରାପ । ଯାହାକି ଆମ ଶରୀର ଉପରେ ଖରାପ ପ୍ରଭାବ ପକାଇଥାଏ ବୋଲି ଅଧ୍ୟୟନରେ ଦାବି କରାଯାଇଛି । କମ କିମ୍ବା ଅଧିକ ସମୟ ଶୋଇଲେ ଶରୀରର ଅନେକ ଗୁରୁତ୍ୱପୂର୍ଣ୍ଣ ଅଙ୍ଗର ବାର୍ଦ୍ଧକ୍ୟକୁ ତ୍ୱରାନ୍ୱିତ କରିପାରେ।
ନେଚର ଜର୍ଣ୍ଣାଲରେ ପ୍ରକାଶିତ ଏକ ନୂତନ ଅଧ୍ୟୟନରେ ଦାବି କରାଯାଇଛି ଯେ, ଅତ୍ୟଧିକ ଶୋଇବା ମସ୍ତିଷ୍କ, ହାର୍ଟ, ଫୁସଫୁସ ଏବଂ ରୋଗ ପ୍ରତିରୋଧକ ଶକ୍ତି ଉପରେ ନକାରାତ୍ମକ ପ୍ରଭାବ ପକାଇପାରେ । ଗବେଷଣା ଅନୁଯାୟୀ, ଯେଉଁମାନେ ଦୈନିକ ପ୍ରାୟ ୬.୪ ଘଣ୍ଟା କିମ୍ବା ୭.୮ ସମୟ ଶୋଇଥିଲେ ସେମାନଙ୍କ ମଧ୍ୟରେ ସବୁଠାରୁ କମ୍ ବିପଦ ଦେଖାଯାଇଥିଲା ।
ନିଦ ଆମ ପାଇଁ କାହିଁକି ଗୁରୁତ୍ୱପୂର୍ଣ୍ଣ?
କଲମ୍ବିଆ ବିଶ୍ୱବିଦ୍ୟାଳୟର ରେଡିଓଲୋଜିର ସହକାରୀ ପ୍ରଫେସର ଜୁନହାଓ ୱେନ୍ ଏହି ଅଧ୍ୟୟନର ନେତୃତ୍ୱ ନେଇଥିଲେ । ସେ କହିଛନ୍ତି, "ଆମର ଗବେଷଣା ଦର୍ଶାଉଛି ଯେ ଅତ୍ୟଧିକ କମ ଏବଂ ଅତ୍ୟଧିକ ନିଦ ଉଭୟ ଶରୀରର ପ୍ରାୟ ପ୍ରତ୍ୟେକ ଅଙ୍ଗରେ ବାର୍ଦ୍ଧକ୍ୟକୁ ତ୍ୱରାନ୍ୱିତ କରିପାରେ। ଏହା ସ୍ପଷ୍ଟ ଭାବରେ ଦର୍ଶାଉଛି ଯେ ମସ୍ତିଷ୍କ ଏବଂ ସାମଗ୍ରିକ ଶରୀର ସ୍ୱାସ୍ଥ୍ୟ ବଜାୟ ରଖିବା ପାଇଁ ଭଲ ନିଦ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।"
ଗବେଷଣାରେ କ’ଣ ଆବିଷ୍କାର ହୋଇଥିଲା?
ଗବେଷକମାନେ ବୟସ ବୃଦ୍ଧି ମାପିବା ପାଇଁ ମେସିନ୍ ଲର୍ଣ୍ଣିଂ ପ୍ରଯୁକ୍ତିବିଦ୍ୟା ବ୍ୟବହାର କରିଥିଲେ । ଦଳଟି ୧୭ଟି ଭିନ୍ନ ଅଙ୍ଗ ପ୍ରଣାଳୀ ପାଇଁ ୨୩ଟି ଜୈବିକ ଘଣ୍ଟା ତିଆରି କରିଥିଲେ । ଏହି ଘଣ୍ଟାଗୁଡ଼ିକରେ ଡାକ୍ତରୀ ସ୍କାନ, ରକ୍ତ ପରୀକ୍ଷା ଏବଂ ଶରୀର ପ୍ରୋଟିନରୁ ସୂଚନା ସାମିଲ କରାଯାଇଥିଲା ଯାହା ଦ୍ୱାରା ଜଣେ ବ୍ୟକ୍ତିଙ୍କ ଅଙ୍ଗଗୁଡ଼ିକ ସେମାନଙ୍କର ପ୍ରକୃତ ବୟସ ତୁଳନାରେ କେତେ ଶୀଘ୍ର ବୟସ ହେଉଛି ତାହା ନିର୍ଣ୍ଣୟ କରାଯାଇପାରିବ ।
କେଉଁ ଲୋକମାନେ ଶୀଘ୍ର ବୃଦ୍ଧ ହୁଅନ୍ତି?
ଏହି ଅଧ୍ୟୟନରେ UK ବାୟୋବ୍ୟାଙ୍କରୁ ପ୍ରାୟ ଅଧ ନିୟୁତ ଲୋକଙ୍କ ସ୍ୱାସ୍ଥ୍ୟ ତଥ୍ୟ ବିଶ୍ଳେଷଣ କରାଯାଇଥିଲା। ଗବେଷଣା ଏକ U-ଆକୃତିର ପ୍ୟାଟର୍ନ ପ୍ରକାଶ କରିଥିଲା। ଏହାର ଅର୍ଥ ହେଉଛି ଯେଉଁମାନେ ଦିନକୁ ୬ ଘଣ୍ଟାରୁ କମ୍ ଶୋଇଥିଲେ ଏବଂ ଯେଉଁମାନେ ଦିନକୁ ୮ ଘଣ୍ଟାରୁ ଅଧିକ ଶୋଇଥିଲେ ସେମାନଙ୍କ ମଧ୍ୟରେ ବାର୍ଦ୍ଧକ୍ୟ ବୃଦ୍ଧିର ହାର ଦ୍ରୁତ ଥିଲା । ସବୁଠାରୁ ସୁସ୍ଥ ନିଦ ପରିସର ପ୍ରାୟ ୭ ଘଣ୍ଟା ବୋଲି ବିବେଚନା କରାଯାଇଥିଲା। ଯେଉଁମାନେ କମ୍ ଶୋଇଥିଲେ ସେମାନଙ୍କ ମଧ୍ୟରେ ଡିପ୍ରେସନ୍, ଚିନ୍ତା, ମେଦବହୁଳତା, ମଧୁମେହ, ଉଚ୍ଚ ରକ୍ତଚାପ ଏବଂ ହାର୍ଟ ରୋଗର ଆଶଙ୍କା ଅଧିକ ଥିଲା।
ଏହାସହ ପଢ଼ନ୍ତୁ : ପଞ୍ଜାବ ଆଗରେ ୨୨୩ ରନର ବିଜୟ ଲକ୍ଷ୍ୟ ରଖିଲା RCB
