କଟକ,୦୪/୧୦: ପ୍ରାୟ ୭୦ ଦଶକରେ ଅରୁଣୋଦୟ ମାର୍କେଟ୍ସ୍ଥିତ ସିଡିଏ କମ୍ପେ୍ଲକ୍ସ ନିର୍ମାଣ ହୋଇଥିଲା । ୫୦ ବର୍ଷ ବିତିବା ଭିତରେ ଏହି ମାର୍କେଟ୍ କମ୍ପେ୍ଲକ୍ସ ପରିସର ଏବେ ଆଉ ବ୍ୟବହାର ଯୋଗ୍ୟ ହୋଇ ରହିନାହିଁ । ଅସୁରକ୍ଷିତ ହେବା କାରଣରୁ ଏହାକୁ ଭଙ୍ଗାଯିବ । ସେହି ସ୍ଥାନରେ ଏକ ପାଞ୍ଚ ମହଲା ବିଶିଷ୍ଟ ଭବ୍ୟ ଅଟ୍ଟାଳିକା ନିର୍ମାଣ କରାଯିବାକୁ ସିଡିଏର ଅଥରିଟି ବୈଠକରେ ନିଷ୍ପତ୍ତି ଗ୍ରହଣ କରାଯାଇଛି ।
୧୯୬୨ ମସିହାରେ ତତ୍କାଳୀନ ମୁଖ୍ୟମନ୍ତ୍ରୀ କଟକ ସହରର ଉନ୍ନତି ପାଇଁ ଗ୍ରେଟର୍ କଟକ ଇମ୍ପ୍ରୁଭ୍ମେଣ୍ଟ୍ ଟ୍ରଷ୍ଟର ଭିତ୍ତିପ୍ରସ୍ତର ପକାଇଥିଲେ । ଏଥିପାଇଁ ଅରୁଣୋଦୟ ମାର୍କେଟ୍ କମ୍ପେ୍ଲକ୍ସର ନିର୍ମାଣ କରାଯାଇଥିଲା । ମାର୍କେଟ୍ କମ୍ପେ୍ଲକ୍ସରେ ଏହାର କାର୍ଯ୍ୟାଳୟ ଚାଲିଥିଲା । ପରେ ଓଡ଼ିଶା ଡେଭଲପ୍ମେଣ୍ଟ ଅଥରିଟି ଆଇନ-୧୯୮୨ ଆଧାରରେ କଟକ ଇମ୍ପ୍ରୁଭ୍ମେଣ୍ଟ ଟ୍ରଷ୍ଟ ପରିବର୍ତ୍ତେ ଏହାକୁ କଟକ ଉନ୍ନୟନ କର୍ତ୍ତୃପକ୍ଷ(ସିଡିଏ) ବୋଲି ଘୋଷଣା କରାଗଲା । ସେବେଠାରୁ ମାର୍କେଟ୍ କମ୍ପେ୍ଲକ୍ସରେ ସିଡିଏ କାର୍ଯ୍ୟାଳୟ ଚାଲିଆସୁଛି । କେବଳ ସିଡିଏ କାର୍ଯ୍ୟାଳୟ ନୁହେଁ, ସେଠାରେ ପୂର୍ବରୁ ଇନ୍କମ୍ ଟ୍ୟାକ୍ସ ଅଫିସ୍, ଟ୍ରେଜେରୀ କାର୍ଯ୍ୟାଳୟ, ଷ୍ଟେଟ୍ ବ୍ୟାଙ୍କ୍ ଅଫ ଇଣ୍ଡିଆ, ଓଡ଼ିଶା ସମବାୟ ସମିତି, ପୋଷ୍ଟାଲ୍ ଅଫିସ୍, ପର୍ଯ୍ୟଟନ ନିର୍ଦ୍ଦେଶାଳୟ, ଚଳଚ୍ଚିତ୍ର ଉନ୍ନୟନ ନିଗମ ଅଥରିଟି ଆଦି କାର୍ଯ୍ୟାଳୟ କାର୍ଯ୍ୟ କରୁଥିଲା । ଏହାଦ୍ୱାରା ସିଡିଏର ଭଲ ଆୟ ମଧ୍ୟ ହେଉଥିଲା ।
କିନ୍ତୁ ଗତ କିଛି ବର୍ଷ ଭିତରେ ସିଡିଏ କାର୍ଯ୍ୟାଳୟ ପରିସରସ୍ଥ ଏହି କଂପ୍ଲେକ୍ସ୍ର ଭିତ୍ତିଭୂମି ଦୁର୍ବଳ ହେବାରେ ଲାଗିଛି । କେତେବେଳେ ଏହାର ଛାତରୁ ପ୍ଲାଷ୍ଟର୍ ଭାଙ୍ଗି ଗଳିପଡ଼ିଲାଣି ତ’ ଆଉ କେଉଁଠି ଦୁର୍ବଳ କାନ୍ଥ ଭୁଶୁଡ଼ି ପଡୁଛି । ବର୍ଷାଦିନେ ସିଡିଏ କାର୍ଯ୍ୟାଳୟ ଭିତରେ ପାଣି ଲହଡ଼ି ମାରିବା ଚିତ୍ର ସେଠାରେ ଏକ ଅସ୍ୱାସ୍ଥ୍ୟକର ପରିବେଶ ସୃଷ୍ଟି କରେ । ପାଣି ଭିତରେ ସିଡିଏର ଅଧିକାରୀ ତଥା କର୍ମଚାରୀମାନେ ପଶିବା ମଧ୍ୟ କଷ୍ଟକର ହୋଇପଡ଼େ । ସହର ଉନ୍ନତିର ଦାୟିତ୍ୱ ନେଇଥିବା ସିଡିଏ ନିଜ କୋଠାର ସୁରକ୍ଷା କରିପାରିଲା ନାହିଁ । ଫଳରେ ଏହି ମାର୍କେଟ୍ କମ୍ପେ୍ଲକ୍ସରେ ଦୀର୍ଘ ବର୍ଷ ଧରି ରହି ଆସିଥିବା ଅଧିକାଂଶ କାର୍ଯ୍ୟାଳୟ ଧୀରେ ଧୀରେ ଅନ୍ୟତ୍ର ଚାଲିଗଲେ । ଏବେ ସିଡିଏ କାର୍ଯ୍ୟାଳୟ ସମେତ ଆଉ ଅଳ୍ପ କିଛି କାର୍ଯ୍ୟାଳୟ ରହିଛି । କଟକ ସହରର ଛାତି ଉପରେ ଥିବା ଏକ ବିରାଟ କୋଠା ଅସୁରକ୍ଷିତ ହେବା କାରଣରୁ ଏବେ ଶ୍ରୀହୀନ ପାଲଟିଛି । ଅଧିକାଂଶ ଘର ଏହାର ଖାଲିପଡ଼ିଛି । କିନ୍ତୁ ପ୍ରତିବର୍ଷ ଏହି କୋଠାର ମରାମତି ନାଁରେ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଉଛି । କେବଳ କିଛି ଅଧକାରୀ ତଥା ଯନ୍ତ୍ରୀ ବିଭାଗ ନିଜ ହାତ ଚିକ୍କଣ ପାଇଁ ଏହି କୋଠାର ମରାମତି ନାଁରେ ଅର୍ଥ ଲୁଟ୍ କରି ଚାଲିଛନ୍ତି । ହେଲେ ଏହି କାର୍ଯ୍ୟାଳୟର ପ୍ରକୃତପକ୍ଷେ କୌଣସି ପ୍ରକାର ଉନ୍ନତି ହୋଇପାରୁନାହିଁ ।
ଏହି ଘର ନଷ୍ଟ ହେବାକୁ ଲାଗିବାରୁ ପ୍ରାୟ ୮ବର୍ଷ ତଳେ ଏହି ଘରକୁ ଅସୁରକ୍ଷିତ ଘୋଷଣା ପାଇଁ ପୂର୍ତ୍ତ ବିଭାଗକୁ କୁହାଯାଇଥିଲା । କିନ୍ତୁ ପୂର୍ତ୍ତ ବିଭାଗ ଘରର ସ୍ଥିତି ଦେଖିବା ପରେ ଏହା ଅସୁରକ୍ଷିତ ନୁହେଁ ବୋଲି ଜଣାଇଥିଲା । ଇତିମଧ୍ୟରେ ଏହି ଘର ସମ୍ପୂର୍ଣ୍ଣ ଅସୁରକ୍ଷିତ ହୋଇପଡ଼ିଛି । ଘରର ଚାରିଆଡ଼ୁ ପ୍ଲାଷ୍ଟର୍ ଖସିଗଲାଣି । ଛାତ, କାନ୍ଥରେ ଗଛ, ଲତା ମାଡ଼ିଯାଇଛି । ଫଳରେ ଏହି ଘରକୁ ଅସୁରକ୍ଷିତ ଘୋଷଣା ପାଇଁ ସିଡିଏ ପକ୍ଷରୁ ପୂର୍ତ୍ତ ବିଭାଗକୁ ପୁଣି ଅନୁରୋଧ କରାଯାଇଛି । ପୂର୍ତ୍ତ ବିଭାଗ ଏହି ଘରକୁ ଅସୁରକ୍ଷିତ ଘୋଷଣା ପରେ ଘରକୁ ଭଙ୍ଗାଯିବା ପାଇଁ ପଦକ୍ଷେପ ନିଆଯିବ ବୋଲି ସିଡିଏ ସଚିବ ଶ୍ୱେତ କୁମାର ଦାଶ ସୂଚନା ଦେଇଛନ୍ତି । ଅଥରିଟି ବୈଠକରେ ଏ ସଂକ୍ରାନ୍ତରେ ମଧ୍ୟ ନିଷ୍ପତ୍ତି ନିଆଯାଇଛି । ତେବେ ପାଞ୍ଚ ମହଲା କୋଠା ନିର୍ମାଣ ପାଇଁ କେତେ ଖର୍ଚ୍ଚ ହେବ ତାହାର ଏକ ବଜେଟ୍ ସିଡିଏକୁ ପୂର୍ତ୍ତ ବିଭାଗ ପ୍ରଦାନ କରିବ । ଏହି ଅର୍ଥ ମଞ୍ଜୁର ପରେ ସିଡିଏର ନୂଆ କୋଠା ନିର୍ମାଣ ଆରମ୍ଭ ହେବ ବୋଲି ସଚିବ ଶ୍ରୀ ଦାଶ ପ୍ରକାଶ କରିଛନ୍ତି ।
