କଟକ,୧୦/୧୧: ବାଲିଯାତ୍ରାରେ ବିଦ୍ୟୁତ୍ ଆଘାତରେ ଜଗତସିଂହପୁର ଅଞ୍ଚଳର ଛାତ୍ର ବିଶ୍ୱପ୍ରକାଶ ମନ୍ଥାନଙ୍କ ମୃତ୍ୟୁକୁ ଏହା ମଧ୍ୟରେ ବର୍ଷେ ପୂରିଛି । ହେଲେ ମୃତକଙ୍କ ପରିବାରକୁ ଏଯାବତ କ୍ଷତିପୂରଣ ପ୍ରଦାନ କରାଯାଇନି । କ୍ଷତିପୂରଣ ବାବଦରେ ମୃତକଙ୍କ ବଡ଼ ଭାଇକୁ ଯୋଗ୍ୟତା ଅନୁସାରେ ଚାକିରି ଦେବେ ବୋଲି କଟକ ଜିଲ୍ଲାପାଳ ଲିଖିତ ପ୍ରତିଶ୍ରୁତି ଦେଇଥିଲେ । ମାତ୍ର ଏହି ପ୍ରତିଶ୍ରୁତି ଏବେ ପାଣିର ଗାର ପାଲଟିଛି । ବର୍ଷେ ପରେ ବି ଚାକିରିର ନାଁ ଗନ୍ଧ ନାହିଁ । ଯାହାକୁ ନେଇ କ୍ଷୋଭ ପ୍ରକାଶ କରିଛନ୍ତି ମୃତ ଛାତ୍ରଙ୍କ ବାପା ।
ଗତବର୍ଷ ୨୦୨୪ ନଭେମ୍ବର ମାସ ୧୭ ତାରିଖରେ ବାଲିଯାତ୍ରା ଚାଲିଥିଲା । ଏହି ଦିନ ତୁଳସୀପୁର ସରସ୍ୱତୀ ଶିଶୁମନ୍ଦିରର ଛାତ୍ର ଜଗତସିଂହପୁରର ବିଶ୍ୱପ୍ରକାଶ ସାଙ୍ଗମାନଙ୍କ ସହିତ ଯାତ୍ରା ବୁଲିବାକୁ ଆସିଥିଲେ । ଭୁଆସୁଣୀ ପଠାରୁ ଆସୁଥିବା ମାଗଣା ବସ୍ରେ ସେ ଯାତ୍ରା ଆସି ଦେଖିବା ପରେ ରାତିରେ ପୁଣି ସ୍କୁଲ୍ ହଷ୍ଟେଲ୍କୁ ଫେରୁଥିଲେ । ଫେରିବା ବେଳେ ସେ ସେହି ମାଗଣା ବସ୍ରେ ବସିବା ପାଇଁ କ୍ୟାଣ୍ଟନମେଣ୍ଟ୍ ଥାନା ସାମ୍ନାରେ ରାସ୍ତା ପାର୍ କରୁଥିଲେ । ରାସ୍ତା ପାର୍ କରିବା ପାଇଁ ମଝିରେ ଥିବା ଡିଭାଇଡର ଡେଇଁବା ବେଳେ ବିଦ୍ୟୁତ୍ ତାର ସଂସ୍ପର୍ଶରେ ଚାଲିଆସିଥିଲେ । ସେହି ଡିଭାଇଡରରେ ଥିବା ଛୋଟ ଛୋଟ ଗଛରେ ଲିଚୁ ସଜାଯାଇଥିଲା । ମାତ୍ର ଲିଚୁ ପାଇଁ ଲାଗିଥିବା ତାର ବିଭିନ୍ନ ସ୍ଥାନରେ ଛିଣ୍ଡିଯାଇଥିଲା । ଏହି ଛିଣ୍ଡା ତାର ବିଶ୍ୱପ୍ରକାଶଙ୍କ ଦେହରେ ଲାଗିଯିବାରୁ ବିଦ୍ୟୁତ୍ ଆଘାତ ଲାଗିବା ପରେ ଘଟଣା ସ୍ଥଳରେ ତାଙ୍କର ମୃତ୍ୟୁ ଘଟିଥିଲା । ଆଉ ଏହି କଥାକୁ ନେଇ ତମ୍ବିତୁଫାନ ହୋଇଥିଲା ।
ପ୍ରଶାସନର ଅବହେଳା ଓ ଦାୟିତ୍ୱହୀନତା ପାଇଁ ଏଭଳି ଅଘଟଣ ହୋଇଥିବା ଅଭିଯୋଗ ହୋଇଥିଲା । ଆଉ ଏସ୍ସିବିରେ ବିଶ୍ୱପ୍ରକାଶଙ୍କ ମୃତଦେହ ବ୍ୟବଚ୍ଛେଦ ପରେ ପରିବାର ଲୋକ ସେଠାରେ ଧାରଣାରେ ବସିଥିଲେ । ପରେ ଜିଲ୍ଲାପାଳ ଦତ୍ତାତ୍ରେୟ ଭାଉସାହେବ ଶିନ୍ଦେ ଏସ୍ସିବିରେ ପହଞ୍ଚି ମୃତକଙ୍କ ପରିବାର ସହିତ ଆଲୋଚନା କରିଥିଲେ । ମୃତ ପ୍ରକାଶଙ୍କ ପରିବାରର ଜଣଙ୍କୁ ଅର୍ଥାତ୍ ତାଙ୍କର ବଡ଼ ଭାଇ ପ୍ରଜ୍ଞା ପ୍ରକାଶ ମନ୍ଥାନଙ୍କୁ ସରକାରଙ୍କ ପକ୍ଷରୁ ଶିକ୍ଷାଗତ ଯୋଗ୍ୟତା ଅନୁସାରେ ଚାକିରି ଦିଆଯିବ ବୋଲି କୁହାଯାଇଥିଲା । ଏଥିସହିତ ଆବଶ୍ୟକୀୟ କ୍ଷତିପୂରଣ ଦିଆଯିବ ବୋଲି ମଧ୍ୟ କହିଥିଲେ । ହେଲେ ଘଟଣାକୁ ବର୍ଷେ ବିତିଥିଲେ ବି ଏଯାବତ ମୃତକଙ୍କ ଭାଇକୁ ଚାକିରି ପ୍ରଦାନ କରାଯାଇନି । ଏନେଇ ବିଶ୍ୱପ୍ରକାଶଙ୍କ ବାପା ପ୍ରଭାକର ମନ୍ଥାନ ବାରମ୍ବାର ଯାଇ କଟକ ଜିଲ୍ଲାପାଳଙ୍କୁ ଭେଟିଥିଲେ ବି କୌଣସି ଫଳ ମିଳିନି । ଚାକିରି ମିଳିବା ତ ଦୂରର କଥା, କ୍ଷତିପୂରଣ ବି ମିଳିପାରିନି । ଏନେଇ ମୃତକଙ୍କ ବାପା ଅସନ୍ତୋଷ ବ୍ୟକ୍ତ କରିବା ସହିତ ଆସନ୍ତାକାଲି ପୁଣି ଜିଲ୍ଲାପାଳଙ୍କୁ ଭେଟିବେ ବୋଲି ସୂଚନା ମିଳିଛି ।
