ନୂଆଦିଲ୍ଲୀ: ବାଂଲାଦେଶ ପୋଲିସ ୪୧ ଜଣ ପୂର୍ବତନ ଅଧିକାରୀଙ୍କୁ ଗିରଫ କରିଛି। ଛାତ୍ର ଆନ୍ଦୋଳନ ସମୟରେ ଅତ୍ୟାଚାର କରିଥିବା ୧୦୫୯ ପୂର୍ବତନ ପୋଲିସ କର୍ମଚାରୀଙ୍କ ମଧ୍ୟରେ ଏହି ଅଭିଯୁକ୍କ ମାନେ ସାମିଲ ଥିଲେ । ସୋମବାର ଗଣମାଧ୍ୟମରେ ଏହି ସୂଚନା ପ୍ରକାଶ ପାଇଛି । ଏହି ଆନ୍ଦୋଳନ ଯୋଗୁଁ, ପଦଚ୍ୟୁତ ପ୍ରଧାନମନ୍ତ୍ରୀ ଶେଖ ହାସିନାଙ୍କ ସରକାରର ପତନ ଘଟିଥିଲା ଏବଂ ତାଙ୍କୁ ଦେଶ ଛାଡିବାକୁ ପଡିଥିଲା।
ସଂରକ୍ଷଣ ବ୍ୟବସ୍ଥା ବିରୋଧରେ ଛାତ୍ରମାନଙ୍କର ଭେଦଭାବ ବିରୋଧୀ ପ୍ରତିବାଦ ଏକ ଆନ୍ଦୋଳନର ରୂପ ନେଇଥିଲା ଏବଂ ହାସିନାଙ୍କ ସରକାରଙ୍କୁ କ୍ଷମତାରୁ ବହିଷ୍କାର କରିଥିଲା। ଗତବର୍ଷ ଜୁଲାଇରୁ ଅଗଷ୍ଟ ମଧ୍ୟରେ ହୋଇଥିବା ପ୍ରତିବାଦରେ ପ୍ରାୟ ୧୪୦୦ ଲୋକ ପ୍ରାଣ ହରାଇଥିଲେ।
'ପ୍ରଥମ ଆଲୋ' ଖବରକାଗଜ ପୋଲିସ ମୁଖ୍ୟାଳୟର ଅଜ୍ଞାତ ଅଧିକାରୀଙ୍କ ବୟାନକୁ ଉଦ୍ଧୃତି ଦେଇ କହିଛି ଯେ, ଅତ୍ୟାଚାରରୁ ବଞ୍ଚିଥିବା ବ୍ୟକ୍ତି କିମ୍ବା ମୃତକଙ୍କ ପରିବାର ସଦସ୍ୟ ମାନେ ପୋଲିସ ଷ୍ଟେସନ ଏବଂ କୋର୍ଟରେ ଶହ ଶହ ମାମଲା ଦାୟର କରିଛନ୍ତି, ଯେଉଁଥିରେ ମୁଖ୍ୟ ଆଇନ ପ୍ରବର୍ତ୍ତନ ସଂସ୍ଥାର ୧୦୫୯ ଜଣ ଅଧିକାରୀଙ୍କୁ ଅଭିଯୁକ୍ତ କରାଯାଇଛି। ପୋଲିସ ଏପର୍ଯ୍ୟନ୍ତ ୪୧ ଜଣ ପୂର୍ବତନ ଅଧିକାରୀଙ୍କୁ ଗିରଫ କରିସାରିଛି।
ଢାକା ମେଟ୍ରୋପଲିଟାନ୍ ପୋଲିସର ପୂର୍ବତନ ଅତିରିକ୍ତ କମିଶନର ପଳାତକ ହାରୁନ-ଉର-ରସିଦଙ୍କ ବିରୋଧରେ ସର୍ବାଧିକ ୧୭୪ଟି ମାମଲା ରୁଜୁ ହୋଇଛି । ଗିରଫ ପୂର୍ବତନ ଆଇଜିପି ଅଲ୍ ମାମୁନଙ୍କ ବିରୋଧରେ ୧୫୯ଟି ମାମଲା ରହିଛି। ଅଧିକାରୀ ମାନେ କହିଛନ୍ତି ଯେ, ଜଣେ ଅତିରିକ୍ତ ପୋଲିସ ମୁଖ୍ୟ ଏବଂ ଜଣେ ପୋଲିସ କମିଶନରଙ୍କ ସମେତ ଅନେକ ବରିଷ୍ଠ ଅଧିକାରୀ ଫେରାର୍ ଅଛନ୍ତି, ଯେତେବେଳେ ସେମାନଙ୍କ ମଧ୍ୟରୁ କିଛି ଦେଶ ଛାଡି ପଳାଇଥିବା ଅନୁମାନ କରାଯାଉଛି।
