ଢାକା: ବାଂଲାଦେଶର ଅନ୍ତରୀଣ ସରକାରର ମୁଖ୍ୟ ମହମ୍ମଦ ୟୁନୁସଙ୍କୁ ବଡ ଝଟକା। ବାଂଲାଦେଶ ଷ୍ଟୁଡେଣ୍ଟସ ଲିଗ୍ (ବିଏସଏଲ)ର ମୁଖ୍ୟ ନେତା ସଦ୍ଧାମ ହୁସେନ ମହମ୍ମଦ ୟୁନୁସଙ୍କ ନେତୃତ୍ୱାଧୀନ ସରକାରଙ୍କୁ ସିଧାସଳଖ ଟାର୍ଗେଟ କରିଛନ୍ତି। ୟୁନୁସଙ୍କ ପାକିସ୍ତାନ ପ୍ରତି ସମର୍ଥନ ଓ ଦେଶରେ ସଂଖ୍ୟାଲଘୁ ସମ୍ପ୍ରଦାୟଙ୍କ ଉପରେ ବଢିଚାଲିଥିବା ନିର୍ଯାତନା ଅଭିଯୋଗରେ ଆଓ୍ବାମୀ ଲିଗ୍ର ଛାତ୍ର ସଂଗଠନ ନେତା ଏହାର ତୀବ୍ର ବିରୋଧ କରିଛନ୍ତି।
ବିଏସଏଲ ନେତାଙ୍କ ଅଭିଯୋଗ ଅନୁଯାୟୀ, ୨୦୨୪ ଅଗଷ୍ଟରେ ଛାତ୍ର ଆନ୍ଦୋଳନ ଦ୍ୱାରା ପୂର୍ବତନ ପ୍ରଧାନମନ୍ତ୍ରୀ ଶେଖ ହାସିନାଙ୍କ ସରକାରଙ୍କ ପତନ ହୋଇଥିଲା। ଏହା ପରେ ମହମ୍ମଦ ୟୁନୁସଙ୍କ ଦ୍ୱାରା ଗଠିତ ଅନ୍ତରୀଣ ସରକାର ପାକିସ୍ତାନ ସହ ଘନିଷ୍ଠ ସମ୍ପର୍କ ଗଢ଼ିବା ପାଇଁ ଚେଷ୍ଟା ଚଳାଇଛନ୍ତି। ତେବେ ୧୯୭୧ ମସିହାରେ ହୋଇଥିବା ଯୁଦ୍ଧରେ ପାକିସ୍ତାନ କିପରି ବାଂଲାଦେଶରେ ନରସଂହାର କରିଥିଲା ତାହା ହୁଏତ ୟୁନୁସ ଭୁଲିଯାଇଛନ୍ତି ବୋଲି ହୁସେନ ଅଭିଯୋଗ ଆଣିଛନ୍ତି। ଏହା ସହ ବାଂଲାଦେଶରେ ବସବାସ କରୁଥିବା ହିନ୍ଦୁ ଓ ଅନ୍ୟ ସଂଖ୍ୟାଲଘୁ ସମ୍ପ୍ରଦାୟଙ୍କ ବିରୋଧରେ ହିଂସାକୁ ପ୍ରୋତ୍ସାହନ ଦେଉଛନ୍ତି ବୋଲି ସେ ଦାବି କରିଛନ୍ତି। ଏହାସହ ତାଙ୍କ ଦଳ ଦାବି କରିଛି ଯେ, ୟୁନୁସ ସରକାରଙ୍କ ଅଧୀନରେ ସଂଖ୍ୟାଲଘୁଙ୍କ ଉପରେ ଆକ୍ରମଣରେ ବୃଦ୍ଧି ଘଟିଛି। ଯାହା ଆନ୍ତର୍ଜାତୀୟ ମାନବାଧିକାର ସଂଗଠନମାନଙ୍କ ଦ୍ୱାରା ମଧ୍ୟ ସମାଲୋଚିତ ହୋଇଛି।
ଏକ ବିବୃତିରେ ବିଏସଏଲ ନେତା ହୁସେନ କହିଛନ୍ତି ଯେ, “ୟୁନୁସ ସରକାର ବାଂଲାଦେଶର ସାମ୍ପ୍ରଦାୟିକ ସମ୍ପ୍ରୀତିକୁ ବିନାଶ କରୁଛନ୍ତି ଏବଂ ପାକିସ୍ତାନର ସମର୍ଥନରେ ଦେଶକୁ ଅସ୍ଥିର କରିବାକୁ ଚେଷ୍ଟା କରୁଛନ୍ତି। ଖାଲି ସେତିକି ନୁହେଁ ବାଂଲାଦେଶର ଅନ୍ତରୀଣ ସରକାରର ମୁଖ୍ୟ ପାକିସ୍ତାନର ଲସ୍କର-ଏ-ତୋଇବା, ଜମାତ-ଏ-ଇସଲାମି, ହିଜବ ଉତ-ତେହରିର ଭଳି ବିଭିନ୍ନ ଆତଙ୍କୀ ସଂଗଠନ ସହ ମଧ୍ୟ ଲିଙ୍କରେ ରହିଛନ୍ତି। ଏହାସହ ଦେଶରେ ସଂଖ୍ୟାଲଘୁଙ୍କ ଉପରେ ହେଉଥିବା ନିର୍ଯାତନା ଏକ ଗମ୍ଭୀର ଚିନ୍ତାର ବିଷୟ ଭାବେ ଉଭା ହୋଇଛି।”
ଏହି ଅଭିଯୋଗ ସମ୍ପର୍କରେ ଅନ୍ତରୀଣ ସରକାର ପକ୍ଷରୁ ତୁରନ୍ତ କୌଣସି ପ୍ରତିକ୍ରିୟା ମିଳିପାରିନାହିଁ। ତେବେ, ଏହା ପୂର୍ବରୁ ମହମ୍ମଦ ୟୁନୁସ ଏହିପରି ଅଭିଯୋଗକୁ ଖଣ୍ଡନ କରି କହିଛନ୍ତି ଯେ ତାଙ୍କ ସରକାର ସମସ୍ତ ନାଗରିକଙ୍କ ସୁରକ୍ଷା ଓ ସମ୍ପ୍ରତି ପାଇଁ ପ୍ରତିବଦ୍ଧ ରହିଛି।
ଏହି ଘଟଣା ବାଂଲାଦେଶରେ ରାଜନୈତିକ ଅସ୍ଥିରତା ଏବଂ ସାମ୍ପ୍ରଦାୟିକ ସମ୍ପର୍କ ଉପରେ ନୂଆ ବିତର୍କ ସୃଷ୍ଟି କରିଛି। ଅନ୍ୟପକ୍ଷରେ, ଆଓ୍ବାମୀ ଲିଗ୍ ଏବଂ ଏହାର ସହଯୋଗୀ ସଂଗଠନମାନେ ୟୁନୁସ ସରକାରଙ୍କୁ “ଅବୈଧ” ଓ “ଅସାମ୍ବିଧାନିକ” ବୋଲି ସମାଲୋଚନା କରୁଛନ୍ତି। ଯାହା ବାଂଲାଦେଶର ରାଜନୈତିକ ସଂଘର୍ଷକୁ ଆହୁରି ତୀବ୍ର ହୋଇ ଚାଲିଛି।
