କଟକ,୦୯/୦୨: ପ୍ରଥମଥର ବାରବାଟୀ ଷ୍ଟାଡିୟମ୍ରେ ଦୁଇ ପ୍ରକାରର ପିଚ୍ ପ୍ରସ୍ତୁତ କରାଯାଇଛି । କଳାମାଟି ଓ ନାଲି ମାଟିରେ ଦୁଇଟି ଭିନ୍ନ ଭିନ୍ନ ପିଚ୍ ଉପଲବ୍ଧ ରହିଛି । ନାଲି ମାଟି ମହାରାଷ୍ଟ୍ରରୁ ଏବଂ କଳାମାଟି ସ୍ୱତନ୍ତ୍ର ଭାବେ ଓଡ଼ିଶାର କଳାହାଣ୍ଡିରୁ ଆସିଛି । ପ୍ରାୟ ଦୁଇବର୍ଷ ପୂର୍ବରୁ ଏ ଯୋଜନା କରାଯାଇଥିଲା । ଉଭୟ ମାଟିର ପିଚ୍ କରିବାକୁ ଯାଇ ବିଶେଷଜ୍ଞଙ୍କ ପରାମର୍ଶ ନେଇ ଆଗେଇଥିଲା ଓସିଏ । ତିନୋଟି ମ୍ୟାଚ୍ ପିଚ୍ ଓ ୪ଟି ପ୍ରାକ୍ଟିସ୍ ପିଚ୍ ପ୍ରସ୍ତୁତ କରାଯାଇଥିବା ବେଳେ ଫେବ୍ରୁଆରୀ ୯ର ଭାରତ-ଇଂଲଣ୍ଡ ମ୍ୟାଚ କଳାମାଟିରେ ଖେଳାଯିବାକୁ ନିଷ୍ପତ୍ତି ନିଆଯାଇଥିବା ଓସିଏର ମୁଖ୍ୟ ପିଚ୍ କ୍ୟୁରେଟର୍ ଅଞ୍ଜନ କୁମାର ଖୁଣ୍ଟିଆ ସୂଚନା ଦେଇଛନ୍ତି ।
କଳାମାଟି ପିଚ୍ରେ ବଡ଼ ସ୍କୋର୍ ହେବାର ସୁଯୋଗ ରହିଛି । ଉଭୟ ବ୍ୟାଟର୍ ଓ ବୋଲରଙ୍କୁ ସହଯୋଗ କରିବ । କାକର ପଡ଼ିବା ସମ୍ଭାବନା ରହିଥିବାରୁ ପିଚ୍ କାକର ଦ୍ୱାରା ବିଶେଷ ପ୍ରଭାବିତ ହେବ ନାହିଁ । ତା’ଛଡ଼ା ୫୦ ଓଭର ଖେଳ ପରେ ଦ୍ୱିତୀୟ ପାଳି ବେଳକୁ ପିଚ୍ରେ ସାଧାରଣ ରୋଲିଂ କଲେ ନୂଆ ପିଚ୍ର ଅନୁଭବ ଦେବ । ଅନ୍ତର୍ଜାତୀୟ ମ୍ୟାଚ ପୂର୍ବରୁ ବାରବାଟୀ ଷ୍ଟାଡିୟମ୍ର ଏହି ପିଚ୍ରେ ରଣଜୀ ମୁକାବିଲା କରାଯାଇଥିଲା । ପିଚ୍କୁ ପରୀକ୍ଷା କରାଯିବା ପରେ ଅନ୍ତର୍ଜାତୀୟ ମୁକାବିଲା ପାଇଁ ପ୍ରସ୍ତୁତ କରାଯାଇଛି।
ବାରବାଟୀ ଲଢ଼େଇ: ସୁପର ସନ୍ଡେ'ରେ ଭାରତ-ଇଂଲଣ୍ଡ ଦ୍ୱିତୀୟ ଦିନିକିଆ, ଟିମ୍କୁ ଫେରିବେ କୋହଲି, ରିଷଭ
