ଭୁବନେଶ୍ୱର,୨୯/୦୧: ଜମ୍ମୁ-କାଶ୍ମୀର ଭଳି ନୟାଗଡ଼ ଜିଲ୍ଲା ଓଡ଼ଗାଁ ବ୍ଲକ ମଗରବନ୍ଧ ପଞ୍ଚାୟତ ଜାମୁକଣଠାରେ ଥିବା ପାହାଡ଼ ଉପରେ ବିରାଜମାନ କରିବେ ମାତା ବୈଷ୍ଣୋଦେବୀ। ମାତାଙ୍କ ଏକ ଭବ୍ୟ ମନ୍ଦିର ନିର୍ମାଣ ହୋଇଛି । ଭୁବନେଶ୍ୱରଠାରୁ ୧୦୨ କିଲୋମିଟର ଦୂର ଏହି ମନ୍ଦିରରେ ଆଜିଠାରୁ ୫ଦିନ ଧରି ପ୍ରାଣ ପ୍ରତିଷ୍ଠା ଉତ୍ସବ ପାଳିତ ହେବ । ପୁରୀ ଜଗନ୍ନାଥ ମନ୍ଦିରର ପୂଜକ ଏହି ପୂଜାର୍ଚ୍ଚନା କରିବେ ।
ଜମ୍ମୁ-କାଶ୍ମୀର ମା' ବୈଷ୍ଣାଦେବୀ ଧାମ ଭଳି ଏଠାରେ ମଧ୍ୟ ପାହାଡ଼ର ଗୁମ୍ଫା ଭିତରକୁ ପ୍ରବେଶ କରି ଭକ୍ତମାନେ ମା'ଙ୍କ ଦର୍ଶନ ପାଇବେ । ଏହି ଗୁମ୍ଫାର ଲମ୍ୱ ୧୮୦ ଫୁଟ । ୫୦ ଏକର ପାହାଡ଼ିଆ ଅଞ୍ଚଳରେ ନିର୍ମିତ ମା'ଙ୍କ ଏହି ଭବ୍ୟ ମନ୍ଦିର ନିର୍ମାଣ ପାଇଁ ୪ ବର୍ଷ ସମୟ ଲାଗିଥିଲା। ଶ୍ରୀ ମାତା ବୈଷ୍ଣୋ ଦେବୀ ଚାରିଟେବଲ ଟ୍ରଷ୍ଟ, ବୈଷ୍ଣୋ ଧାମ ଓଡ଼ିଶା ପକ୍ଷରୁ ଭୁବନେଶ୍ୱରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ କୁହାଯାଇଛି ।
ଏହି ଖବରଟିକୁ ପଢନ୍ତୁ-ବିଲରୁ ହାତୀର ମୃତଦେହ ଉଦ୍ଧାର, କାରଣ ଅସ୍ପଷ୍ଟ
ଏନେଇ ଭକ୍ତ ଅଜାତି ରାଉତ କହିଛନ୍ତି ଯେ, ତାଙ୍କ ପତ୍ନୀ ମମତା ରାଉତ ୪ ବର୍ଷ ତଳେ ହଠାତ୍ ମା'ଙ୍କ ଠାରୁ ଏଠାରେ ମନ୍ଦିର ନିର୍ମାଣ ପାଇଁ ନିର୍ଦ୍ଦେଶ ପାଇଥିଲେ । ଏହାପରେ ସେ ମା'ଙ୍କ ବାସସ୍ଥାନ ପାଇଁ ଜମି ଖୋଜିବା ଆରମ୍ଭ କରିଥିଲେ। ମା'ଙ୍କ କୃପାରୁ ଜମି ମିଳିଲା । ଜମି ମିଳିବା ପରେ ଏହା ଶ୍ରୀ ମାତା ବୈଷ୍ଣୋ ଦେବୀ ଚାରିଟେବଲ୍ ଟ୍ରଷ୍ଟ ବୈଷ୍ଣୋ ଧାମ, ଓଡ଼ିଶା ନାମରେ ପଞ୍ଜିକୃତ ହୋଇଥିଲା । ମନ୍ଦିର ନିର୍ମାଣ ବେଳେ ଆଖପାଖ ୭ଖଣ୍ଡ ପଞ୍ଚାୟତର ଲୋକମାନେ ସହଯୋଗ କରିଥିଲେ । ଏହି ପୀଠରେ ମା'ଙ୍କ ମନ୍ଦିର ଛଡ଼ା ଗଣେଶ ମନ୍ଦିର, ଭୈରବ ମନ୍ଦିର, ହନୁମାନ ମନ୍ଦିର ଓ ଆରତୀ ମଣ୍ଡପ ନିର୍ମାଣ କରାଯାଇଛି ।
ନୟାଗଡ଼ରୁ ଶରଣକୁଳ ରୋଡ୍ ପର୍ଯ୍ୟନ୍ତ ୬ କିମି ଗଲେ ସାଳପଟା ଛକ ପଡ଼ିବ । ତାକୁ ଅତିକ୍ରମ କରି ପୁଣି ୬ କିଲୋମିଟର ପରେ ଜାମୁକଣ ପର୍ବତରେ ମା’ଙ୍କ ମନ୍ଦିରରେ ପହଞ୍ଚିପାରିବେ । ମନ୍ଦିରର ପ୍ରାଣ ପ୍ରତିଷ୍ଠା ପରେ ଆସନ୍ତା ଫେବ୍ରୁଆରି ୨ ତାରିଖ ଅପରାହ୍ଣ ୩ଟାରୁ ମା' ସର୍ବସାଧାରଣଙ୍କୁ ଦର୍ଶନ ଦେବେ ବୋଲି ମନ୍ଦିର କମିଟି ପକ୍ଷରୁ ସୂଚନା ମିଳିଛି ।
