ପୁରୀ,୧୮/୦୩: ଭାଙ୍ଗକୁ ମାଦକ ଦ୍ରବ୍ୟ ଭାବେ ଘୋଷଣା କରାଯିବାକୁ ଇତି ମଧ୍ୟରେ ସାତ ମାସ ବିତିଛି । କିନ୍ତୁ ପୁରୀରେ ଏହାର କାରବାର ଉପରେ କୌଣସି ପ୍ରଭାବ ପକାଇନଥିବା ଦେଖିବାକୁ ମିଳିଛି । ପୁରୀରେ ‘ମରିଚି ପାଣି’ ଭାବେ ପରିଚିତ ଭାଙ୍ଗ ପଣାର ମଉଜ ପୂର୍ବ ଭଳି ଜୀବିତ ରହିଛି । ଏପରିକି ଭାଙ୍ଗର ଚାହିଦା ଏଣିକି ଆହୁରି ବଢ଼ୁଥିବା ଦେଖିବାକୁ ମିଳିଛି । ସହରର ସାହି ଛକରୁ ଗାଁର ଗଳିକନ୍ଦି ଯାଏଁ ଭାଙ୍ଗ ବେପାର ବେଶ୍ ସକ୍ରିୟ ରହିଛି ।
ଗତ ବର୍ଷ ଅଗଷ୍ଟ ମାସରେ ଭାଙ୍ଗକୁ ମାଦକ ଦ୍ରବ୍ୟ ଭାବେ ଘୋଷଣା କରିଥିଲେ ସରକାର । ଅର୍ଥାତ୍ ଭାଙ୍ଗ କାରବାର ଉପରେ ରୋକ୍ ଲଗାଇବାକୁ ଯୋଜନା କରାଯାଇଥିଲା । ଏଭଳି ସରକାରୀ ଛାଟ ବସିବା ପରେ ଭାଙ୍ଗ ନପାଇବା ଆଶଙ୍କା କରି ସହରରେ ଭାଳେଣି ପଡ଼ିଥିଲା । ଗଳି କନ୍ଦିରୁ ମନ୍ଦିର ସବୁଠି ଗୋଟିଏ ଚର୍ଚ୍ଚା ହୋଇଥିଲା । ସକାଳୁ ଟେଳେ ନପଡ଼ିଲେ ପୋଖରୀପାଣି କେମିତି ଯିବେ? ଦିନ ବିତିବ କିପରି? ଦେଶସାରା ଚର୍ଚ୍ଚାରେ ଥିବା ପୁରୀର ନିଆରା ଚଳଣିକୁ ନେଇ ସଭିଏଁ ଦ୍ୱନ୍ଦ୍ୱରେ ଥିଲେ । କେବଳ ଯେ, ସହର ନୁହେଁ । ଗାଁର ଚଳଣି ମଧ୍ୟ ଭାଙ୍ଗ ପଣା ସହ ଜଡ଼ିତ । ତେଣୁ ସାଙ୍ଗ, ଭାଙ୍ଗ ଓ ପଙ୍ଗତର ମାହୋଲକୁ ଲୋକେ ଆଦରରେ ଗ୍ରହଣ କରି ନେଉଥିବା ବେଳେ ଭାଙ୍ଗ ବିକିଲେ ସରକାରୀ କାର୍ଯ୍ୟାନୁଷ୍ଠାନ ଶୁଣିବା ପରେ ଦିନ ଚର୍ଯ୍ୟା ନେଇ ସନ୍ଦେହ ଘେରରେ ପଡ଼ିଥିଲେ ହଜାର ହଜାର ପୁରୀବାସୀ ।
କିନ୍ତୁ ମାତ୍ର ଅଳ୍ପ କିଛି ଦିନ ଏଭଳି ଚର୍ଚ୍ଚା ଲାଗି ରହିଥିଲା । ଏହାପରେ ଯଥା ପୂର୍ବଂ ତଥା ପରଂ ନ୍ୟାୟରେ ପୁଣି ଚାଲିଲା ଭାଙ୍ଗ ବେପାର । ଖୁଲମଖୁଲା ବିକ୍ରି ହେଲା ଭାଙ୍ଗ । ଗଳି କନ୍ଦିରରେ ଅବାଧରେ ମିଳୁଛି ଭାଙ୍ଗ ପଣା । ବିଭିନ୍ନ ପାନ ଦୋକାନରେ ବୋତଲରେ ଭର୍ତ୍ତି କରି ଭାଙ୍ଗ ଓ ମିଶ୍ରି ପଣା ବିକ୍ରି ଚାଲିଛି । ଭାଙ୍ଗର ଏଠି ବିଭିନ୍ନ ରୂପ ରହିଛି । ନେଳି ପାଣି, ମରିଚି ପାଣି, ଟେଳେ ଗୁଳେ ଓ ଚୁରୁମା(ଭାଙ୍ଗ ଗୁଣ୍ଡ) ଆଦି ନାମରେ ଚାଲିଛି ବିକ୍ରି । ଭାଙ୍ଗକୁ କିଏ ସର୍ବତ୍ ଭାବେ ପିଇ ଦେଉଛନ୍ତି ତ ଆଉ କିଏ ଶୁଖିଲା ଗୁଣ୍ଡ କରି ଖାଇଦେଉଛନ୍ତି । ଏପରିକି ଅନେକ ବଟା ଭାଙ୍ଗକୁ ଗୁଳା କରି ଢୋକି ଦେଉଛନ୍ତି । ଅନ୍ୟପଟେ ମାତ୍ରାଧିକ ନିଶା ଆବଶ୍ୟକ ଥିବା ନିଶାଖୋରଙ୍କ ପାଇଁ ମଧ୍ୟ ବେପାରୀଙ୍କ ବ୍ୟବସ୍ଥା ଟିକିଏ ଅଲଗା ରହିଛି । ଭାଙ୍ଗରେ ନିଶା ବଟିକା ମିଶାଇ ବେପାରୀ ବିକ୍ରି କରୁଥିବା ବେଳେ ସେଠାରେ ବହୁ ସଂଖ୍ୟାରେ ନିଶାଖୋରଙ୍କ ଭିଡ଼ ଜମୁଥିବା ଦେଖିବାକୁ ମିଳିଛି ।
ବିଶ୍ୱସ୍ତ ସୂତ୍ରରୁ ମିଳିଥିବା ଖବର ଅନୁଯାୟୀ ପୁଲିସକୁ କୁଆଡ଼େ ଏହି ବେପାରୀମାନେ ମାସିକିଆ ଦେଇ ବେପାର ଜାରି ରଖିଛନ୍ତି । ଗୋଟିଏ ପଟେ ପୁଲିସ ଏଦିଗରେ ନିରବ ରହୁଥିବା ବେଳେ ଅନ୍ୟପଟେ ବେପାରୀ ଓ ଗ୍ରାହକମାନେ ବୋଲିବାଣୀ କରି ପୁରୀରୁ ଭାଙ୍ଗ କେବେ ହଟିଛି ନା ହଟିବ ବୋଲି କହିବାକୁ ବି ପଛାଉନଥିବା ଦେଖିବାକୁ ମିଳିଛି । ଅର୍ଥାତ୍ ଆଇନ୍ ଆଖିରେ ଆଙ୍ଗୁଠି ଗେଞ୍ଜି ନିର୍ଭୟରେ ଭାଙ୍ଗ ବେପାର ଜାରି ରହିଛି । ଧର୍ମକୁ ଆଖିଠାର ମାରିବା ଭଳି ସହରରେ ଏହି ୭ ମାସ ମଧ୍ୟରେ ମାତ୍ର ପାଞ୍ଚରୁ ଦଶଟି ଭାଙ୍ଗ ଜବତ ମାମଲା ରୁଜୁ କରିଛି ପୁଲିସ । ଅବକାରୀ ବିଭାଗ ସମ୍ପୂର୍ଣ୍ଣ ଭାବେ ଏ କ୍ଷେତ୍ରରେ ନିରବ ରହିଥିବା ଦେଖିବାକୁ ମିଳିଛି ।
ଏସମ୍ପର୍କରେ ଅତିରିକ୍ତ ଏସ୍ପି ସୁଶିଲ୍ ମିଶ୍ର କହିଛନ୍ତି, ଅବକାରୀ ବିଭାଗ ଓ ପୁଲିସ ଜିଲ୍ଲାରେ ଭାଙ୍ଗ କାରବାର ଉପରେ ନଜର ରଖିଛି । ଚଢ଼ଉ ବେଳେ ଯାହା କିଛି ମିଳୁଛି ଜବତ କରାଯାଉଛି । ଆଗକୁ ମଧ୍ୟ ଏହି ଚଢ଼ଉ ଜାରି ରହିବ ବୋଲି ଶ୍ରୀ ମିଶ୍ର କହିଛନ୍ତି ।
