ନୀଳଗିରି, ୯/୭: ୧୮ ଦଫା ଦାବି ନେଇ ନୀଳଗିରିରେ ବିଭିନ୍ନ ଶ୍ରମିକ ସଂଗଠନ ତରଫରୁ ଭାରତବନ୍ଦ ଆନ୍ଦୋଳନ । କେନ୍ଦ୍ର ସରକାରରେ ଶ୍ରମିକ ବିରୋଧୀ ଶ୍ରମ କୋର୍ଡ ପ୍ରତ୍ୟାହାର ସହିତ, ଚାଷୀ ଫସଲର ସର୍ବନିମ୍ନ ଦର ଆଇନ, ଦରଦାମ ନିୟନ୍ତ୍ରଣ, ନିଯୁକ୍ତି, ସରକାରୀ ସମ୍ପତ୍ତି ବିକ୍ରି ବନ୍ଦ ଏବଂ ଦେଶର ସୁରକ୍ଷା ପାଇଁ ପ୍ରମୁଖ ୧୮ ଦଫା ଦାବି ନେଇ ସାରା ଦେଶରେ ଆଜି ଭାରତ ବନ୍ଦ ଡାକରା ଦିଆଯାଇଛି ।
ବୁଧବାର ବାଲେଶ୍ୱର ଜିଲ୍ଲା ନୀଳଗିରିଠାରେ ଏହି ଆନ୍ଦୋଳନ କରାଯାଇଛି । ନୀଳଗିରି ବାଇପାସ୍ ଛକ ସେରଗଡ଼-ଝରଣାଘାଟି ରାଜ୍ୟ ରାଜପଥ ବନ୍ଦ କରିବା ସହ ବିଭିନ୍ନ ସରକାରୀ କାର୍ଯ୍ୟାଳୟ, କୋର୍ଟ ଓ ବ୍ୟାଙ୍କ ବନ୍ଦ କରାଯାଇଛି । ସେହିପରି ମିତ୍ରପୁର ଛକଠାରେ ମଧ୍ୟ ଆନ୍ଦୋଳନ କରାଯାଇଛି । ସ୍କୁଲ, କଲେଜ, ଡାକ୍ତରଖାନା ଭଳି ଅତ୍ୟାବଶ୍ୟକ କାର୍ଯ୍ୟାଳୟକୁ ଛାଡ଼ି ଦେବା ସହ ଦୋକାନ ବଜାର ମଧ୍ୟ ବନ୍ଦ କରାଯାଇଛି । ଏହି ଧର୍ମଘଟରେ ବିଜେଡି, କଂଗ୍ରେସ, ସିପିଆଇ, ସିପିଆଇ(ଏମ୍) ନୈତିକ ସମର୍ଥନ ଦେଇଥିବା ବେଳେ ବିଜେଡିରୁ ପୂର୍ବତନ ବିଧାୟକ ସୁକାନ୍ତ ନାୟକ, ଗଙ୍ଗାଧର ମିଶ୍ର, ସିପିଆଇରୁ ନିରଞ୍ଜନ ବାରିକ, କୈଳାସ ପଣ୍ଡା, ଆଇନଜୀବି ଗୌରହରୀ ବେହେରା, ବିଜୟ ସ, ରାଜ୍ୟ କିଷାନ କଂଗ୍ରେସ ଉପସଭାପତି ଯଶୋଦା ନନ୍ଦନ ସିଂହ, ବ୍ଳକ୍ ସଭାପତି ମନୋରଞ୍ଜନ ପଣ୍ଡା, ଏନଏସି ସଭାପତି ଉପେନ୍ଦ୍ର ବେହେରା, ଛାତ୍ର କଂଗ୍ରେସ ନେତା ଅଶ୍ୱିନ ପାତ୍ର, ସିପିଆଇ(ଏମ୍)ରୁ ଦଳୀୟ ନେତୃତ୍ୱ ମହିଳା କର୍ମୀ, ପାଚିକା, ସହାୟିକା, ମହିଳା ସାମିଲ ଥିଲେ ।
